ABŞ konqresmenləri Prezident Barak Obamanı Azərbaycanı dəstəkləməyə çağırıblar

Bakı:

23 °C

64 %

4 m/s

Əlaqə

AZ RU EN

Ana səhifə / Siyasət / ABŞ konqresmenləri Prezident Barak Obamanı Azərbaycanı dəstəkləməyə çağırıblar

ABŞ konqresmenləri Prezident Barak Obamanı Azərbaycanı dəstəkləməyə çağırıblar

27.11.2014 [09:50]

ABŞ Konqresinin üzvləri El Qrin, Leonard Lans, Mayk Fitspatrik, Pit Qalleqo və Skott Perri Prezident Barak Obamaya məktublarla müraciət edərək Azərbaycanı dəstəkləməyə çağırıblar.
AzərTAc xəbər verir ki, konqresmenlər ABŞ-ın Azərbaycan ilə tərəfdaşlığını davam etdirməsinin çox vacib olduğunu bildiriblər. Qeyd olunub ki, Azərbaycan müstəqilliyini bərpa etdikdən bəri strateji baxımdan önəmli bir regionda Birləşmiş Ştatların sınanmış və vacib müttəfiqidir. Bildirilib ki, ABŞ-ın xarici siyasətinin təhdidlərlə üzləşdiyi bir məqamda bu ölkənin öz müttəfiqlərinin dostluğuna və dəstəyinə ehtiyacı var. ABŞ Avropa və Asiya arasında əlverişli coğrafi mövqedə yerləşən Azərbaycan ilə terrorizmə qarşı mübarizədən enerji təhlükəsizliyinin təmininə qədər müxtəlif sahələrdə güclü tərəfdaşlıq qurub. 2001-ci il sentyabrın 11-də ABŞ-da baş vermiş hadisələrdən sonra Azərbaycan terrorizmə qarşı qlobal mübarizədə rəsmi Vaşinqtona köməyini təklif edən ilk ölkələr arasında olub.
Məktublarda Azərbaycanın ABŞ-ın və NATO-nun Əfqanıstanda və İraqda həyata keçirdiyi əməliyyatlara hərtərəfli dəstək göstərdiyi, bu ölkənin Alyansın “Sülh naminə Tərəfdaşlıq” Proqramının fəal iştirakçısı olduğu diqqətə çatdırılıb.
Konqresmenlər bildiriblər ki, regionda ABŞ-ın təhlükəsizlik maraqlarını dəstəkləyən, qlobal enerji təhlükəsizliyində vacib tərəfdaş olan Azərbaycanın rəsmi Vaşinqton ilə əlaqələri Xəzərin enerji resurslarının Amerika şirkətləri tərəfindən işlənməsi ilə daha da möhkəmlənib. Onlar bu baxımdan 1994-cü ildə imzalanmış “Əsrin müqaviləsi”nin əhəmiyyətini xüsusi qeyd ediblər. Vurğulanıb ki, “Bakı-Tbilisi-Ceyhan” neft kəməri Xəzərin karbohidrogen ehtiyatlarının ABŞ-ın Avropadakı müttəfiqlərinə çatdırılması, Cənubi Qafqaz regionunun inkişafı baxımından mühüm əhəmiyyətə malikdir. Konqresmenlər Avropanın enerji təhlükəsizliyinin təmin edilməsinə böyük töhfələr verəcək “Cənub” qaz dəhlizinin reallaşmasında da Azərbaycanın mühüm səylərini qeyd ediblər. Bildiriblər ki, bu layihənin həyata keçməsi ilə Azərbaycan ABŞ-ın Avropadakı müttəfiqlərinin təbii qazla təchizatında əsas rol oynayacaq.
Məktublarda Azərbaycanın iqtisadi baxımdan dünyanın ən sürətlə inkişaf edən ölkələrindən biri olduğu, ümumi daxili məhsulun artdığı, Cənubi Qafqazın iqtisadiyyatının 80 faizini bu ölkənin iqtisadiyyatının təşkil etdiyi, yoxsulluğun səviyyəsinin 5 faizə düşdüyü diqqətə çatdırılıb. Vurğulanıb ki, Azərbaycan Cənubi Qafqazda ABŞ-ın ən böyük ticarət tərəfdaşlarından biridir.
Azərbaycanın qədim etnik və dini tolerantlıq tarixinin olduğunu bildirən konqresmenlər əhalisinin əksəriyyətini müsəlmanların təşkil etdiyi bu dünyəvi ölkədə əsrlərdir xristian və yəhudi icmalarının sülh şəraitində yaşadıqlarını qeyd ediblər. Konqresmenlər ekstremizmə qarşı mübarizədə də ABŞ-ın vacib tərəfdaşı olan Azərbaycanı tolerantlıq baxımından bir çox ölkələr üçün nümunə kimi səciyyələndiriblər.
Konqres üzvləri Prezident Barak Obamanı ABŞ ilə Azərbaycan arasında tərəfdaşlığın daha da möhkəmləndirilməsinə dəstək verməyə çağırıblar.

Paylaş:

Baxılıb: 747 dəfə