Azərbaycan-Misir: Əməkdaşlıqla bağlı mövqelər üst-üstə düşür

Bakı:

16 °C

88 %

5 m/s

Əlaqə

AZ RU EN

Ana səhifə / İqtisadiyyat / Azərbaycan-Misir: Əməkdaşlıqla bağlı mövqelər üst-üstə düşür

Azərbaycan-Misir: Əməkdaşlıqla bağlı mövqelər üst-üstə düşür

31.01.2023 [10:11]

MÜBARİZ

Multiregional xarici siyasət kursu həyata keçirən Azərbaycanın Afrika qitəsinin qapısı sayılan Misirlə əlaqələri yüksələn xətlə inkişaf edir. Bunu Misir Ərəb Respublikasının Prezidenti Əbdülfəttah Əs-Sisinin bu günlərdə ölkəmizə baş tutan uğurlu səfəri bir daha təsdiqləyir. Səfər çərçivəsində keçirilən tədbirlərdə ikitərəfli əlaqələrin inkişafından məmnunluq ifadə olunub. O cümlədən Azərbaycan və Misir prezidentləri gələcək əməkdaşlıqla bağlı vahid mövqeyə gəldiklərini diqqətə çatdırıblar. “Misir-Azərbaycan əlaqələrinin gələcək inkişafı ilə bağlı bizim fikir ayrılığımız yoxdur. Bir çox sahələrdə əməkdaşlıq üçün çox gözəl imkanlar var. Əminəm, əldə olunmuş razılaşmaları biz səfərdən sonra icra edəcəyik”, - deyə Prezident İlham Əliyev Misir Prezidenti ilə geniş tərkibdə görüşdə bildirib.

Siyasi əlaqələrin 30 ili

Səfər çərçivəsində baş tutan tədbirlərdə Azərbaycan və Misir prezidentlərinin ifadə etdikləri fikirlərdən də göründüyü kimi, hər iki tərəf qarşılıqlı əməkdaşlığın dərinləşməsinə güclü siyasi iradə nümayiş etdirir. Ötən il Azərbaycanla Misir arasında siyasi-diplomatik münasibətlərin qurulmasının 30 ili tamam olub. 1993-cü ildən MƏR-in Bakıdakı Səfirliyi, 1994-cü ilin yanvar ayından isə Azərbaycan Respublikasının Qahirədəki Səfirliyi fəaliyyət göstərir.

Azərbaycan Respublikasının Milli Məclisində Azərbaycan-Misir parlamentlərarası əlaqələr üzrə işçi qrupu yaradılıb. 3 oktyabr 2002-ci il tarixindən Azərbaycan Respublikası ilə Misir Ərəb Respublikası arasında Hökumətlərarası iqtisadi, texniki və elmi əməkdaşlıq üzrə Müştərək Komissiya fəaliyyət göstərir. Komissiya müntəzəm qaydada toplaşır və əməkdaşlıq istiqamətlərini müəyyənləşdirir.

Beynəlxalq təşkilatlar çərçivəsində sıx əməkdaşlıq iki ölkə arasında bərqərar olan xoş münasibətləri təzahür etdirir. Prezident İlham Əliyev bu istiqamətdə fəaliyyətin gələcəkdə də davam etdiriləcəyini bildirərək vurğulayıb: “Biz bundan sonra da beynəlxalq təşkilatlarda birgə fəaliyyət göstərəcəyik, bir-birimizi bundan sonra da dəstəkləyəcəyik, necə ki, bu günə qədər iştirak etdiyimiz beynəlxalq təşkilatlarda - istər BMT olsun, Qoşulmama Hərəkatı olsun, İslam Əməkdaşlıq Təşkilatı olsun, bu təşkilatlar çərçivəsində qarşılıqlı dəstək göstəririk”.

İqtisadi əməkdaşlıqda yaxşı perspektivlər

İndiyədək Azərbaycanla Misir arasında 50 sənəd imzalanıb. Həmin sənədlər müxtəlif sahələrdə, o cümlədən də iqtisadi əməkdaşlıq üçün möhkəm hüquqi əsaslar yaradır. Misir Prezidentinin ölkəmizə səfəri çərçivəsində daha bir neçə sənəd imzalanıb. Bunlar aşağıdakılardır:

1. “Azərbaycan Respublikasının Ekologiya və Təbii Sərvətlər Nazirliyi ilə Misir Ərəb Respublikasının Su Ehtiyatları və Suvarma Nazirliyi arasında su ehtiyatlarının idarə edilməsi sahəsində əməkdaşlıq haqqında Anlaşma Memorandumu”. Sənədi Azərbaycanın xarici işlər naziri Ceyhun Bayramov və Misirin xarici işlər naziri Sameh Həssən Şukri imzalayıblar.

2. “Azərbaycan Respublikasının Mədəniyyət Nazirliyi ilə Misir Ərəb Respublikasının Mədəniyyət Nazirliyi arasında mədəniyyət sahəsində əməkdaşlıq haqqında Anlaşma Memorandumu”. Sənədi Azərbaycanın xarici işlər naziri Ceyhun Bayramov və Misirin xarici işlər naziri Sameh Həssən Şukri imzalayıblar.

3. “Azərbaycan Respublikasının İqtisadiyyat Nazirliyi ilə Misir Ərəb Respublikasının Ticarət və Sənaye Nazirliyi arasında əməkdaşlıq haqqında Anlaşma Memorandumu”. Sənədi Azərbaycanın iqtisadiyyat naziri Mikayıl Cabbarov və Misirin planlaşdırma və iqtisadi inkişaf naziri xanım Hala Helmi Elsaid imzalayıblar.

Hazırda Azərbaycanda Misir investisiyalı 51 şirkət fəaliyyət göstərir. Eyni zamanda, Azərbaycanın iş adamlarının dost ölkədə bir sıra sahələrə investisiyalar yönəltmək imkanları var. Prezident İlham Əliyev mətbuata verdiyi Bəyanatında diqqətə çatdırıb ki, artıq iqtisadi sahədə əməkdaşlıq istiqamətləri də müəyyənləşdirilib. “Ötən il Azərbaycanda Hökumətlərarası Müştərək Komissiyanın iclası keçirilmişdi və komissiyanın növbəti iclası ərəfəsində bu gün hörmətli qonağımla əldə edilmiş razılaşmaları biz həyata keçirməliyik ki, növbəti iclasda artıq konkret addımlar atılsın. Sahələr də müəyyən edilmişdir - əczaçılıq, sənaye sahələri, alüminium sənayesi, energetika, neft sənayesi, o cümlədən bərpaolunan energetika sahəsi. Burada da böyük imkanlar var”, - deyə dövlətimizin başçısı vurğulayıb.

Paylaş:

Baxılıb: 576 dəfə