Heydər Əliyev Beynəlxalq Aeroportunda yeni hava hərəkətini idarəetmə qülləsi açılıb

Bakı:

0 °C

80 %

9 m/s

Əlaqə

AZ RU EN

Ana səhifə / İqtisadiyyat / Heydər Əliyev Beynəlxalq Aeroportunda yeni hava hərəkətini idarəetmə qülləsi açılıb

Heydər Əliyev Beynəlxalq Aeroportunda yeni hava hərəkətini idarəetmə qülləsi açılıb

10.12.2015 [10:11]

Dekabrın 9-da Heydər Əliyev Beynəlxalq Aeroportunda müasir tipli ikinci hava hərəkətini idarəetmə (HHİ) qülləsinin açılışı olub.
AZƏRTAC xəbər verir ki, hava hərəkətinin idarəsi sahəsində bütün müasir tələblərə cavab verən radiolokatorla uyğunlaşdırılan yeni HHİ qülləsinin Avropada analoqu yoxdur. Qüllə Heydər Əliyev Beynəlxalq Aeroportuna yaxınlaşma zonasında və aeroportun manevr zonalarında hava gəmilərinin daha səmərəli idarə olunmasını təmin etməyə imkan verəcək.
Yeni qülləni S rejimini dəstəkləyən RSM970S radiolokatoru ilə Fransanın “Thales” şirkəti təchiz edib.
Qüllənin açılış mərasimində Fransanın Azərbaycandakı səfiri Orelia Buşez, “Thales Eurasia” şirkətinin vitse-prezidenti Roje De və “Azərbaycan Hava Yolları” Qapalı Səhmdar Cəmiyyətinin (AZAL) birinci vitse-prezidenti Sabir İlyasov iştirak ediblər.
AZAL-ın birinci vitse-prezidenti Sabir İlyasov açılış mərasimində bildirib ki, Prezident İlham Əliyevin Azərbaycan aviasiyasına diqqət və qayğısı sayəsində AZAL Azərbaycan Respublikasının hava məkanında uçuşların təhlükəsizliyinin təmin olunması üçün bir sıra uğurlu layihələr həyata keçirib.
AZAL-ın birinci vitse-prezidenti deyib: “İnkişaf etmiş aeronaviqasiya infrastrukturu sayəsində Azərbaycan aeronaviqasiya sahəsində son elmi nailiyyətləri ehtiva edən ən müasir texnologiyaların tətbiqi sahəsində dünya liderlərindən birinə çevrilib. Bu da uçuşların təhlükəsizliyinin ICAO-nun və Hava Naviqasiyasının Təhlükəsizliyi üzrə Avropa Təşkilatının son tələblərinə uyğun yüksək səviyyəsini təmin etməyə imkan verir”.
“Thales Eurasia” şirkətinin vitse-prezidenti Roje De şirkətin HHİ qülləsini radarlarla təmin etməsi barədə məlumat verərək deyib: “Hesab edirəm ki, bu dispetçer nəzarət məntəqəsindən aeroportun görüntüsü çox yaxşıdır. Hər iki terminala gözəl panorama açılır. Biz bu qüllədə quraşdırılan radarın səsini eşidəndə qürur hissi keçirdik. Radarın funksiyası uçuşların təhlükəsizliyini təmin edən tədbirlər görməkdir”.
HHİ qülləsinin açılışını bildirən qırmızı lenti kəsən Fransanın Azərbaycandakı səfiri Orelia Buşez bu hadisəni Azərbaycan-Fransa münasibətlərində çox əlamətdar hal adlandırıb. Diplomat ümidvar olduğunu bildirib ki, bu əməkdaşlıq uzunmüddətli və məhsuldar olacaq.
Azərbaycanın aeronaviqasiya sistemi iri aviadaşıyıcıların diqqət mərkəzindədir. Hazırda “Azəraeronaviqasiya” Hava Hərəkəti İdarəsi ildə 80 mindən çox tranzit uçuşuna və təqribən 40 min uçma və enməyə xidmət edir.

Paylaş:

Baxılıb: 1018 dəfə