Vergilər Nazirliyi əmək müqaviləsi bildirişlərinin qeydiyyata alınmasında vergi ödəyicilərinə yardım edir

Bakı:

27 °C

66 %

11 m/s

AZ RU EN

Ana səhifə / İqtisadiyyat / Vergilər Nazirliyi əmək müqaviləsi bildirişlərinin qeydiyyata alınmasında vergi ödəyicilərinə yardım edir

Vergilər Nazirliyi əmək müqaviləsi bildirişlərinin qeydiyyata alınmasında vergi ödəyicilərinə yardım edir

14.08.2014 [09:31]

Məlum olduğu kimi, Əmək Məcəlləsinə edilmiş dəyişikliklərdən sonra bütün işəgötürənlər əmək müqaviləsinin bağlanılması, ona dəyişiklik edilməsi və ya xitam verilməsi ilə bağlı elektron informasiya sistemində əmək müqaviləsi bildirişini qeydiyyatdan keçirməlidirlər. Əmək müqaviləsi bildirişini elektron informasiya sisteminə daxil etmək işəgötürənin vəzifəsi kimi müəyyən edilib.
Nazirlər Kabinetinin müvafiq qərarının tələblərinə əsasən, əmək müqaviləsi bildirişinin elektron informasiya sisteminə daxil edilməsi üçün işəgötürənlərin və ya onların səlahiyyət verdiyi şəxslərin gücləndirilmiş elektron imzası olmalıdır. Əmək müqaviləsi bildirişinin elektron informasiya sisteminə daxil edilməsi üçün “ASAN imza” - mobil elektron imzadan istifadə edilir. “ASAN imza” vasitəsilə işəgötürənlərin səlahiyyətli nümayəndələri tərəfindən əməkdaşlarla bağlanan əmək müqavilələri haqqında məlumatların elektron informasiya sisteminə daxil edilməsi və sonradan bu məlumatların işçilər tərəfindən əldə edilməsi mümkündür.
Bu məqamda xatırlatmaq yerinə düşər ki, ölkəmizdə əmək müqavilələrinin qeydiyyatında elektron sistemin tətbiqi 2014-cü ilin iyulundan başlanıb. Və göstərilən istiqamətdə Vergilər Nazirliyinin üzərinə də müəyyən vəzifələr düşür. Belə ki, Əmək müqavilələrinin elektron informasiya sisteminə daxil edilməsində çətinlik çəkən vergi ödəyiciləri Vergilər Nazirliyinin xidmət mərkəzlərinə müraciət edərək, heç bir ödəniş etmədən lazımi yardımı ala bilərlər.
Yeri gəlmişkən, hazırda Vergilər Nazirliyi İşəgötürənlərə əmək müqaviləsi bildirişinin elektron informasiya sisteminə yalnız gücləndirilmiş elektron imza - o cümlədən ASAN imza vasitəsilə daxil edilməsinin mümkünlüyünün izah edilməsi ilə geniş məlumatlandırma kampaniyası aparır, işəgötürənlər SMS vasitəsi ilə məlumatlandırılır.
Xatırladırıq ki, işəgötürənlər tərəfindən əmək müqaviləsi hüquqi qüvvəyə minmədən fiziki şəxslərin hər hansı işlərin və ya xidmətlərin yerinə yetirilməsinə cəlb edilməsi Vergi Məcəlləsinin 58.10-cu, İnzibati Xətalar Məcəlləsinin 53.1-ci və Cinayət Məcəlləsinin 162-1-ci maddələri ilə müəyyən edilmiş məsuliyyətə səbəb olur. Belə ki, Vergi Məcəlləsinin 58.10-cu maddəsinə əsasən əmək müqaviləsi hüquqi qüvvəyə minmədən işəgötürən tərəfindən fiziki şəxslərin hər hansı işlərin və xidmətlərin yerinə yetirilməsinə cəlb edilməsi yolu ilə onların gəlirlərinin gizlədilməsinə şərait yaradıldığına görə işəgötürənə hər bir belə şəxs üzrə 1000 manat məbləğində maliyyə sanksiyası tətbiq edilir. İnzibati Xətalar Məcəlləsinin 53.1-ci maddəsinə əsasən, işçilərlə əmək müqavilələri bağlamayan fiziki şəxslər 1-3 min manat, vəzifəli şəxslər 3-5 min manat, hüquqi şəxslər isə 20-25 min manat həcmində cərimələnirlər. Əmək müqaviləsi hüquqi qüvvəyə minmədən xeyli sayda (10 nəfər və daha çox) işçilərin hər hansı işlərə yerinə yetirilməsinə cəlb edilməsi isə Cinayət Məcəlləsinin 162-1-ci maddəsinə əsasən cinayət məsuliyyətinə səbəb olur.
Sonda bildirək ki, Vergilər Nazirliyi vergi ödəyicilərini ödənişsiz qaydada əmək müqavilələrinin elektron informasiya sisteminə daxil edilməsi üçün vergi ödəyicilərinə xidmət mərkəzlərinə müraciət etməyə dəvət edir.
NADİR

Paylaş:

Baxılıb: 1395 dəfə