“TV plyus” jurnalının “Bizim Prezident. 2003-2013: İnkişafın strategiyası” adlı xüsusi buraxılışı çapdan çıxıb

Bakı:

25 °C

74 %

12 m/s

AZ RU EN

Ana səhifə / Siyasət / “TV plyus” jurnalının “Bizim Prezident. 2003-2013: İnkişafın strategiyası” adlı xüsusi buraxılışı çapdan çıxıb

“TV plyus” jurnalının “Bizim Prezident. 2003-2013: İnkişafın strategiyası” adlı xüsusi buraxılışı çapdan çıxıb

25.10.2013 [11:52]

“Azərbaycan Televiziya və Radio Verilişləri” Qapalı Səhmdar Cəmiyyətinin nəşri olan “TV plyus” jurnalının xüsusi buraxılışı çapdan çıxıb. Xüsusi buraxılış Azərbaycan Prezidenti İlham Əliyevin seçkilərdə inamlı qələbəsinə və ölkəmizin son 10 ildə keçdiyi misilsiz inkişaf yoluna həsr olunub.
AzərTAc xəbər verir ki, nəfis tərtibata malik, illüstrasiya materialları ilə zəngin olan xüsusi buraxılış Prezident İlham Əliyevin bu sözləri ilə açılır: “Bizim vəzifəmiz xalqa xidmət etməkdir. Biz - dövlət işində işləyən insanlar Prezidentdən tutmuş, ən aşağı səviyyəli məmura qədər insanların xidmətində olmalıyıq”.
Prezidentin bu fikri nəşrdə toplanmış bütün materialların leytmotivini təşkil edir.
Xüsusi buraxılışda növbəti prezident seçkilərinin yekunları müxtəsər olaraq belə səciyyələndirilir: “Azərbaycan xalqı yenə də dinamik, sürətli, çoxşaxəli inkişafa və sabitliyə səs verdi”.
Prezident seçkilərinin nəticələrini əks etdirən məlumatın ardından Beynəlxalq təşkilatların, xarici ölkələrin müşahidə missiyalarının rəhbərlərinin rəyləri yer alır. Bu rəylərdə Azərbaycanda prezident seçkilərinin yüksək səviyyədə, ifadə azadlığının təmin olunduğu dinc şəraitdə, azad və şəffaf keçdiyi, demokratik seçki standartlarına cavab verdiyi, Azərbaycan xalqının öz gələcəyi naminə düzgün seçim etdiyi vurğulanır.
“İlham Əliyev: Biz birlikdə hələ böyük qələbələrə imza atacağıq” - Prezidentin seçkilərin ilkin nəticələri ilə bağlı xalqa müraciəti oxuculara bu başlıq altında təqdim olunur.
Daha sonra nəşrdə dünyanın nüfuzlu KİV-lərinin - ABŞ-ın “The Vashinqton Times”, Böyük Britaniyanın “The Teleqraph”, Almaniyanın “Frankfurter Allgemeine Zeitung”, Çin xalq respublikasının “Global Times”, Pakistanın ingilisdilli “Daily Times” və digər qəzet və jurnalların Azərbaycan və Prezident İlham Əliyev haqqında dərc etdikləri “Qafqazdakı ən sadiq dostumuz”, “Bakı Qafqazın Dubayıdır”, “Xəzər dənizi sahilində şahmat oyunu”, “Azərbaycan: Xəzər dənizinin Odlar diyarı”, “İlham Əliyev: Məqsədimiz qara qızılı insan qızılına çevirməkdir” və başqa məqalələr yer alır. Həmçinin ayrı-ayrı nüfuzlu jurnalların Prezident İlham Əliyevi 2013-cü ildə dünyada “İlin adamı” və “10 ilin dövlət adamı” elan etdiyi barədə xəbərlər çatdırılır.
Xüsusi buraxılışda Azərbaycanın son 10 ildə həyatın bütün sahələrində qazandığı nailiyyətlərdən geniş bəhs olunur. Bununla bağlı materiallar qruplaşdırılaraq ayrı-ayrı bölmələrdə verilir. İqtisadiyyat, sənaye, informasiya-kommunikasiya texnologiyaları, özəl sektor, kənd təsərrüfatı, vətəndaş rifahı, ordu quruculuğu, elm, təhsil, səhiyyə, mədəniyyət, turizm, idman sahələrində qazanılmış nailiyyətlər təhlil olunur, qlobal layihələrdən, daxili və xarici siyasətin prioritetlərindən, həmçinin dövlətin gənclər siyasətindən söhbət açılır.
Xüsusi buraxılışda Prezidentin poçtuna daxil olan məktublar - sadə insanların ürək sözləri, Prezident İlham Əliyevə bəslədikləri inam və minnətdarlıq duyğuları da əksini tapır.
Nəşrdəki materiallar Prezidentin açılış mərasimlərindəki iştirakını, bölgələrə səfərlərini, insanlarla səmimi görüş və söhbətlərini, xalqla birliyini əks etdirən çoxsaylı fotoşəkillərlə müşayiət olunur və oxucuda əyani təsəvvür yaradır.
Xüsusi buraxılış Prezident İlham Əliyevin xalqa müraciətindən götürülmüş bu sitatla tamamlanır: “Mən bir daha sizə son on il ərzində mənə göstərdiyiniz böyük dəstəyə görə minnətdarlığımı bildirmək istəyirəm. Bir daha sizi əmin etmək istəyirəm ki, var gücümlə doğma xalqımızın rifahı, dövlətimizin möhkəmləndirilməsi üçün çalışacağam. Biz birlikdə hələ böyük qələbələrə imza atacağıq. Yaşasın müstəqil Azərbaycan Respublikası”.
Qeyd edək ki, nəşrin qurucusu “Azərbaycan Televiziya və Radio Verilişləri” Qapalı Səhmdar Cəmiyyətinin sədri Arif Alışanovdur.

Paylaş:

Baxılıb: 1153 dəfə