Onlar Azərbaycana etibar edirlər

Bakı:

23 °C

81 %

9 m/s

Əlaqə

AZ RU EN

Ana səhifə / İqtisadiyyat / Onlar Azərbaycana etibar edirlər

Onlar Azərbaycana etibar edirlər

05.04.2022 [10:13]

AİB 36 milyard dollar təklif edir

Mübariz ABDULLAYEV

Azərbaycanda beynəlxalq maliyyə qurumlarının və xarici şirkətlərin investisiyaları hesabına reallaşdırılan layihələrin sayı atmaqdadır. Belə layihələrdən biri də Birləşmiş Ərəb Əmirliklərinin “Masdar” şirkəti tərəfindən respublikamızda inşa ediləcək Qaradağ Günəş Elektrik Stansiyasıdır. Prezident İlham Əliyevin iştirakı ilə mart ayının 15-də təməli qoyulan GES-in tikintisi layihənin maliyyə təminatı da öz həllini tapmaq üzrədir. Belə ki, Asiya İnkişaf Bankı ölkəmizdə layihənin həyata keçirilməsi məqsədi ilə yaradılmış “Masdar Azerbaijan Energy” MMC-yə 35,7 mln. ABŞ dolları həcmində üstün hüquqa malik kredit təklif edir.

Ölkənin yüksək investisiya cəlbediciliyi

Nüfuzlu maliyyə qurumunun növbəti dəfə Azərbaycanda reallaşdırılan irimiqyaslı layihəyə investisiya yönəltmək təklifi ilə çıxış etməsi ölkəmizin reallıqları ilə bağlıdır. Azərbaycanda ölkənin investisiya cəlbediciliyinin artırılmasını hədəfləyən məqsədyönlü siyasət həyata keçirilir. Sərmayələrin qorunması məqsədilə yaradılan mükəmməl qanunvericilik bazası, investisiya təşviqi mexanizminin işə salınması, eləcə də daxili sabitlik, iqtidar-xalq həmrəyliyi, yüksək səviyyəli infrastruktur, Şimal-Cənub, Şərq-Qərb kimi əlverişli tranzit marşrutları Azərbaycana investorların inamını artıran amillər qismində çıxış edir. Üç onilliyi əhatə edən qısa müstəqillik tarixində müxtəlif mənbələrdən 300 milyard dollaradək sərmayələr yönəldilməsi respublikamızda investisiya iqliminin kifayət qədər cəlbedici olduğunu əyani şəkildə təsdiqləyir. Daxili və xarici mənbələrdən milli iqtisadiyyatımıza investisiya qoyuluşunun əhatə dairəsi də kifayət qədər genişdir. Bura həm neft sənayesi, həm də qeyri-neft sektoru aiddir.

Elektrik enerjisi sektoruna yönəldilən sərmayələr

Respublikamızda fəal şəkildə sərmayələr yönəldilən istiqamətlərdən biri də enerji sektorudur. Son 18 ildə Azərbaycan Prezident İlham Əliyevin qətiyyətli siyasi iradəsi və böyük həcmlərdə dövlət investisiya qoyuluşu sayəsində özünün generasiya güclərini əhəmiyyətli dərəcədə artırıb və enerji idxal edən ölkədən onu ixrac edən ölkəyə çevrilib.

Ölkəmizin generasiya güclərinin artırılmasını hədəfləyən siyasəti ardıcıl səciyyə daşıyır. Bunun təsdiqi üçün təkcə cari ilin statistikasına nəzər salmaq kifayətdir. Yanvar ayında yenə də Səudiyyə Ərəbistanını təmsil edən “ACWA Power” şirkəti ilə 240 meqavat gücündə Külək Elektrik Stansiyasının təməli qoyulub. Fevral ayında “Azərenerji” tərəfindən inşa edilmiş 385 meqavat gücündə elektrik stansiyası istifadəyə verilib.

Ötən ay təməli qoyulan Qaradağ Günəş Elektrik Stansiyasının layihə gücü 230 meqavata bərabərdir. AİB-nın bəhs olunan investisiya təklifi bankın 2030-cu il Strategiyasına aid üç əməliyyat prioritetini dəstəkləyir. Bunlar iqlim dəyişikliyi ilə mübarizə, iqlim və fəlakətlərə davamlılığın yaradılması və ekoloji dayanıqlılığın yaxşılaşdırılması prioritetləridir. Layihə, eyni zamanda, qeyri-neft özəl sektorunun inkişafını dəstəkləməklə və maliyyəyə çıxışı yaxşılaşdırmaqla Azərbaycanın neft ixracından asılılığını azaltmağa və iqtisadi dayanıqlığı yaxşılaşdırmağa kömək etmək üçün AİB-in 2019-2023-cü illər üzrə ölkə tərəfdaşlığı strategiyasına töhfə verir.

Paylaş:

Baxılıb: 1280 dəfə