Uilyam Lui-Mari: AzərTAc birinci Avropa Oyunlarının informasiya təminatında mühüm rol oynaya bilər

Bakı:

32 °C

40 %

4 m/s

AZ RU EN

Ana səhifə / Siyasət / Uilyam Lui-Mari: AzərTAc birinci Avropa Oyunlarının informasiya təminatında mühüm rol oynaya bilər

Uilyam Lui-Mari: AzərTAc birinci Avropa Oyunlarının informasiya təminatında mühüm rol oynaya bilər

19.02.2015 [12:38]

AzərTAc və “Bakı-2015” ilk Avropa Oyunları Əməliyyat Komitəsi qarşılıqlı əməkdaşlığı genişləndirmək niyyətindədir.
Bu məsələ fevralın 18-də Azərbaycan Dövlət Teleqraf Agentliyinin (AzərTAc-ın) Baş direktoru Aslan Aslanovun “Bakı-2015” ilk Avropa Oyunları Əməliyyat Komitəsinin mətbuat əməliyyatları şöbəsinin direktoru xanım Ceyn Pirs və kommunikasiya şöbəsinin direktoru Uilyam Lui-Mari ilə görüşündə müzakirə olunub.
Görüşdə Baş direktor Aslan Aslanov AzərTAc-ın keçdiyi inkişaf yolu, dövlət siyasətinin informasiya təminatında rolu, agentliyin son illərdə əldə etdiyi uğurlar, beynəlxalq əlaqələri, xüsusən dünyanın nüfuzlu xəbər agentlikləri alyanslarının rəhbər heyətində təmsil olunması haqqında qonaqlara ətraflı məlumat verib. Diqqətə çatdırılıb ki, 95 illik yubileyini qeyd etməyə hazırlaşan AzərTAc 2016-2019-cu illərdə media sahəsində iki nüfuzlu quruma - Dünya Xəbər Agentlikləri Konqresinə, eləcə də Asiya və Sakit Okean Ölkələri Xəbər Agentlikləri Təşkilatına (OANA) sədrlik edəcək.
Qeyd olunub ki, əsası Ulu öndər Heydər Əliyev tərəfindən qoyulmuş inkişaf strategiyasının Prezident İlham Əliyevin rəhbərliyi ilə uğurla həyata keçirilməsi nəticəsində regionun lider dövləti olan Azərbaycan dünyanın ən nüfuzlu beynəlxalq təşkilatlarına sədrlik edib, mühüm beynəlxalq tədbirlərin keçirildiyi məkana çevrilib. Ölkələr və xalqlar arasında münasibətlərin qurulmasında və inkişafında mədəniyyət, idman və digər tədbirlərin əhəmiyyətini vurğulayan Baş direktor son illər Azərbaycanın mühüm beynəlxalq tədbirlərin, o cümlədən mötəbər idman yarışlarının təşkilatçısı olduğunu qeyd edib. Bu tədbirlərin yüksək səviyyədə işıqlandırılmasında AzərTAc-ın daim fəal iştirak etdiyi vurğulanıb.
Görüşdə birinci Avropa Oyunlarının Bakıda keçirilməsi haqqında qərarın qəbul edilməsi böyük tarixi hadisə kimi dəyərləndirilib, bu mühüm idman tədbirinin təşkilinin Azərbaycana həvalə edilməsinin ölkəmizdə idman sahəsində qazanılan nailiyyətlərə verilən yüksək qiymət olduğu diqqətə çatdırılıb.
Azərbaycanın yeganə rəsmi informasiya qurumu - AzərTAc ilə əməkdaşlıqdan məmnunluğunu dilə gətirən Uilyam Lui-Mari agentliyin 7 dildə xəbər yayımlamasının mötəbər idman tədbirləri, xüsusən birinci Avropa Oyunları ilə bağlı informasiyaların bütün dünyaya çatdırılmasında mühüm rol oynayacağını bildirib.
Ceyn Pirs bir çox Olimpiya Oyunlarına hazırlıq işlərində qazandığı böyük təcrübəyə əsaslanaraq, yarışların işıqlandırılmasında AzərTAc-ın yaxından iştirakının vacibliyini qeyd edib.
Söhbət zamanı AzərTAc ilə “Bakı-2015” birinci Avropa Oyunları Əməliyyat Komitəsi arasında əməkdaşlığın genişləndirilməsi, birgə fəaliyyət barədə müvafiq sənədin imzalanması, hazırlıq prosesində bir sıra tədbirlərin keçirilməsi, yarışların geniş işıqlandırılmasında iştirak və digər məsələlər müzakirə olunub.
AzərTAc-ın Baş direktoru qonaqları agentliyin 95 illik yubiley tədbirlərində iştiraka dəvət edib.

Paylaş:

Baxılıb: 698 dəfə