5 DOST, 5 beynəlxalq mükafat

Bakı:

17°C

82%

7m/s

Əlaqə

AZ RU EN

Ana səhifə / İqtisadiyyat / 5 DOST, 5 beynəlxalq mükafat

5 DOST, 5 beynəlxalq mükafat

12.05.2022 [10:30]

Mübariz

Müxtəlif dövlət xidmətlərinə əlçatanlığın təmin edilməsi və vətəndaş-məmur münasibətlərində şəffaflığın artırılması Azərbaycanda həyata keçirilən siyasətin əsas istiqamətlərindən birini təşkil edir. Bu məqsədlə son illərdə ölkəmizdə ardıcıl islahatlar həyata keçirilib və bir sıra institusional təsisatlar yaradılıb. Prezident İlham Əliyevin 9 avqust 2018-ci il tarixli Fərmanı ilə Əmək və Əhalinin Sosial Müdafiəsi Nazirliyinin tabeliyində 2019-cu ilin may ayından fəaliyyətə başlayan DOST Agentliyi (Dayanıqlı və Operativ Sosial Təminat) belə müasir təsisatlara yaxşı nümunədir. İndiyədək qurumun 5 DOST mərkəzi yaradılıb. 2025-ci ilə qədər ölkəmizdə DOST mərkəzlərinin sayının 17-yə çatdırılması, 55 DOST filialının da yaradılması, beləliklə də, DOST xidmətlərinin əhatə dairəsinin bütün ölkə üzrə genişləndirilməsi nəzərdə tutulub.

98 faizi ötən vətəndaş məmnunluğu

Azərbaycanın Birinci vitse-prezidenti Mehriban xanım Əliyevanın təşəbbüsü ilə həyata vəsiqə alan DOST konsepsiyasının təməlində vətəndaş məmnunluğunun təmin edilməsi amili dayanır. Konsepsiya əhaliyə müxtəlif sosial xidmətlər göstərən dövlət təsisatları ilə vətəndaşlar arasında bütün baryerlərin aradan qaldırılmasına, onlara qurumun adında da ifadə edildiyi kimi dostcasına xidmət göstərilməsinə, rəqəmsallaşma yolu ilə şəffaflığın artırılmasına hesablanıb. Ötən illərin təcrübəsinə, qazanılan uğurlara istinadən deyə bilərik ki, DOST Agentliyi və indiyədək yaradılan 5 eyniadlı mərkəz bu qurumlara həvalə edilən missiyanı inamla həyata keçirir. DOST mərkəzləri ötən qısa müddətdə insanların həqiqi, etibar və güvən bəslənilən dostuna çevrilməyi bacarıb.

Xoş mərama əsaslanan fəaliyyət həyata keçirən DOST mərkəzlərində göstərilən xidmətlərin əhatə dairəsi getdikcə genişlənir. Hazırda bu mərkəzlərdə əmək və məşğulluq, sosial təminat, ünvanlı dövlət sosial yardımı, əlillik və reabilitasiya, pensiya, sosial sığorta və s. üzrə 154 növ xidmətin “bir pəncərə”dən operativ, şəffaf və nəzakətli, vətəndaş rahatlığı prinsipi əsasında göstərilməsi təmin edilir. DOST mərkəzlərinə müraciət edən vətəndaşlara müvafiq xidmətlərin göstərilməsinin orta müddəti 2019-cu il üçün 10 dəqiqə 5 saniyə, 2020-ci ildə 9 dəqiqə 40 saniyə olduğu halda, 2021-ci ildə 8 dəqiqə 31 saniyə təşkil edib. Hazırda DOST mərkəzlərində vətəndaşların növbədə orta gözləmə müddəti cəmi 2 dəqiqə 57 saniyəyə bərabərdir. Məhz belə çevik və nəzakətli xidmətə görədir ki, vətəndaşlar bu sosial xidmət qurumlarına məmnuniyyətlə üz tuturlar. Qeyd edək ki, sözügedən mərkəzlərdə ötən qısa dövr ərzində 700 mindən çox vətəndaşa xidmət göstərilib. Verilən məlumatlara görə, 5 DOST mərkəzində göstərilən xidmətlərdən vətəndaşların məmnunluq səviyyəsi 98 faizin üzərindədir.

