Ədliyyə və məhkəmə infrastrukturu müasirləşdirilir

Bakı:

24 °C

74 %

10 m/s

Əlaqə

AZ RU EN

Ana səhifə / Siyasət / Ədliyyə və məhkəmə infrastrukturu müasirləşdirilir

Ədliyyə və məhkəmə infrastrukturu müasirləşdirilir

27.12.2013 [09:28]

Azərbaycan Prezidenti İlham Əliyevin rəhbərliyi ilə ölkənin ədliyyə və məhkəmə sisteminin təkmilləşdirilməsi istiqamətində genişmiqyaslı islahatlar aparılır, ədliyyə orqanları və məhkəmələr üçün yeni binalar tikilib istifadəyə verilir.
Ədliyyə Nazirliyinin mətbuat xidmətindən AzərTAc-a bildiriblər ki, dekabrın 26-da İmişlidə rayon məhkəməsi üçün yeni binanın təməli qoyulub, Avropa İttifaqının dəstəyi ilə inşa olunmuş regional ədliyyə şöbəsinin müasir inzibati binası istifadəyə verilib.
Tədbirlərdə ədliyyə naziri, Məhkəmə-Hüquq Şurasının sədri Fikrət Məmmədov, nazir müavini Toğrul Musayev, İmişli rayon İcra Hakimiyyətinin başçısı Vilyam Hacıyev, Avropa İttifaqının Azərbaycandakı nümayəndəliyinin rəhbəri xanım Malena Mard, bölgənin hüquq mühafizə orqanlarının rəhbərləri, ədliyyə işçiləri, hakimlər, ictimaiyyət və KİV nümayəndələri iştirak ediblər.
Mərasimlərdən əvvəl Ümummilli liderimiz Heydər Əliyevin İmişli şəhərindəki abidəsi ziyarət edilib, əziz xatirəsi dərin ehtiramla yad olunub.
Sonra İmişli rayon Məhkəməsi üçün yeni inzibati binanın təməlqoyma mərasimi keçirilib.
Daha sonra İmişli Regional Ədliyyə Şöbəsinin yeni tikilmiş müasir inzibati binasının açılışı olub.
Mərasimdə çıxış edən ədliyyə naziri Azərbaycan Prezidentinin rəhbərliyi ilə son illər respublikamızın, xüsusilə regionların sosial-iqtisadi inkişafı sahəsində əldə olunmuş yüksək nailiyyətlərdən, o cümlədən genişmiqyaslı məhkəmə-hüquq islahatlarından danışıb, regionlarda 20-dək yeni məhkəmələrin yaradıldığını, hakimlərin sayının 2 dəfə artırıldığını, onların seçim prosesinin şəffaflığına görə Avropada örnək kimi dəyərləndirildiyini, məhkəmə infrastrukturunun müasirləşdirilməsini qeyd edib, İmişli rayon Məhkəməsinin müasir binasının inşasının məhkəmə sistemində aparılan islahatlara əlavə töhfə verəcəyini, ədalət mühakiməsinə çatımlılığı daha da asanlaşdırmaqla vətəndaşların hüquqlarının etibarlı təmin olunmasına xidmət edəcəyini vurğulayıb.
Açılışda iştirakından məmnunluğunu bildirən xanım M.Mard Avropa İttifaqının Azərbaycan ilə 20 ildən artıq davam edən əməkdaşlığını qeyd edərək “Ədliyyə sahəsində islahatlara dəstək” Proqramının əlaqələrin inkişafında yeni mühüm mərhələ olduğunu vurğulayıb, təmsil etdiyi qurumun ədliyyə sisteminə çatımlılığın asanlaşdırılmasına xidmət edən islahatların aparılmasına xüsusi əhəmiyyət verdiyini, qarşılıqlı fəaliyyətin dərinləşdirilməsi üçün geniş imkanların olduğunu söyləyib.
Sonra ədliyyə işçilərinə və hakimlərə işin yüksək səviyyədə təşkil edilməsi, fəaliyyətin təkmilləşdirilməsi, vətəndaşlara layiqli xidmət göstərilməsi ilə bağlı müvafiq tapşırıqlar və tövsiyələr verilib. Həmçinin regional ədliyyə şöbəsinə yeni xidməti minik avtomobili təqdim edilib.
Eyni zamanda, xanım Malena Mard ilə görüş keçirilərək, əməkdaşlıq məsələlərinə dair faydalı fikir mübadiləsi aparılıb.
Görüşdə qarşılıqlı fəaliyyətin yüksək səviyyədə olmasından məmnunluq ifadə edilib. Avropa İttifaqının təmsilçisi əməkdaşlığın daha da dərinləşdirilməsi ilə bağlı niyyətini bildirərək bu cür uğurlu təcrübənin genişləndirilməsinin və ədliyyə sistemində islahatların əhəmiyyətini qeyd edib, həyata keçirilən tədbirlərə bundan sonra da dəstək göstərəcəyini vurğulayıb.

Paylaş:

Baxılıb: 1020 dəfə