Qərəzli müxalifət mətbuatının daha bir yalanı ifşa olundu...

Bakı:

12 °C

82 %

4 m/s

Əlaqə

AZ RU EN

Ana səhifə / Siyasət / Qərəzli müxalifət mətbuatının daha bir yalanı ifşa olundu...

Qərəzli müxalifət mətbuatının daha bir yalanı ifşa olundu...

06.10.2012 [16:52]

Azərbaycanın Baş nazirinin birinci müavini Yaqub Eyyubovla bağlı iddiaların tamamilə əsassız olduğu üzə çıxdı və onların fiksiya olması sübut edildi
Son günlər bəzi mətbuat orqanlarında Azərbaycanın Baş nazirinin birinci müavini Yaqub Eyyubovla bağlı reallığa uyğun olmayan, əsassız və qərəzli məlumatlar yayımlanmaqdadır. Həmin xəbərlərdə iddia olunur ki, guya Yaqub Eyyubovun yaxın qohumlarından biri Qazaxıstanda erməni millətindən olan biri ilə ailə qurub. Həmçinin, qərəzli şəkildə bildirilir ki, həmin toy mərasiminə Yaqub Eyyubovla yanaşı, daha bir neçə yüksək rütbəli məmur da qatılıb. Lakin apardığımız qısa araşdırma zamanı bir daha bəlli oldu ki, qərəzli dairələrin və radikal müxalifətin nəzarətində olan mətbuat orqanları siyasi maraqlar prizmasından ortaya bu cür çirkin iddialar atıblar. Əslində həmin fikirlərin heç bir əsası yoxdur, bu, fiksiyadır.
Toy iddiası tamamilə cəfəngiyatdır, siyasi sifarişdir...
Məlum olduğu kimi, bir müddət öncə Azərbaycan Respublikasının Prezidenti İlham Əliyevin Sərəncamı ilə Yaqub Eyyubovun oğlu Emin Eyyubov Azərbaycanın Avropa Şurası yanında daimi nümayəndəsi təyin olunub. Bunu həzm edə bilməyən bəzi maraqlı qruplar isə Yaqub Eyyubova qarşı qarayaxma kampaniyası həyata keçirməyə cəhd göstəriblər və bu məqsədlə də sözügedən cəfəngiyatları ortaya atıblar. Bu cür əsası olmayan məlumatlar əsasında gündəm yaratmağa cəhd göstərən radikal müxalifətin nəzarətindəki mətbuat da qərəzliliyin dərəcəsini artırmaqla, təxribata yol verib, birtərəfli şəkildə məlumatı yaymaqla, həmin qərəzli dairələrin siyasi sifarişinin icraçısına çevrilib. Amma araşdırmalar zamanı bəlli olub ki, məsələ heç də iddia olunduğu kimi deyilmiş.
Əslində, Yaqub Eyyubovun qohumu erməni ilə deyil, əsil-nəcabətli, ziyalı azərbaycanlı ailəsinin nümayəndəsilə evlənib. Həmin toyda isə nəinki, dövlət məmurları, heç Yaqub Eyyubovun özü də ezamiyyətdə olması ilə əlaqədar iştirak edə bilməyib.
Toyu olmuş şəxslərin yaxınlarının gətirdiyi faktlar isə toyla bağlı iddiaların fiksiya olduğunu üzə çıxarıb. Yəni, bildirilib ki, ümumiyyətlə, sözügedən toy mərasimi Qazaxıstanda deyil, Azərbaycanda baş tutub.
Hətta, əsassız şəkildə yazılmış yazıda iddia olunur ki, toy bu yaxınlarda olub. Lakin araşdırma zamanı aydın olub ki, həmin ailənin hazırda 7 yaşlı övladı da var.
Rey Kərimoğlu da ifşa edildi...
Əlavə edək ki, “Yeni Müsavat” qəzetinin 30 sentyabr 2012-ci il tarixli sayında da Yaqub Eyyubovla bağlı qərəzli material dərc olunub. Həmin yazıda iddia olunub ki, guya Baş nazirin müavini Rey Kərimoğlunu təhqir edib və hədələyib.
Əslində isə vəziyyət tamamilə fərqli olub. Sözügedən məsələni bilən şəxslərlə də apardığımız söhbətlər zamanı bildirilib ki, doğrudur, o zaman Yaqub Eyyubov Rey Kərimoğlunu Badamdardakı bağ evinə aparıb, hətta, mərhum anası Nəcəfova Gülzar Mehralı qızının sənədlərini də ona göstərib. Həmin vaxt isə Yaqub Eyyubov tərəfindən Rey Kərimoğluna qarşı hər hansı təhqiramiz hərəkətə yol verilməyib və o, təhdid edilməyib.
Beləliklə də aydınlaşır ki, Rey Kərimoğlu Yaqub Eyyubovun anasının adını, soyadını və atasının adını öz gözlərilə görüb. Amma sonradan yenidən “Gülzar onun analığıdır” yazmaqla Yaqub Eyyubova qarşı olan qərəzini ortaya qoyub.
Bir sözlə, ənənəsinə sadiq qalan müxalifət mətbuatı qəzetlərinin tirajını artırmaq məqsədilə daim bu cür əsassız, ictimai rezonans doğuran materiallar dərc edir. Lakin sonradan həmin məlumatların yalan olması faktı üzə çıxarkən, demokratiya və söz azadlığı çətiri altında gizlənərək, məsuliyyətdən boyun qaçırmağa çalışır. Ümid edirik ki, demokratikləşən və modernləşən Azərbaycanda müxalifət mətbuatı bundan sonra siyasi sifarişləri yerinə yetirən rupor olmayacaq, qərəzli materiallar dərc etməyəcək. Çünki, mətbuatın əsas funksiyası cəmiyyəti düzgün informasiya ilə təmin etməkdir...
Ramil VƏLİBƏYOV

Paylaş:

Baxılıb: 1115 dəfə