Ləzgi dilini niyə öyrəndim?

Bakı:

26 °C

59 %

3 m/s

Əlaqə

AZ RU EN

Ana səhifə / Maraqlı / Ləzgi dilini niyə öyrəndim?

Ləzgi dilini niyə öyrəndim?

24.11.2021 [11:03]

“Qusar üçün darıxıram”

- 20 dərəcədə dərs deməyə gedən müəllim

“Müəllim olmağı özüm seçdim. Sənəd qəbulunun vaxtını ötürdüyüm üçün bank sektorunda işlədim. Lakin sonradan sevimli müəllim peşəsinə qayıtdım. Mən bu peşəyə sevərək gəlmişəm”.

Müsahibimiz Bəxtiyar müəllim belə deyir. Elə bəlkə də müəllimlik peşəsinə sevgisindən idi ki, ölkəmizin şimal sərhədində, qışı sərt keçən Qusarda, hətta mənfi 20 dərəcə şaxtaya baxmayaraq tariximizi şagirdlərə öyrədirdi.

“Şükürov Bəxtiyar Ziyəddin oğlu 1992-ci ildə Bərdə rayonunun Dəmirdağlı kəndində dünyaya gəlmişəm. 2009-cu ildə Sumqayıt Dövlət Universitetinin Tarix fakültəsinə daxil olmuşam. 2014-cü ildə hərbi xidmətdən döndükdən sonra MİQ-ə sənəd qəbuluna gecikdiyim üçün imtahan verə bilmədim və 2017-ci ilə kimi bank sektorunda çalışdım”.

5 ildir ki, müəllim işləyir

2017-ci ildə MİQ imtahanında iştirak etdim, nəticəyə uyğun olaraq Qusar rayonunun mərkəzindən 45 km kənarda yerləşən Yuxarı Kalanxur kənd tam orta məktəbində işə başladım. 2017-2020-ci illərdə həmin məktəbdə tarix müəllimi vəzifəsində işlədim, sonralar isə rayona daha yaxın bir kənddə - Urva kənd tam orta məktəbində işimi davam etdirdim. Builki imtahanda 51 bal toplayaraq Ağcabədi rayonundakı Xocavənd kənd tam orta məktəbinə işə qəbul oldum və hazırda orada fəaliyyətimi davam etdirirəm. Artıq 5-ci ildir ki, müəllim işləyirəm.

Dili öyrəndikdən sonra...

Qusarda yaşayan əhalinin əksəriyyəti ləzgidir. İşlədiyim məktəblərdə tədris də ləzgi dilində idi. Dili bilmədiyimdən çətinliklərim olurdu. Şagirdlərimin isə bəziləri Azərbaycan dilində təmiz danışa bilmirdi. Onlarda fənnimə daha çox maraq yaratmaqdan ötrü ləzgi dilini öyrəndim. Rayon rəhbərliyi, kənd camaatı onların dilini, mədəniyyətini öyrəndiyim üçün mənim bu addımımı çox yüksək dəyərləndirir və mənə hər zaman hörmət bəsləyirdilər. Qusarın rayon təhsil şöbəsinə, müəllim kollektivinə mənə göstərdikləri dəstəyə görə minnətdaram. Ləzgi dilini öyrəndikdən sonra elə bir çətinliyim olmadı. Çətinliyim doğma Bərdəmlə Qusarın arasında yolun uzun olması idi. Ayda bir dəfə doğmalarımı ziyarətə gedib-gəlməyim üçün 1100 km uzunluğunda yol qət etməli olurdum...

Həmin məktəb mənə çox doğma idi. Məsafə problemi olmasaydı, yenə də orada işləyərdim. Gələcəkdə də Qusarda fəaliyyət göstərməyi planlaşdırıram. Ötən illər ərzində Qusar mənə çox doğmalaşdı. Öz rayonumuza daha yaxın bir yerdə çalışıram, amma yenə də Qusar üçün darıxıram...

Müəllim olmağı özüm seçdim. Sənəd qəbulunun vaxtını ötürdüyüm üçün bank sektorunda işlədim. Lakin sonradan sevimli müəllim peşəsinə qayıtdım. Mən bu peşəyə sevərək gəlmişəm.

Nicat Dilqəmli

Paylaş:

Baxılıb: 1155 dəfə