Azərbaycan tolerantlıq nümunəsidir

Bakı:

21 °C

78 %

4 m/s

Əlaqə

AZ RU EN

Ana səhifə / MEDİA / Azərbaycan tolerantlıq nümunəsidir

Azərbaycan tolerantlıq nümunəsidir

26.11.2022 [11:00]

Bu, bizim böyük üstünlüyümüzdür

Dünyaya tolerantlıq və dialoq məkanı olaraq nümunə göstərilən Azərbaycanda multikultural dəyərlər yaşamaqda və inkişaf etməkdədir. Yerləşdiyi Cənubi Qafqaz regionunun siyasi-iqtisadi lideri sayılan Azərbaycanda millətlərarası və dinlərarası münasibətlərin inkişaf etdirilməsi də hər zaman yüksək dəyərləndirilir. Ölkəmizdə milli-dini müxtəliflik insanlar arasında fərq yaradan amil kimi deyil, əksinə tolerantlıq, mədəni dialoq mühitinin əsas ünsürləri şəklində çıxış edir və birləşdirici funksiya daşıyır. Bu, 2020-ci ilin Vətən müharibəsində də özünü bariz şəkildə ortaya qoydu. Çoxmillətli ölkə olan Azərbaycanda yaşayan bütün xalqlar bir yumruğa çevrilərək Vətən uğrunda mübarizəyə qoşuldular. Yeri gəlmişkən, Yeni Azərbaycan Partiyasının yaradılmasının 30 illiyi münasibətilə keçirilən tədbirdə çıxış edən ölkə Prezidenti, Yeni Azərbaycan Partiyasının Sədri İlham Əliyev bu məsələyə toxunaraq bildirib ki, Azərbaycanda bütün xalqlar bir ailə kimi yaşayır, bu da Ulu Öndərin siyasəti idi: “Biz bu siyasəti uğurla davam etdirərək, zənginləşdirərək bu gün Azərbaycanda, hesab edirəm ki, dünya miqyasında nadir və təkrarolunmaz mühit yaratdıq. İkinci Qarabağ müharibəsi bunu bir daha göstərdi. Azərbaycanda yaşayan bütün xalqların nümayəndələrinin hamısı bir nəfər kimi ölümə getməyə hazır idi, ölümə gedirdi, azad edilmiş torpaqlarda bayrağımızı qaldırırdı. Bu, bizim böyük üstünlüyümüzdür. Bu istiqamətdə həm ölkə daxilində, həm beynəlxalq müstəvidə bu gün Azərbaycan nümunəvi davranış göstərir. Əsas məsələ odur ki, bütün Azərbaycan xalqı tərəfindən, Azərbaycanda yaşayan bütün etnik qruplar tərəfindən bu siyasət dəstəklənir. Bu, bizim gücümüzü artırır və bundan sonra gələcək nəsillər də məhz belə yaşamalıdır, əminəm ki, belə yaşayacaqlar”.

Vurğulandığı kimi, Azərbaycan tarixən müxtəlif millətlərin dinc, yanaşı yaşadığı, milli və dini tolerantlığın bərqərar olduğu bir ölkədir. Azərbaycanda hər zaman hər bir xalqın və millətin nümayəndəsinə bərabər münasibət göstərilib və göstərilməkdədir. Ölkəmizdə millətlərarası münasibətlərin inkişafı istiqamətində ulu öndər Heydər Əliyevin əsasını qoyduğu siyasi kurs Prezident İlham Əliyev tərəfindən uğurla davam etdirilir. Məhz dövlət başçımızın apardığı uğurlu fəaliyyət Azərbaycanın multikulturalizm və tolerantlıq mərkəzi kimi dünyada şöhrət qazanmasına şərait yaradıb. Beləliklə, Azərbaycan dünyada sivilizasiyaların dialoq mərkəzi kimi tanınıb. Bu fakt noyabrın 24-də Azərbaycan Respublikasının Prezidenti İlham Əliyev Müqəddəs Taxt-Tacın ölkəmizdə yeni təyin olunmuş apostol nunsisi arxiyepiskop Marek Solçinskinin etimadnaməsini qəbul edərkən də vurğulanıb. Prezident İlham Əliyev ölkəmizdə mütəmadi keçirilən mədəniyyətlərarası dialoq forumunun bu sahədə beynəlxalq əməkdaşlığın genişlənməsi işinə xidmət etdiyini bildirib.

