117 ailənin yurd həsrəti bitdi!

Bakı:

28 °C

44 %

5 m/s

Əlaqə

AZ RU EN

Ana səhifə / MEDİA / 117 ailənin yurd həsrəti bitdi!

117 ailənin yurd həsrəti bitdi!

08.10.2024 [08:57]

Cəbrayıl sakinlərinə qucaq açdı...

30 ildən çox Vətən həsrəti ilə yaşamış keçmiş məcburi köçkünlərimizin köç karvanları bir-birinin ardınca əzəli və əbədi torpaqlarımıza istiqamət götürür. Sentyabrın 26-da 44 günlük Vətən müharibəsinin 4-cü ildönümü ərəfəsində həsrətin bitdiyi ünvanlar sırasına Cəbrayıl da qoşuldu. Beləliklə, işğaldan azad edilmiş ərazilərə Böyük Qayıdışa dair I Dövlət Proqramı çərçivəsində yenidən qurulan Cəbrayıl ilk sakinlərini qarşıladı.

İlkin olaraq 36 ailədən ibarət 117 nəfərin ən ülvi arzuları reallığa çevrildi. Xalqımız bayram əhval-ruhiyyəsi yaradan yeni qayıdış müjdəsinə sevindi. Sentyabrın 28-də daha bir köç karvanı Bakı şəhərinin Qaradağ rayonundan Cəbrayıla yola düşüb. Bu dəfə 41 ailə (124 nəfər) köçürülüb. Sentyabrın 30-da isə növbəti köç karvanı ilə 40 ailə (123 nəfər) Cəbrayıl şəhərinə yola salınıb.

Cəbrayıl sakinlərinin hazırkı sayı 364-dür...

Beləliklə, indiyədək Cəbrayıl şəhərində 117 ailənin (364 nəfər) daimi məskunlaşması təmin edilib. Sakinlər şəhərdə yeni inşa olunan yaşayış kompleksində yerləşiblər. Qeyd edək ki, 2021-ci il oktyabrın 4-də Prezident İlham Əliyev Cəbrayıl şəhərinin bərpasının təməl daşını qoyub.

Doğma yurda qayıdan Cəbrayıl sakinləri hərtərəfli dövlət qayğısı ilə əhatə olunduqlarına görə Prezident İlham Əliyevə və Birinci vitse-prezident Mehriban Əliyevaya təşəkkür ediblər. Onlar, həmçinin torpaqlarımızı işğaldan azad edən rəşadətli Azərbaycan Ordusuna, qəhrəman əsgər və zabitlərimizə minnətdarlıqlarını bildirib, bu yolda canlarından keçən şəhidlərimizə rəhmət, ailələrinə səbir diləyiblər.

1993-cü ildə işğal olunan Cəbrayılın Zəfər tariximizdə xüsusi yeri var. Böyük qayıdışımız 2016-cı ilin Aprel döyüşlərində Cəbrayılın Cocuq Mərcanlı kəndinin azad olunması ilə başlayıb. İkinci Qarabağ müharibəsindəki ilk uğurlarımızdan biri məhz Cəbrayıl ilə bağlıdır. Döyüşlərin birinci həftəsində şəhərin azad olunması Vətən müharibəsinin mühüm hadisəsinə çevrildi. Cəbrayıl şəhəri azadlığına qovuşduqdan sonra məlum oldu ki, şəhərdən əsər-əlamət qalmayıb, bütün binalar yerlə yeksan edilib.

Cəbrayıl yeni dövrə qədəm qoyur

Mövzu barədə fikirlərini “Yeni Azərbaycan”a bölüşən Milli Məclisin Cəbrayıl-Qubadlı seçki dairəsi üzrə deputatı Ceyhun Məmmədov bildirib ki, artıq Cəbrayıl sakinlərinin də sevinclərinin həddi-hüdudu yoxdur. Millət vəkili qeyd edib ki, Cəbrayıl yeni bir dövrə, yeni mərhələyə qədəm qoyur: “Cəbrayılda uzun müddətdir bərpa-quruculuq işləri həyata keçirilirdi. Artıq binaların bir hissəsi hazırdır. Bir sıra binada hələ də işlər gedir. Məlumdur ki, sentyabrın 26-da Cəbrayıla birinci köç baş tutdu. Çox sevindiricidir ki, bu gün Cəbrayıllılar öz yurdlarında yaşayırlar. Biz bunu səbirsizliklə gözləyirdik. İlkin mərhələdə sakinlərin bir hissəsinin köçürülməsi qeydə alınıb, 117 nəfər doğma torpağına qovuşdu. Cəbrayıla üçüncü köçən sonra isə sakinlərin sayı 364 nəfər oldu. Bu, yalnız cəbrayıllıların deyil, bütün Azərbaycan xalqının sevincinə və qürur hissi yaşamasına səbəbdir”.

Hər bir şərait yaradılıb

Deputatın sözlərinə görə, bu gün Cəbrayılda bir sıra müəssisələr var: “Araz Vadisi İqtisadi Zonası” bir müddətdir ki, qurulur. Orada xeyli işlər görülüb. Həmçinin Cəbrayılda xəstəxana da tikilir. Bu gün həmin stukturlar öz fəaliyyətini uğurla davam etdirirlər. Dövlət qurumlarının fəaliyyəti üçün şərait yaradılıb. Hesab edirəm ki, Cəbrayılda əhalinin məskunlaşması üçün şərait və imkan var. Ən qısa vaxtda bütün Cəbrayıl sakinləri orada yaşayıb, məskunlaşacaqlar. Biz də bunun şahidi olacağıq”.

Cəbrayılın kəndlərinə də köç olacaq!

C.Məmmədov qeyd edib ki, bu gün təkcə Cəbrayıl yox, ümumiyyətlə işğaldan azad olunmuş bütün torpaqlarımıza qayıdış bizim üçün çox sevindiricidir: “Sözün həqiqi mənasında bu günü çox gözləmişik. Bunun davamı gələcək, təkcə Cəbrayılın özünə yox, kəndlərə də köç olacaq”.

Yeganə BAYRAMOVA

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “İşğaldan azad olunmuş ərazilərə “Böyük Qayıdış” istiqaməti üzrə hazırlanmışdır

Paylaş:

Baxılıb: 791 dəfə