Xədicə İsmayılovanın cinayətləri sübuta yetirilib

Bakı:

23 °C

60 %

2 m/s

Əlaqə

AZ RU EN

Ana səhifə / Siyasət / Xədicə İsmayılovanın cinayətləri sübuta yetirilib

Xədicə İsmayılovanın cinayətləri sübuta yetirilib

27.08.2015 [09:56]

Məhkəmə şahid ifadələri və faktlar əsasında X.İsmayılovanın qeyri-qanuni əməllərini ortaya çıxarıb
Dünən Bakı Ağır Cinayətlər Məhkəməsində Tural Mustafayevi intihar həddinə çatdırmaqda, mənimsəmədə, vergidən yayınmaqda və digər cinayətlərdə ittiham olunan “Azadlıq” radiosunun əməkdaşı Xədicə İsmayılovanın barəsində başlanan cinayət işi üzrə məhkəmə prosesi davam edib. SİA-nın verdiyi məlumata görə, məhkəmə Ramella Allahverdiyeva, Tamilla Nəsrullayeva və Novruz Kərimovdan ibarət tərkibdə, dövlət ittihamçısı Ramazan Hadıyevin iştirakı ilə keçirilib. Prosesdə təqsirləndirilən şəxs Xədicə İsmayılovanın vəkilləri, zərərçəkmiş şəxs Tural Mustafayevin nümayəndəsi Səfər Hüseynov iştirak ediblər.
Məhkəmə iclasında ilk olaraq X.İsmayılovanın vəkilləri məhkəmə istintaqının yenilənməsi üçün vəsatət qaldırıblar. Dövlət ittihamçısı Ramazan Hadıyev isə məhkəmə istintaqının ədalətli şəkildə keçirildiyi və bütün ittihamların tam sübuta yetirildiyini bildirərək, məhkəmə istintaqının yenilənməsi üçün heç bir əsas olmadığını deyib. R.Hadıyev vəsatətin təmin edilməməsini istəyib. Vəsatət təmin olunmayıb.
Sonra X.İsmayılovanın vəkilləri çıxış edərək təqsirləndirilən şəxsi müdafiə xarakterli fikirlər söyləyiblər. Vəkillər X.İsmayılova barəsində bəraət hökmünün çıxarılmasını istəyiblər.
Dövlət ittihamçısı R.Hadıyev isə vəkillərin çıxışlarının həqiqəti əks etdirmədiyini bildirib. Sonra X.İsmayılova son söz söyləmək üçün hakimdən vaxt istəyib. Hakim məhkəmə prosesində fasilə elan edib. Hakim ona hazırlaşmaq üçün vaxt verib. Növbəti məhkəmə iclası 31 avqusta təyin edilib.
Xatırladaq ki, X.İsmayılova Cinayət Məcəlləsinin 125-ci maddəsi (Özünüöldürmə həddinə çatdırma) ilə bağlı irəli sürülən ittihamla həbs edilib. Sonradan ona qarşı Cinayət Məcəlləsinin 179.3.2 (Mənimsəmə və israfetmə - külli miqdarda törədildikdə), 192.2.2 (Qanunsuz sahibkarlıq), 213.1 (Vergi ödəməkdən yayınma) və 308.2-ci (Vəzifə səlahiyyətlərindən sui-istifadə) maddələri ilə yeni ittihamlar irəli sürülüb.
Ümumiyyətlə, X.İsmayılovaya qarşı irəli sürülən ittihamlar zaman-zaman müzakirə obyektinə çevrilib. Məsələn, ona qarşı irəli sürülən özünüöldürmə həddinə çatdırma və ya iqtisadi xarakterli ittihamlar müəyyən dövrlərdə KİV-in diqqət mərkəzində olub. X.İsmayılovanın hələ “Azadlıq” radiosunun Bakı bürosuna rəhbərlik etdiyi zaman yol verdiyi qanun pozuntuları isə sonradan faktlarla ortaya çıxıb. Belə ki, hələ bir müddət öncə radionun Bakı bürosunun keçmiş əməkdaşlarından birinin şikayəti ilə “Azadlıq” radiosunun Azərbaycan xidmətində aparılan yoxlamalar nəticəsində şəffaf iş prinsiplərinin pozulduğu, nizamnaməyə əməl edilmədiyi ortaya çıxıb. Qeyd edilib ki, radionun nizamnaməsinə zidd olaraq kənar maliyyə cəlb edilib. Bu isə X.İsmayılovanın özünün korrupsiyaya yönəlik fəaliyyətindən xəbər verən faktlardır.
Araşdırmalar zamanı ortaya çıxıb ki, radionun Bakı bürosu bir neçə verilişi kənar qaynaqlardan maliyyə cəlb edilməsi əsasında hazırlayıb. Həmin verilişlər bir neçə il efirdə olduğu üçün söhbətin ciddi məbləğlərdən getdiyi aydındır. “Azadlıq” radiosunun Bakı bürosunun hesabına rəsmi qaydada daxil olmayan bu pullar məhz X.İsmayılovanın qeyri-şəffaf və antimilli fəaliyyətinin “qazanc”ı sayılıb.
Beləliklə, bu sadalananlar da X.İsmayılovanın birbaşa antimilli mərkəzlərlə əlbir olaraq Azərbaycanın milli maraqlarına qarşı pullu xidmətlər göstərdiyini bir daha ifşa edərək ortaya çıxarır. Aydın olur ki, X.İsmayılovanın sevdiyi “korrupsiya” sözü elə onun özünün əməlinin əsas prioriteti imiş. Yəni, hamını korrupsiyada ittiham edən Xədicə İsmayılova özü korrupsiya mənbəyi imiş. Bir sözlə, illərdir ki, ermənipərəst dairələrlə, konkret olaraq bir neçə mərkəzlərlə əlbir olan və Azərbaycanın milli mənafeyinə qarşı cəbhə açan X.İsmayılovanın məhkəmədə də əsl siması açılıb. Daha doğrusu, məhkəmə şahid ifadələri və faktlar əsasında X.İsmayılovanın qeyri-qanuni əməllərini ortaya çıxarıb.
Pərviz SADAYOĞLU

Paylaş:

Baxılıb: 573 dəfə