Rusiya deputatının Ermənistanda söylədiyi fikirlər Azərbaycanın daxili işlərinə qarışmaq kimi başa düşülə bilər

Bakı:

32 °C

38 %

5 m/s

AZ RU EN

Ana səhifə / Siyasət / Rusiya deputatının Ermənistanda söylədiyi fikirlər Azərbaycanın daxili işlərinə qarışmaq kimi başa düşülə bilər

Rusiya deputatının Ermənistanda söylədiyi fikirlər Azərbaycanın daxili işlərinə qarışmaq kimi başa düşülə bilər

30.03.2015 [09:33]

Azərbaycan Xarici İşlər Nazirliyinin mətbuat xidmətinin II katibi Könül Süleymanlı Rusiya Dövlət Dumasının üzvü Leonid Sluçkiyin Ermənistanda keçirdiyi mətbuat konfransında söylədiyi fikirləri şərh edib.
K.Süleymanlı deyib: “Leonid Sluçkiyə xatırlatmaq istərdik ki, onun səfər etdiyi Yerevan şəhərində faşist Almaniyasının SS birləşmələrinin generalları olan Njde Qareqin və Drasmat Kanayanın (“Dro”) şərəfinə Ermənistanın “milli qəhrəmanları” kimi abidələr ucaldılıb, mərkəzi meydanlardan birinə Njde Qareqinin adı verilib. Leonid Sluçkiyin Ermənistanda görüşdüyü Ermənistanın hakim siyasi partiyasının rəsmi ideoloji əsasını isə “Njdexeizm” təşkil edir.
Leonid Sluçkiy millət vəkili kimi öz reallıq hissini itirməyərək faşizm üzərində qələbənin 70 illiyi ərəfəsində faşizmin qurbanı olmuş milyonlarla keçmiş SSRİ vətəndaşının ruhuna hörmət əlaməti olaraq, rəsmi Yerevan qarşısında faşist generallarının “qəhrəmanlaşdırılması” və onların şərəfinə hətta Moskvada tədbirlərin keçirilməsi məsələsinə münasibət bildirməli idi. Belə bir münasibətin bildirilməsi hələ də gec deyil.
Leonid Sluçkiyə onu da xatırlatmaq istərdik ki, erməni terror təşkilatı olan ASALA-nın təsisçilərindən olmuş və onlarla mülki insanın terror yolu ilə öldürülməsində şəxsən iştirak etmiş terrorçu Monte Melkonyanın da şərəfinə milli qəhrəman kimi Ermənistanda abidə ucaldılıb.
Radikal ideologiya əsasında həyata keçirilən etnik təmizləmə siyasətinin nəticəsidir ki, Ermənistan dünyada yeganə monoetnik dövlətdir. Ermənistan ərazisində tarixi torpaqlarında azərbaycanlılar etnik təmizləməyə məruz qalıblar. Ermənistanda yaşayan digər millətlər də bu siyasətin qurbanı olublar. SSRİ-nin süqutu ərəfəsində Ermənistan ərazisində 28-dən artıq rus kəndi olduğu halda, indi demək olar ki, onların heç biri qalmayıb.
Ermənistan-Azərbaycan münaqişəsinin həllindən danışan Leonid Sluçkiyin görüşdüyü Ermənistan rəhbərliyinə Ermənistanın Azərbaycana qarşı törətdiyi işğal, təcavüz və qanlı etnik təmizləmə siyasətinə son soymağa dair çağırış etməsi daha təqdirəlayiq olardı.
Leonid Sluçkiyin tarixi təhrif etməsi və siyasiləşdirməsi əvəzinə, rəhbərlik etdiyi komissiyanın gündəliyinə Xocalı faciəsini çıxarması daha düzgün addım olardı.
Real rəqəmlərin fərqində olmayan Leonid Sluçkiy regionda “silah yarışması”ndan danışır. Leonid Sluçkiyin yaddaşını təzələmək istərdik ki, əhalisinin 50 faizə yaxını yoxsulluğun ən ifrat həddində yaşayan və xarici borcu ümumi daxili məhsulu bir neçə dəfə üstələyən Ermənistan ümumi daxili məhsulun adam başına düşən nisbətinə görə dünyada ən çox silahlanmış bir dövlətdir. Ermənistanın ianələr və xarici borclar hesabına silahlanma siyasəti Azərbaycana qarşı işğal və təcavüzün saxlanmasına xidmət edir. İşğal, təcavüz və ilhaqçı siyasətinə son qoyduğu halda Ermənistan silahlanmaya sərf etdiyi vəsaiti bərbad vəziyyətdə olan ölkənin inkişafı naminə istifadə edə bilərdi.
Leonid Sluçkiyin bu səpkidə çıxışı Azərbaycan ilə Rusiya arasında yaxın tərəfdaşlıq münasibətlərinə zərər vura bilər. O, təhrif edilmiş formada Azərbaycanda keçirdiyi görüşlərdən danışır. Bakıda olduğu zaman isə Azərbaycan rəhbərliyi ilə keçirdiyi görüşdə Azərbaycan ərazilərinin işğalına son qoyulmalı olduğunu bildirib və Azərbaycanın ərazi bütövlüyü və suverenliyinə dəstəyini ifadə edib.
Onun qeyd olunan mülahizələri Azərbaycan-Rusiya əlaqələrinin ruhuna zidd olaraq, Azərbaycanın daxili işlərinə qarışmaq kimi başa düşülə bilər”.

Paylaş:

Baxılıb: 699 dəfə