Qarabağa həyat verəcək su layihələri

Bakı:

19 °C

68 %

10 m/s

Əlaqə

AZ RU EN

Ana səhifə / İqtisadiyyat / Qarabağa həyat verəcək su layihələri

Qarabağa həyat verəcək su layihələri

23.04.2022 [09:07]

Böyük Qayıdışın tərkib hissəsi kimi

Mübariz ABDULLAYEV

Azərbaycan 44 günlük Vətən müharibəsi başa çatdıqdan dərhal sonra işğaldan azad olunmuş ərazilərdə genişmiqyaslı bərpa-quruculuq işlərinə başladı. Mənfur düşmənin üç onilliyi əhatə edən işğal dövründə ağlasığmaz vandalizm əməlləri törətdiyi bu ərazilərdə indi hər şeyi yenidən qurmaq lazımdır. Güclü dövlət olan Azərbaycan təxminən 11min kvadratkilometrə bərabər olan ərazilərdə bərpa və infrastruktur quruculuğu işlərini heç kimdən kömək istəmədən öz imkanları hesabına həyata keçirir. 2021-ci ildə sözügedən ərazilərdə nəzərdə tutulan layihələrin icrasına 2,2 milyard manat vəsait ayrıldı. Cari ildə də işğaldan azad edilmiş ərazilərin bərpasına dövlət büdcəsindən eyni həcmdə vəsait ayrılacaq.

Su ehtiyatlarından səmərəli istifadə olunması hədəfi

İşğaldan azad edilmiş ərazilərdə bərpa işləri müxtəlif istiqamətlərdə aparılır. O cümlədən Qarabağın bol su ehtiyatlarından səmərəli istifadə edilməsi də ölkəmizin hədəfləri sırasında yer alır. İşğaldan azad edilmiş ərazilər su ehtiyatları ilə kifayət qədər zəngindir. Burada Tərtər, Həkəri, Bazarçay, Bərgüşad, Lev, Zabux, Tutqun, Turqay, Bəsitçay, Qarqarçay, Quruçay, Köndələnçay, Oxçuçay kimi bol su mənbələri var.

Qeyd edək ki, mənfur düşmən işğal dövründə onların nəzarətində olan ərazilərimizdəki su ehtiyatlarından bizə qarşı təzyiq vasitəsi kimi istifadə edirdilər. Belə ki, onlar yay aylarında suya ehtiyac artanda bütün bəndləri bağlayırdılar. Beləliklə də, keçmiş təmas xəttinə yaxın ərazilərdə əkin-biçinlə məşğul olmaq qeyri-mümkün idi. Qış aylarında isə ermənilər başqa bir hiyləyə əl atırdılar - bəndləri açaraq torpaqlarımızı su altında qoyurdular. Bununla bağlı beynəlxalq təşkilatlara müraciətlər ünvanlansa da, bir nəticə vermirdi, hamı seyirçi münasibətdə qalırdı.

44 günlük Vətən müharibəsində qazanılan şanlı Qələbə sayəsində 30 il ərzində düşmənin nəzarətində qalan ərazilərimiz işğaldan azad olundu. İndi həmin ərazilərdəki su mənbələri də bizim nəzarətimizdədir. Bu ehtiyatlardan səmərəli istifadə etməklə ölkəmizdə aqrar sektorun inkişafını sürətləndirmək və ərzaq təhlükəsizliyinin təmin olunmasına yeni töhfələr vermək mümkündür. Təsadüfi deyil ki, işğaldan azad olunmuş ərazilərdəki su anbarlarının gələcək istismarı, hidroehtiyatların ölkənin su təsərrüfatı sisteminə inteqrasiyası da bərpa prosesinin və Böyük Qayıdışın tərkib hissəsi kimi müəyyənləşdirilib.

Mövcud su anbarlarının bərpası, yenilərinin tikintisi

Mövcud su anbarlarının bərpası, yenilərinin tikilməsi sayəsində işğaldan azad olunmuş ərazilərdə və keçmiş təmas xəttinə yaxın bölgələrdə minlərlə hektar torpaq sahələrini əkin dövriyyəsinə cəlb etmək mümkün olacaq. Bu barədə Prezident İlham Əliyevə aprelin 21-də Füzuli rayonunda Köndələnçay su anbarlarında aparılacaq təmir-bərpa işləri ilə tanış olarkən məlumat verilib. Bildirilib ki, mövcud su anbarlarının qəsdən məhv edilməsi Ermənistanın Qarabağda aqrar sahədə dağıdıcı fəaliyyətinin nəticəsidir. Köndələnçay su anbarı buna bariz misaldır. Ümumi sistemə daxil olan “Köndələnçay-1”, “Köndələnçay-2” və “Aşağı Köndələnçay” su anbarlarının bərpası ilə Füzuli rayonu ərazisində 6200 hektar əkin sahəsinin suvarılması mümkün olacaq.

Hazırda işğaldan azad edilmiş ərazilərdəki digər su anbarlarında da bərpa işləri həyata keçirilir. Bütövlükdə, sözügedən ərazilərdə 9 su anbarı tikilir və yaxud əsaslı şəkildə bərpa olunur. Su layihələrinin reallaşdırılması Qarabağa həyat verəcək. Bu layihələr, eyni zamanda, keçmiş məcburi köçkünlərin həyat şəraitinin yaxşılaşdırılmasına, məşğulluğun artırılmasına və ölkədə ərzaq təhlükəsizliyinin təmin olunmasına hesablanıb.

Paylaş:

Baxılıb: 757 dəfə