Azərbaycan-Qətər əlaqələrinin dərinləşməsində parlamentlər böyük rol oynayır

Bakı:

19 °C

88 %

2 m/s

Əlaqə

AZ RU EN

Ana səhifə / Siyasət / Azərbaycan-Qətər əlaqələrinin dərinləşməsində parlamentlər böyük rol oynayır

Azərbaycan-Qətər əlaqələrinin dərinləşməsində parlamentlər böyük rol oynayır

30.10.2014 [10:08]

Oktyabrın 29-da Milli Məclisin sədri Oqtay Əsədov diplomatik fəaliyyətinin başa çatması ilə əlaqədar Qətər Dövlətinin Azərbaycandakı səfiri Mübarək bin Fəhd əl-Tani ilə görüşüb.
Milli Məclisin mətbuat xidmətindən AzərTAc-a verilən məlumata görə, Oqtay Əsədov səfirin ölkəmizdə missiyasının başa çatdığı ərəfədə belə görüşlər keçirməsini müsbət dəyərləndirib. Sədr inandığını bildirib ki, diplomat Azərbaycandan xoş təəssüratlarla ayrılır və gələcək fəaliyyətində münasibətlərimizin daha da inkişafı naminə öz səylərini əsirgəməyəcək. O.Əsədov ümidvar olduğunu bildirib ki, gündən-günə genişlənən əlaqələrimiz xalqlarımızın daha da yaxınlaşmasına, dostluq münasibətlərimizin möhkəmlənməsinə xidmət edəcək.
Milli Məclisin sədri vurğulayıb ki, Azərbaycan və ərəb xalqlarının dini, mədəni bağlılığı, bir çox beynəlxalq məsələlərdə mövqelərimizin üst-üstə düşməsi münasibətlərimizin gələcək inkişafı üçün yaxşı zəmin yaradır. “Biz Qətərlə əməkdaşlığımızı daha da genişləndirmək niyyətindəyik. Bu baxımdan yüksək səviyyəli qarşılıqlı səfərlər mühüm əhəmiyyət kəsb edir”, - deyə O.Əsədov diqqətə çatdırıb.
Sədr deyib ki, Azərbaycan-Qətər əlaqələrinin dərinləşməsində parlamentlər böyük rol oynayır. Bu gün Milli Məclisdə Azərbaycan-Qətər parlamentlərarası əlaqələr üzrə işçi qrupu fəaliyyət göstərir. Beynəlxalq qurumlarda deputatlarımızın mütəmadi görüşləri və parlament nümayəndə heyətlərinin qarşılıqlı səfərləri ümumi mənafelərə xidmət edir.
Oqtay Əsədov iqtisadi sahədə əməkdaşlığın genişləndirilməsinin günün tələbi olduğunu qeyd edib. Bildirilib ki, hər iki ölkənin iş adamları arasında görüşlərin təşkili, tərəflərin iqtisadi imkanları barədə təqdimatların keçirilməsi, ticarət sahəsində xüsusi proqramın hazırlanması bu sahədə əlaqələrimizə dəyərli töhfə verə bilər. İki ölkə arasında elm, təhsil, mədəniyyət və turizm sahələrində də əməkdaşlığın inkişafı üçün geniş imkanlar var.
Mübarək bin Fəhd əl-Tani Qətərin Azərbaycanda səfiri kimi işlədiyi dövrdə əlaqələrin dərinləşməsi üçün görülən işlərdən söhbət açıb. O, təmsil etdiyi dövlətin Azərbaycanla əlaqələrə böyük maraq göstərdiyini və müxtəlif sahələrdə əməkdaşlığı genişləndirmək əzmində olduğunu diqqətə çatdırıb. Səfir vurğulayıb ki, gələcəkdə harada çalışmasından asılı olmayaraq o, iki dost ölkə arasında münasibətlərin daha da dərinləşməsi üçün öz qüvvə və bacarığını əsirgəməyəcək.
Görüşdə tərəfləri maraqlandıran məsələlər ətrafında fikir mübadiləsi aparılıb.

Paylaş:

Baxılıb: 621 dəfə