Könüllü DOST hər zaman yanınızdadır

DOST Agentliyində “Könüllü klubları” layihəsinin də icrasına başlanıb. Layihə gənclər arasında böyük maraqla qarşılanıb. Bu marağın nəticəsi olaraq sözügedən proqrama qatılmaq üçün böyük əksəriyyətini gənclər təşkil edən 50 minə yaxın şəxs müraciət ünvanlayıb. Onlar arasında bir sıra kriteriyalar üzrə seçim aparılıb və ötən dövrdə DOST mərkəzlərinə 1700-ə yaxın gənc könüllü cəlb olunub. Yuxarıda sadalanan uğurların qazanılmasında onların da böyük zəhmət payı var. Belə demək mümkündürsə, könüllülər DOST mərkəzlərində hər zaman hər kəsin yanındadırlar.

Könüllülər mərkəzlərdə vətəndaşların qarşılanmasında, xidmət pəncərələrinə yönləndirilməsində, vətəndaş axınının, növbələrin idarə edilməsində köməklik göstərirlər. Onlar, həmçinin vətəndaşların məlumatlandırılmasında, xidmətlər üzrə sənədlərin siyahısı ilə tanış olmalarında, müxtəlif anket, forma və s. doldurulmasında yardımçı olur, mərkəzlərə gələn əlilliyi olan şəxslərə diqqət və qayğı göstərir, rəy sorğularının keçirilməsinə qatılırlar.

Beynəlxalq səviyyədə yüksək qiymət

Azərbaycanın növbəti intellektual brendinə çevrilən DOST mərkəzlərinin fəaliyyəti bütün dünyada uğurlu model kimi qarşılanır. Elə bu günlərdə DOST Agentliyinin Beynəlxalq Sosial Təminat Assosiasiyasının (BSTA) “Avropa üzrə Yaxşı Təcrübə Mükafatı - 2022” müsabiqəsinə təqdim etdiyi üç layihənin hər biri yüksək dəyərləndirilib. Belə ki, agentliyin “Vətəndaş məmnunluğu monitorinq sistemi”, “DOST Agentliyi ləyaqət və bərabər hüquqlar naminə” və “DOST: 65 yaşdan yuxarı şəxslərin sosial müdafiəsi” adlı layihələri müsabiqənin Müstəqil Beynəlxalq Münsiflər Heyətinin qərarı ilə Fəxri Diplomlara və Attestata layiq görülüb.

BSTA-nın Tallin şəhərində (Estoniya) mayın 2-də keçirilmiş “Avropa Regional Sosial Təminat Forumu”nda hər üç mükafat təqdim olunub. Forumda agentliyin idarə heyətinin sədri Fərid Məmmədov dəvətli ekspert statusunda “DOST Agentliyi ləyaqətli həyat naminə: 65 yaşdan yuxarı şəxslər üçün sosial müdafiənin təminati” adlı təqdimatla çıxış edib. Təqdimatda ölkəmizdə 65 yaşdan yuxarı şəxslər üçün sosial xidmətlərin qurulması, COV?D-19 pandemiyası dövründə qarşıya çıxan çətinliklərin həllinə yönəlmiş innovativ yanaşmalar, görülən tədbirlər, BMT-nin Əhali Fondu ilə birgə icra olunmuş “Fəal yaşlanma” layihəsi barədə məlumat verilib.

Xatırladaq ki, DOST Agentliyi bundan əvvəl daha bir nüfuzlu mükafatı - Avropa Sosial Şəbəkəsinin Avropa Sosial Xidmətlər Mükafatını qazanıb. 2022-ci ilin fevral ayında isə qurum Beynəlxalq Pensiya və Sosial Fondlar Assosiasiyasının Fəxri Fərmanına layiq görülüb. Beləliklə, 2022-ci ilin ötən dövründə Azərbaycan brendi olan “DOST” 5 beynəlxalq mükafata layiq görülüb.

Paylaş:

Baxılıb: 1393 dəfə