Bir vaxtlar kinoteatrlarımız...

Bakı:

27 °C

65 %

17 m/s

Əlaqə

AZ RU EN

Ana səhifə / Mədəniyyət / Bir vaxtlar kinoteatrlarımız...

Bir vaxtlar kinoteatrlarımız...

01.09.2022 [10:42]

“Vətən”, “Sevil”, “Dostluq”, “Azərbaycan” kinoteatrlarının aqibəti necə oldu?

MÜŞFİQƏ

Sovetin dövründə ölkəmizə gətirilən filmlərə, xüsusən də hind kinolarına baxmaq üçün insanlar kinoteatrların önündə növbələrə düzülürdü. Premyera zamanı, istirahət və bayram günlərində böyük izdiham olurdu. Çünki kinoya getmək paytaxt sakininin ən çox sevdiyi istirahət növü idi. Regionlarda isə təzə gətirilən hər film əsl bayrama çevrilirdi. O illərdə repertuar indiki kimi müxtəlif olmasa da, kinoteatra getmək bütün ailə üçün həyəcan və sevinclə dolu hadisə idi.

Zaman keçdi nə o filmlər, nə də o kinoteatrlar eyni izdihamın şahidi oldu. Azərbaycan üçün çətin keçən 90-cı illərin birinci yarısı bakılıların kinoya getmək həvəsini bir qədər azaltdı. Bir-bir sıradan çıxan sənət ocaqları ölkədə kino anlayışını da süquta uğratdı. Taki yeni mərhələyə qədər...

Nizami Kino Mərkəzinin fəaliyyətini bərpa etməsi, eləcə də alış-veriş mərkəzlərinin açılması durğunlaşan kino sahəsini yenidən diriltdi. Lakin bu illər kinoteatrlarımız üçün itkisiz ötüşmədi. “Vətən”, “Sevil”, “Dostluq”, “Şuşa”, “Qələbə”, “Sülh”, “Şəfəq”, “İnqilab” və s. kimi kinoteatrlarımız bir növ “qara dəlik”də yoxa çıxdı. Bir çoxlarının binası söküldü, yerlərində isə ticarət obyektləri tikildi. Onlardan geriyə sadəcə adları qaldı. Bir qisminin isə adı dəyişdirildi. Məsələn, bir vaxtlar əfsanəvi “Azərbaycan” kinoteatrının binası hazırda “CinemaPlus” premium kinoteatrlar şəbəkəsi kimi fəaliyyət göstərir.

Nizami Kino Mərkəzi sonuncu mogikanlardandır. Bir ara fəaliyyətində yel əssə də, Mərkəz dağ kimi dayanıb. 1934-cü ildə tikilmiş “Nizami” kinoteatrı ölkənin ən qədim kinoteatrlarından biridir. Dahi şair və mütəfəkkir Nizami Gəncəvinin adını daşıyan kinoteatr vaxtilə seansdan əvvəl Azərbaycan caz və estrada kollektivlərinin çıxışları ilə şöhrət qazanmışdı. O vaxtlar burada kinofestivallar keçirilir, yerli və xarici filmlərin premyerası olurdu.

Sevindirici haldır ki, “Azərbaycan kinosunun 2008-2018-ci illər üzrə inkişafına dair Dövlət Proqramı” çərçivəsində yenidən qurulan “Nizami” kinoteatrı 2011-ci ildə qapılarını tamaşaçıların üzünə açdı. Bu gün nəinki Nizami Kino Mərkəzində, eləcə də Bakının digər kinoteatrlarında əvvəl olduğu kimi insan axını başladı. Kimisi yarı, kimisi ailəsi, kimisi də dostları ilə film izləmək üçün ocaqlara üz tuturlar.

Mədəniyyət Nazirliyinin tabeliyində neçə kinoteatr var?

Məsələ ilə bağlı Mədəniyyət Nazirliyinin Audiovizual və interaktiv media şöbəsinə sorğu göndərdik. Qurumdan qəzetimizə verilən məlumata görə, hazırda Mədəniyyət Nazirliyinin tabeliyində regionlarda bir neçə kinoteatr mövcud olsa da, fəaliyyətini davam etdirən dövlət kino nümayişi müəssisəsi yalnız Nizami Kino Mərkəzidir.

Bildirilib ki, nazirliyin tabeliyindəki kino nümayişi müəssisələri, o cümlədən Nizami Kino Mərkəzi dövlət büdcəsindən maliyyələşmir, təsərrüfat hesablı müəssisələrdir. Bundan əlavə, ölkədə Mədəniyyət Nazirliyinin tabeliyində olmayan, bir neçə kinoteatr şəbəkəsi mövcuddur ki, bunlar öz fəaliyyətlərini müstəqil şəkildə həyata keçirirlər. Adıçəkilən “Vətən”, “Sevil”, “Dostluq” kimi kinoteatrlar ölkə başçısının müvafiq Fərmanları ilə Nazirliyin balansından çıxarılaraq, aidiyyəti qurumlar tərəfindən özəlləşdirilməsi həyata keçirilib.

Kinoteatrlar necə maliyyələşir?

Hazırda mövsüm ilə bağlı insanların əksəriyyəti istirahət mərkəzlərinə üz tuturlar. Yay aylarında kinoteatrlarımız tamaşaçı qıtlığı yaşamırmı? Bu halda necə maliyyələşir? Nizami Kino Mərkəzinin mətbuat katibi Arzu Əhədova qəzetimizə açıqlamasında bildirib ki, başqa fəsillərlə müqayisədə yay aylarında tamaşaçıların sayında azlıq müşahidə olunur: “Bizim tamaşaçıların əsas hissəsini məktəblilər, tələbələr təşkil edirlər. Gənclər hazırda yay tətilindədirlər, istirahət edirlər. Bu da tamaşaçı sayına öz təsirini göstərir. Bildiyiniz kimi, kinoteatrların mövsümü sentyabrdan sonra başlayır. Film istehsalçıları da filmləri bu ərəfədə təqdim edirlər. Hazırda repertuarda heç bir yenilik yoxdur. Bunu görən tamaşaçı da kinoteatrlara getmək istəmir. Yay mövsümü bizim üçün ən durğun vaxtdır, deyə bilərik. Tamaşaçı varsa, maliyyə də var. Biz Mədəniyyət Nazirliyinin nəzdində olsaq da, büdcədən maliyyələşmirik. Yeni sezonda bir neçə kino festivalı keçirməyi planlaşdırırıq. Tezliklə bütün mediaya bu barədə informasiya veriləcək”.

Paylaş:

Baxılıb: 1259 dəfə