Əlbəttə ki, Azərbaycanda tolerantlığın həyat tərzi olmasının xarici qonaqlar tərəfindən də məmnunluqla vurğulanması mühüm amillərdəndir. Məsələn, kanadalı yazıçı, redaktor, “The Times of Israel” nəşrinin şərhçisi Robert Sarner STMEQİ beynəlxalq xeyriyyə fondunun saytına verdiyi açıqlamada Azərbaycana səfərindən danışıb. Azərbaycana səfərin onda çox güclü təsir bağışladığını deyən yazıçı səfər çərçivəsində Qırmızı Qəsəbəyə getdiklərini, orada yaşayan dağ yəhudilərinin ənənələri və mədəniyyəti ilə yaxından tanış olduqlarını deyib. Bildirib ki, müsəlman ölkəsində yəhudilərin mədəni irsini qoruyub saxlamaq mümkün olmuş bir yaşayış məntəqəsinin mövcud olması, həqiqətən, təəccüblüdür: “İndi Azərbaycandakı yəhudilərin həyatı barədə geniş məlumatım var. Təbii ki, bir ölkəni və onun xalqını anlamaq üçün həmin ölkəyə getmək lazımdır. Deyirlər, Azərbaycan bütün dünyada real tolerantlıq nümunəsi kimi tanınıb, amma bunu öz gözləri ilə görüb yəqin etmək daha yaxşıdır. Biz, həqiqətən, yəqin etdik ki, bu gözəl ölkədə müxtəlif xalqların nümayəndələri dostluq və qarşılıqlı anlaşma şəraitində yaşayırlar”.

Kanadalı yazıçı bildirib ki, onu ən çox maraqlandıran bu gün yəhudilərin Azərbaycanda necə yaşaması, onların Azərbaycan cəmiyyətinə, ölkənin ictimai-siyasi həyatına necə inteqrasiya etməsi məsələləri idi: “Bu ölkədə ümumiyyətlə antisemitizm yoxdur. Mən bunu başa düşməyə çətinlik çəkirəm, çünki Azərbaycanda yaşamıram. Dünyanın çox yerində olmuşam, əksər yerlərdə tez-tez antisemitizm barədə eşitməli oluruq. Amma Azərbaycandan söhbət düşəndə hamı deyir ki, bu ölkədə belə bir hal yoxdur. Yəhudi əhalinin dəstəklənməsinə görə mən bu ölkənin hökumətinə minnətdaram”.

Beləliklə, Azərbaycan təcrübəsi əyani şəkildə göstərir ki, müxtəlif mədəniyyətlərə, müxtəlif dinlərə mənsub olan xalqlar mehribanlıq, sülh, əməkdaşlıq şəraitində yaşaya bilərlər. Eyni zamanda qədim tarixə, zəngin mədəniyyət və ənənələrə malik Azərbaycan xalqı bu gün, sözün əsl mənasında, ölkəmizdəki digər xalqlarla möhkəm birlik nümunəsi sərgiləməkdədir. Çoxmillətli xalqın birliyinin aydın təzahürünü özündə əks etdirən xalqımız digər xalqlarla birlikdə özündə yüksək mədəniyyət nümunələrini təcəssüm etdirməkdədir.

Pərviz SADAYOĞLU

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Dini və milli tolerantlıq, millətlərarası münasibətlərin inkişaf etdirilməsi” istiqaməti üzrə hazırlanmışdır

Paylaş:

Baxılıb: 1225 dəfə