Azərbaycanda din-dövlət münasibətləri ölkə Konstitusiyasına əsaslanır

Bakı:

19 °C

82 %

3 m/s

Əlaqə

AZ RU EN

Ana səhifə / Siyasət / Azərbaycanda din-dövlət münasibətləri ölkə Konstitusiyasına əsaslanır

Azərbaycanda din-dövlət münasibətləri ölkə Konstitusiyasına əsaslanır

18.09.2014 [10:00]

Dini Qurumlarla İş üzrə Dövlət Komitəsinin sədri Mübariz Qurbanlı Yasamal rayonunda dini icmaların nümayəndələri ilə görüş keçirib
Dünən Azərbaycan Respublikası Dini Qurumlarla İş üzrə Dövlət Komitəsinin (DQİDK) sədri Mübariz Qurbanlı Yasamal rayonunda dini icmaların nümayəndələri ilə görüş keçirib. Görüşdən öncə Mübariz Qurbanlı və Yasamal rayon İcra Hakimiyyətinin başçısı İbrahim Mehdiyev Azərbaycan xalqının Ümummilli lideri, müasir müstəqil Azərbaycanın qurucusu Heydər Əliyevin büstünü ziyarət edib, önünə gül dəstələri qoyublar.
Tədbiri giriş sözü ilə açan Yasamal rayon İcra Hakimiyyətinin başçısı İbrahim Mehdiyev Dini Qurumlarla İş üzrə Dövlət Komitəsinin sədri Mübariz Qurbanlının Yasamal rayonunun dini icmalarının nümayəndələri ilə görüş keçirməsinin əhəmiyyətini vurğulayaraq qeyd edib ki, bu cür görüşlər dini icmaların gələcək fəaliyyəti, icmalar arasındakı münasibətlərin tənzimlənməsi, bütövlükdə, din-dövlət münasibətləri baxımından mühüm əhəmiyyət kəsb edir: “Dini məsələlər hər zaman aktual olmuşdur. Ona görə də bu cür məsələlərin müzakirəsi və həlli ölkə ictimaiyyətinin diqqətindədir”.
Azərbaycanda dini azadlıqlarının təmin olunduğunu deyən İbrahim Mehdiyev əlavə edib ki, ölkə Konstitusiyasında dini məsələlərə demokratik yanaşma öz əksini tapıb: “Bununla yanaşı, Azərbaycan qüdrətli dövlətdir, ona görə də heç bir qrup dini zəmində problemlər, qarşıdurma yarada bilməz”.
Daha sonra DQİDK-nın Bakı şəhəri üzrə şöbə müdiri Anar Kazımov çıxış edərək Yasamal rayonu ərazisindəki dini durum, dini icmaların fəaliyyət və vəziyyəti, eləcə də məscid və ziyarətgahlarla bağlı məlumat verib. “Rayon ərazisində 10 dini icma dövlət qeydiyyatına alınıb ki, onlardan 5-nin fəaliyyəti qanunlar əsasındadır. Müxtəlif dini konfessiyaların yaşadığı bölgədə icmalar arasında tolerant münasibətlər mövcuddur”.
Azərbaycan Respublikası Dini Qurumlarla İş üzrə Dövlət Komitəsinin sədri Mübariz Qurbanlı isə çıxışında bildirib ki, müstəqilliyimizin bərpasından sonra xalqımızın milli-mənəvi dəyərlərinə qayıdışı prosesi sürətlənib. Dövlət Komitəsinin sədri bu istiqamətdə Ümummilli lider Heydər Əliyevin müstəsna xidmətlərini qeyd edib və hazırda Prezident İlham Əliyevin rəhbərliyi ilə milli-mənəvi dəyərlərimizin inkişafı istiqamətində görülən işlərdən danışıb.
Son illərdə ölkəmizdə milli-mənəvi dəyərlərimizə dövlət qayğısının daha da artdığını diqqətə çatdıran Mübariz Qurbanlı əlavə edib ki, hazırda Azərbaycanda dinlərarası münasibətlər tolerantlığa söykənir: “Ölkəmizdə din-dövlət münasibətləri qanunlara, ən əsası, ölkə Konstitusiyasına əsaslanır. Azərbaycanda dini azadlıqlar, o cümlədən, vicdan azadlığı təsbit edilib. Ölkəmiz beynəlxalq səviyyədə tolerantlıq nümunəsi kimi xarakterizə olunur”.
Komitə sədri diqqətə çatdırıb ki, bütün bunlara baxmayaraq, bəzi qruplar, o cümlədən, dini icmalar müvafiq qanun və qaydaları pozmağa cəhd edirlər. “Azərbaycan dünyada İslam dünyasının bir hissəsi, İslam dininin yayıldığı ölkə kimi tanınıb və qəbul edilib. İslam bizim dinimizdir, ona görə də kimsə burada missionerlik edə bilməz. Azərbaycan missionerlik fəaliyyəti üçün yer deyil. Ölkəmizdə bu cür qanunsuz hallara, qeyri-qanuni fəaliyyətə qarşı qanunlar çərçivəsində tədbirlər görülür və bundan sonra da görüləcəkdir. Bununla yanaşı, maarifləndirmə işi aparılır və davam etdiriləcəkdir”.
“Azərbaycan xalqı müdrik və intellektualdır, ona görə də bu cür halları qəbul etmir. Azərbaycan dövləti yetərincə güclüdür, ölkəmizdə ictimai-siyasi həyatla yanaşı, din sahəsində də sabitlik mövcuddur”, - deyən Mübariz Qurbanlı əlavə edib ki, İslam dini daxilində bölücülük yaratmaq istəyənlər faktiki olaraq İslama zərbə vurmaqla məşğuldurlar.
Komitə sədri dini mərasimlərin keçirilməsi məsələsinə də toxunub. Mübariz Qurbanlı deyib ki, ölkədə dini mərasimləri qanunvericilikdə də nəzərdə tutulduğu kimi, ancaq din xadimləri icra edə bilərlər: “Bu, dünyanın hər yerində belədir. “Dini etiqad azadlığı haqqında” Qanunda aydın göstərilib ki, dini mərasimləri ancaq qeydiyyatı və icazəsi olan din xadimləri həyata keçirə bilərlər”.
“Bunlarla yanaşı, yas mərasimlərində israfçılığın aradan qaldırılması istiqamətində maarifləndirmə tədbirləri davam etdirilir. Bu məsələylə əlaqədar müvafiq tövsiyələr verilib. Artıq maarifləndirmə tədbirləri və tövsiyələr öz nəticələrini verməkdədir.
Bildiyimiz kimi, bütün səmavi dinlər, o cümlədən İslam dini israfçılığa qarşı çıxır. Ona görə də yas mərasimlərində israfçılığın aradan qaldırılması məsələsi mühüm əhəmiyyət kəsb edir”, - deyə Dini Qurumlarla İş üzrə Dövlət Komitəsinin sədri Mübariz Qurbanlı əlavə edib.
Tədbirdə dini icmaların nümayəndələri, din xadimləri çıxış edərək öz fikirlərini bildiriblər. Dini Qurumlarla İş üzrə Dövlət Komitəsinin sədri Mübariz Qurbanlı tədbir iştirakçılarını maraqlandıran sualları cavablandırıb.
Nurlan QƏLƏNDƏRLİ