Binəqədi seçiciləri davamlı inkişafa səs verdilər

Bakı:

19 °C

88 %

2 m/s

Əlaqə

AZ RU EN

Ana səhifə / Siyasət / Binəqədi seçiciləri davamlı inkişafa səs verdilər

Binəqədi seçiciləri davamlı inkişafa səs verdilər

24.12.2014 [09:50]

Dekabrın 23-də ölkənin hər yerində olduğu kimi, Binəqədi rayonunda da bələdiyyə seçkiləri beynəlxalq standartlara uyğun, demokratik şəkildə keçirilib. Səhər erkən saatlarında seçki məntəqələrinə üz tutan binəqədili seçicilər azad şəkildə öz seçimlərini ediblər.
Məsələn, 8 saylı Binəqədi 1-ci Seçki Dairəsinin 9 saylı seçki məntəqəsinin sədri Əsgər Sofiyev deyib ki, demokratik ab-havada keçirilən seçki prosesi vətəndaşların böyük fəallığı ilə müşahidə edilib: “1130 nəfər seçicinin qeydiyyatda olduğu məntəqədə seçki ilə bağlı bütün məsələlər tam qaydasındadır və müşahidəçilərin hər biri bunun şahididir. Vətəndaşlar axın-axın seçki məntəqəsinə gəlirlər və onların sərbəst formada iradələrini ifadə etməsi üçün münbit şərait yaradılıb”.
Həmin məntəqədə Böyük Quruluş Partiyasından (BQP) müşahidəçi Tünzalə Vəliyeva da seçkilərin demokratik şəraitdə keçdiyini bildirib: “Məntəqələrdə prosesi onlayn rejimdə izləmək üçün veb-kameralar quraşdırılıb. Seçki şəffaf və ədalətli keçirilir”.
Yeni Azərbaycan Partiyasından (YAP) müşahidəçi Kəmalə Hüseynova: “Biz səhər saatlarından - məntəqə açılandan buradayıq və müşahidələrimizi aparırıq. Seçicilər fəal şəkildə məntəqələrə gəlib seçimlərini edirlər. Nə bir qanun pozuntusuna və nə də kiminsə seçiciyə təzyiq etməsinə təsadüf etməmişik”, - deyib.
10 saylı seçki məntəqəsinin sədri Saleh Mirzəyev isə “Məntəqəmizdə 1147 seçici qeydiyyatdadır. Seçkilər hər yerdə olduğu kimi, bizim məntəqədə də böyük seçici fəallığı ilə müşayiət olunmaqdadır. Binəqədi sakinləri gələcək inkişafı və yüksək rifahı təmin etmək istəyindən irəli gələrək, məntəqəyə gəlir və səslərini verirlər. İnsanlar üçün bu gün önəmli olan seçkilərdə iştirak etməkdir. Seçicilər çox fəal iştirak edir və əhvalları yüksəkdir”, - deyib.
Eyni ab-hava 9 saylı Binəqədi 2-ci Sekçi Dairəsində də müşahidə edilib. Həmin dairənin 6 saylı seçki məntəqəsinin sədri Ziyafət Əliyeva məntəqədə 1313 seçicinin qeydiyyatda olduğunu bildirib: “Seçicilər namizədlərlə tanışdırlar və məntəqədə sərbəst olaraq səslərini verirlər”.
Həmin məntəqədə BQP-nin müşahidəçisi Nərminə Mövlayevanın sözlərinə görə, demokratiyanın atributu seçki hüququdur: “Seçicilər verilən bu hüquqdan istifadə edərək, müstəqil, sərbəst şəkildə səs verirlər”.
Dairənin 5 saylı seçki məntəqəsində Milli İstiqlal Partiyasından müşahidəçi Təvəkkül Nəsibov da prosesdən razılığını ifadə edib: “Məntəqəyə veb-kamera quraşdırılıb. Seçicilər böyük əhval-ruhiyyə ilə məntəqəyə gəlirlər”.
Öz növbəsində, seçkilərdə iştirak edən seçicilər bildiriblər ki, vətəndaşların normal şəraitdə iradələrini ifadə etmələri, istədikləri namizədə azad və şəffaf şəraitdə səs vermələri üçün məntəqələrdə hər cür şərait yaradılıb.
Məsələn, seçici Mahirə Hacıyeva deyib ki, bələdiyyələr öz fəaliyyətlərini, eyni zamanda, əhalinin mədəni istirahətinə xidmət edən yaşıllıq sahələrinin və digər obyektlərin yaradılması, yolların, səkilərin daş və asfalt örtüklərinin mühafizə edilməsi və digər bu kimi istiqamətlərdə qururlar: “Mən də bu prosesləri uğurla yerinə yetirə biləcək namizədlərə səs vermişəm”.
Seçici Sədaqət Məmmədov isə bildirib ki, seçki çox demokratik şəkildə keçirilir: “Hər kəs gizli şəkildə seçimini etmək iqtidarındadır. Mən də etimad göstərdiyim namizədlərə - davamlı inkişafa səs verdim”.

Paylaş:

Baxılıb: 584 dəfə