Serbiyalı idmançılar ilk Avropa Oyunlarında əldə etdikləri nəticələrdən məmnundurlar

Bakı:

23 °C

64 %

2 m/s

Əlaqə

AZ RU EN

Ana səhifə / İdman / Serbiyalı idmançılar ilk Avropa Oyunlarında əldə etdikləri nəticələrdən məmnundurlar

Serbiyalı idmançılar ilk Avropa Oyunlarında əldə etdikləri nəticələrdən məmnundurlar

26.06.2015 [10:17]

“Bakı-2015”-də atıcılıq və sambo idman növləri üzrə Serbiyanı uğurla təmsil edərək ölkələrinə medallarla qayıdan idmançılar Belqradın “Nikola Tesla” hava limanında keçirilmiş mətbuat konfransında Oyunlarla bağlı təəssüratlarını bölüşüblər.
Yarışlarda qızıl medala layiq görülmüş samboçu İvana Yandriç deyib: “Serbiyanı Avropa Oyunlarında təmsil edən ən güclü atletlər arasında olduğum üçün qürur duyuram. Sambo qeyri-olimpiya idman növü olmasına baxmayaraq, yarışlar çox böyük maraq və həyəcanla izlənilirdi. Oyunlarda uğur qazanacağıma əmin idim, lakin qızıl medal gözləmirdim”.
İ.Yandriçin məşqçisi Veselen Novakoviç isə sevinc hissini bu sözlərlə ifadə edib: “Sambo geniş yayılan bir idman növüdür. Ümid edirəm ki, tezliklə Olimpiya Oyunlarının proqramına da daxil ediləcək. Mən İvanaya böyük ümidlər bəsləyirdim və çox şadam ki, o, idman tarixinə məhz bu uğuru ilə düşdü”.
“Bakı-2015”-də atıcılıq idman növünün qadınlar arasında 10 metrdən hava tüfəngi ilə atəşaçma yarışının qalibi Andrea Arsoviç bildirib: “Bu tarixi yarışlarda iştirak və yüksək nəticə əldə etməkdən çox məmnunam. Ölkəmi yüksək səviyyədə təmsil etdiyim üçün qürur hissi keçirirəm”.
Andrea Arsoviçin məşqçisi Draqan Doneviç deyib: “Yarışlar çox gərgin mübarizə şəraitində keçdi. Ona görə də bu medalları qazanmaq heç də asan olmadı”.
Avropa Oyunlarında qadınlar arasında 10 metrdən hava tapançası ilə atəşaçma yarışının qalibi Zorana Arunoviç vurğulayıb: “Qızıl medal qazandığım üçün çox sevinirəm. İlk Avropa Oyunları mənə böyük stimul verdi”.
Yarışların gərgin keçdiyini diqqətə çatdıran məşqçi Yelena Arunoviç isə deyib: “Avropa Oyunlarında güclü rəqiblərlə qarşılaşmağımıza baxmayaraq yarışlar bizim üçün uğurlu keçdi. İnanıram ki, əldə etdiyimiz bu uğur bundan sonra qatılacağımız bütün turnirlər üçün çox yaxşı başlanğıc olacaq”.
“Bakı-2015”-də kişilər arasında 50 metr məsafədən tapança və 10 metr məsafədən hava tapançası ilə atəşaçma yarışlarının qalibi Mikaç Damir deyib: “İkiqat sevinc hissi keçirirəm. Bu Oyunlarda iki qızıl medal qazanmaq arzuladığım, lakin gözləmədiyim bir nəticə idi. Çünki yarışlar mənim üçün çox çətin keçdi”.
Serbiyanın atıcılıq komandasının məşqçisi Sreçko Pejoviç də serb idmançılarının uğurlarından danışıb: “Bakıya güclü komanda ilə yollanmışdıq. İdmançılarımızın hamısı medal qazanmaq əzmində idi. Yarışlarda Serbiya atıcılıq üzrə ikinci ən yaxşı nəticə göstərən ölkə oldu. Hesab edirəm ki, bu növbəti beynəlxalq turnirlər üçün öz müsbət təsirini göstərəcək”.
“Bakı-2015”-də Serbiyanı təmsil edən idmançılarla fəxr etdiyini bildirən bu ölkənin Olimpiya Komitəsinin nümayəndəsi Nenad Petkoviç isə uğurlu nəticələr göstərən atletləri təbrik edib. Vurğulayıb ki, medal sayına görə hazırda Serbiyanın 6-cı yerdə qərarlaşması bu ölkədə idmanın inkişafından xəbər verir.

Paylaş:

Baxılıb: 1092 dəfə