Uğurlu enerji siyasəti...

Bakı:

21 °C

78 %

4 m/s

Əlaqə

AZ RU EN

Ana səhifə / MEDİA / Uğurlu enerji siyasəti...

Uğurlu enerji siyasəti...

15.02.2022 [10:30]

Ölkəmizin beynəlxalq müstəvidə nüfuzunu artıran amillərdən biridir

Nardar BAYRAMLI

Avropa İttifaqının (Aİ) enerjiyə, xüsusilə təbii qaza olan tələbatı gündən-günə artmaqdadır. Avropa Komissiyasının statistik göstəricilərinə görə, 2005-ci illə müqayisədə 2030-cu ilədək olan dövrdə Avropanın təbii qaza olan tələbatı 24 faiz artacaq. Bundan başqa, Yaponiyanın Fukuşima prefekturasında yerləşən “Fukuşima-1” AES-də baş verən qəza da Avropa ölkələrini atom enerjisindən imtina etməyə və daha təhlükəsiz enerji növlərinə keçid etmək məcburiyyəti qarşısında qoyur. Son illər Ukrayna ilə Rusiya arasında artan siyasi gərginlik Avropanın enerji təhlükəsizliyinə daha böyük təhdid yaratmaqla, Azərbaycanın “Köhnə qitə” üçün etibarlı tərəfdaş kimi əhəmiyyətini artırır. Belə ki, Trans-Adriatik boru kəmərinin (TAP) - Cənub Qaz Dəhlizinin Avropa qolunun işə düşməsindən sonra Azərbaycan qitənin enerji təhlükəsizliyində daha mühüm rol oynayır.

Avropanın Azərbaycan qazına olan ehtiyacının artması İtaliya rəsmiləri tərəfindən də etiraf edilib. Belə ki, bu günlərdə İtaliya Xarici İşlər və Beynəlxalq Əməkdaşlıq Nazirliyinin dövlət katibi Manlio Di Stefano “La Repubblica” qəzetinə müsahibəsində deyib ki, Trans-Adriatik (TAP) boru kəməri ilə İtaliyaya idxal olunan təbii qaz həcmlərini illik 10 milyard kubmetrə çatdırmaq istəyirik: “TAP boru kəməri İtaliyaya enerji qiymətlərindəki artımların zərbəsini yumşaltmağa imkan verdi. TAP layihəsi haqqında danışmağa başlananda hələ ekoloji transformasiyada söhbət getmirdi. Bu gün təbii qaz ekoloji keçidi təmin edən əsas elementdir. Bugünkü vəziyyət məni bu fikirləri deməyə vadar edir - xoşbəxtlikdən TAP var”. Manlio Di Stefano vurğulayıb ki, biz TAP boru kəməri ilə təbii qaz tədarükünü ildə 7 milyard kubmetrdən 10 milyard kubmetrə çatdırmağı hədəfləyirik. Gələcək perspektivdə TAP boru kəmərinin ötürücülük qabiliyyətinin artırılması nəzərdə tutulur.

Qeyd edək ki, TAP kommersiya qaz nəqlinə 2020-ci ilin dekabr ayında başlayıb. Bu vaxtadək boru kəməri ilə Avropaya 8 milyard kubmetrdən çox Azərbaycan təbii qazı nəql edilib və bu həcmin 7 milyard kubmetri İtaliyaya çatdırılıb.

Ümumiyyətlə, enerji faktoru Azərbaycanın beynəlxalq nüfuzuna necə təsir edir? Mövzu ilə bağlı qəzetimizə açıqlama verən Milli Məclisin deputatı, YAP İdarə Heyətinin üzvü Cavid Osmanov bildirib ki, Cənub Qaz Dəhlizinin sonuncu seqmentini təşkil edən TAP Avropa üçün strateji və iqtisadi əhəmiyyət daşıyır, yeni təbii qaz mənbəyinə etibarlı çıxışı təmin edir. TAP Avropanın enerji təhlükəsizliyinin möhkəmlənməsində, təchizatın diversifikasiyasında, həmçinin karbon emissiyasının azaldılmasında mühüm rol oynayır.

Millət vəkilinin sözlərinə görə, təməli ümummilli lider Heydər Əliyev tərəfindən qoyulan ölkəmizin enerji siyasəti “Əsrin müqaviləsi” ilə dünyanın ilk neft hasilatçılarından olan Azərbaycanı beynəlxalq enerji bazarlarında birbaşa iştirakçı dövlətə çevirib: “Bu gün isə Azərbaycan uğurlu enerji siyasəti nəticəsində təkcə neft və qaz ixracatçısı yox, eyni zamanda, regionda elektrik enerjisi ixracatçısına çevrilir. Xüsusilə son dövrlərdə ölkəmizdə bərpaolunan enerji növlərinin istehsalı istiqamətində böyük işlər görülür. Bərpaolunan enerji mənbələrinə, əsasən də günəş, külək və su enerjisi istehsalı sahələrində beynəlxalq şirkətlərin Azərbaycana böyük marağı var. Həmçinin Xəzər dənizinin bərpaolunan enerji istehsalı potensialı xarici investorları cəlb edir. Ölkəmiz, eyni zamanda, Türkiyə, Rusiya, Gürcüstan və İrana elektrik enerjisi ixrac edir. Bundan əlavə, Davos Dünya İqtisadi Forumunun qiymətləndirməsinə əsasən, enerjiyə əlçatanlıq reytinqində Azərbaycan dünyada ikinci yerdə qərarlaşır. Bütün bu uğurların fonunda ölkəmizdə inkişaf etməkdə olan “yaşıl enerji” strategiyasını aparılan planlı layihələrin nəticəsi kimi dəyərləndirmək olar. “Dünyada baş verən maliyyə böhranı və pandemiya dövründə heç bir postsovet ölkəsi Azərbaycan qədər iqtisadi inkişaf göstəricilərinə sahib deyil. Bu gün torpaqlarımızın işğaldan azad edilməsi Azərbaycanın enerji potensialının dünyaya açılması üçün yeni imkanlar yaradır və bu, ölkəmizin gələcək inkişafına müsbət təsirini göstərəcək. Bu amil həm də, ölkəmizin beynəlxalq müstəvidə nüfuzunu əhəmiyyətli dərəcədə artırır”.

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Azərbaycan Respublikasının dünya birliyinə inteqrasiyası, region ölkələri və digər dövlətlərlə, beynəlxalq təşkilatlarla əməkdaşlığının inkişaf etdirilməsi” istiqaməti üzrə hazırlanmışdır

Paylaş:

Baxılıb: 1220 dəfə