UEFA: Bakı özünü beynəlxalq səviyyəli idman yarışlarının mərkəzi kimi təsdiq etməyi bacarıb

Bakı:

22 °C

68 %

5 m/s

Əlaqə

AZ RU EN

Ana səhifə / İdman / UEFA: Bakı özünü beynəlxalq səviyyəli idman yarışlarının mərkəzi kimi təsdiq etməyi bacarıb

UEFA: Bakı özünü beynəlxalq səviyyəli idman yarışlarının mərkəzi kimi təsdiq etməyi bacarıb

11.06.2019 [09:24]

Çox qısa bir müddətdə özünü beynəlxalq səviyyəli idman yarışlarının mərkəzi kimi təsdiq etməyi bacaran Bakı idman azarkeşlərinə və turistlərə unudulmaz və maraqlı anlar bəxş edən şəhərlər sırasına daxil ola bilib.
AZƏRTAC xəbər verir ki, bu fikir UEFA-nın rəsmi saytında yayımlanan “Gözəl Bakı” sərlövhəli məqalədə qeyd olunub.
Məqalədə Bakının 2020-ci ildə keçiriləcək futbol üzrə Avropa çempionatının oyunlarına ev sahibliyi edəcək 12 şəhərdən biri olduğu bildirilib, paytaxtın bu oyunlara tam hazır olduğu vurğulanıb.
Həmçinin yazıda Azərbaycan Futbol Federasiyaları Assosiasiyasının (AFFA) baş katibi Elxan Məmmədovun “Avro-2020”nin dörd final oyununun keçirilməsi üçün assosiasiyanın planları, azarkeşləri Bakıda nələrin gözlədiyi barədə fikirləri də yer alıb.
“Biz Bakının gələcəkdə idman mərkəzinə çevrilməsi üçün strategiya hazırlamışıq və tədricən də bu məqsədə doğru irəliləyirik. Bakı idman mərkəzinə çevriləcək. “Avro-2020”nin oyunları futbolun inkişafına, daha çox insanın futbola cəlb olunmasına gətirib çıxaracaq. Futbol daim inkişaf edən idman növüdür. Son bir neçə ildə onun populyarlığı nəzərəçarpacaq dərəcədə yüksəlib. Əlbəttə, digər idman növləri də var ki, onlara da maraq artır. Amma futbol idman növləri içərisində ən populyarıdır. Bizim üçün həm ölkədə, həm də bütövlükdə regionlarda futbola olan marağın səviyyəsini qoruyub saxlamaq vacibdir. Bizim nailiyyətimiz o olacaq ki, gələcəkdə daha çox uşaq vaxtını kompüter arxasında deyil, məhz futbol oynayaraq keçirsin. Bu da ölkədə sağlam həyat tərzinin inkişafına və daha sağlam insanların böyüməsinə səbəb olacaq”, - deyə Elxan Məmmədov məqalədə qeyd edib.
AFFA-nın baş katibi bildirib ki, Bakı özündə qədimliyi və müasirliyin harmoniya təşkil etdiyi müasir şəhərdir. Son illərdə Bakının çox sürətlə inkişaf etdiyini və modernləşdiyini deyən Elxan Məmmədov şəhərin xarici turistlər üçün çox maraqlı və cəlbedici olmasından da danışıb. “Şəhərin tarixi-memarlıq abidələri ilə zəngin olan hissəsi ilə yanaşı, həm də müasir məkanları da bura gələn insanların diqqətini özünə cəlb edir. Burada müxtəlif bədii sərgilərin, müasir görməli yerlərin mövcudluğu şəhərin görünüşünə xüsusi rəng qatır”, - deyə o vurğulayıb.
Bakının müxtəlif beynəlxalq səviyyəli idman tədbirlərinin keçirildiyi idman mərkəzinə çevrildiyini söyləyən E.Məmmədov deyib: “Beləliklə də, turistlərin Bakıda olduqları müddətdə şəhərin bu üç əsas xüsusiyyətinə (tarixi-memarlıq abidələri ilə zənginliyinə, müasir attraksionların və sərgilərin, eləcə də müasir idman mərkəzlərinin olmasına) valeh olacaqlar. Bütün bu sadalanan obyektlər bir-birinə çox yaxın yerləşdiyindən onlara hətta piyada da çatmaq olur ki, bu da onları daha əlçatan və cəlbedici edir. 2020-ci ildə biz bütövlükdə Avropa çempionatının Bakıda və qonşu ölkələrdə bütöv futbol tarixini yazacağıq. Çünki, biz bütün regionda futbol azarkeşlərinə “Avro-2020”nin həyəcanını və xoş anlarını yaşatmaq istəyirik. Şəhərdə azarkeşlər və turistlər üçün müxtəlif diqqətçəkən tədbirlər keçiriləcək. Biz fan-zonaların aktiv olma müddətinin uzadılmasını planlaşdırırıq və inanırıq ki, bu da insanların ora gəlib həzz almalarına, sonra isə gedib öz komandalarına azarkeşlik etmələrinə şərait yaradacaq”.
Məqalənin sonunda AFFA-nın baş katibi futbol azarkeşlərini 30 gün davam edəcək möhtəşəm “Avro-2020” oyunlarından və oyunlar ərəfəsində keçiriləcək maraqlı əyləncəli tədbirlərdən zövq almağa çağırıb.

Paylaş:

Baxılıb: 1451 dəfə