Komitə sədri Qətərin ölkəmizdəki səfiri ilə görüşüb

Bakı:

26 °C

45 %

4 m/s

Əlaqə

AZ RU EN

Ana səhifə / Siyasət / Komitə sədri Qətərin ölkəmizdəki səfiri ilə görüşüb

Komitə sədri Qətərin ölkəmizdəki səfiri ilə görüşüb

17.01.2017 [09:52]

Yanvarın 16-da Dini Qurumlarla İş üzrə Dövlət Komitəsinin sədri Mübariz Qurbanlı Qətər Dövlətinin ölkəmizdəki fövqəladə və səlahiyyətli səfiri Yusif bin Həsən əl-Saini qəbul edib. Görüşdə ölkələr arasında mövcud olan ikitərəfli münasibətlər müzakirə olunub.
Qonağı səmimi salamlayan Dövlət Komitəsinin sədri Mübariz Qurbanlı xalqımızın Ümummilli lideri Heydər Əliyev tərəfindən əsası qoyulmuş dövlət-din münasibətləri, Konstitusiyada təsbit edilmiş vicdan azadlığı, ölkəmizdə hökm sürən tolerantlıq mühiti, ayrı-ayrı dinlər və etiqadlar arasında qarşılıqlı hörmət və etimada əsaslanan əməkdaşlıq münasibətləri, eləcə də bu münasibətlərin tənzimlənməsi sahəsində fəaliyyət göstərən Dini Qurumlarla İş üzrə Dövlət Komitəsi barədə məlumat verib. Komitə sədri Cənubi Qafqazın ən qədim məscid kompleksi olan Şamaxı Cümə məscidinin 743-cü ildə məhz ölkəmizdə inşa edildiyini diqqətə çatdırıb. Bildirib ki, Cənubi Qafqazın ən böyük məscidi olan Heydər məscidinin də Azərbaycanda inşa edilməsi dinə dövlət qayğısının bariz nümunəsidir. Ölkəmizdə məscidlərlə yanaşı, kilsə və sinaqoqların da inşa edildiyini vurğulayan Mübariz Qurbanlı Azərbaycanda bütün dini konfessiya nümayəndələrinin əsrlərdir sülh və qardaşlıq şəraitində yaşadığını bildirib. Komitə sədri Azərbaycanda dini konfessiyaların qarşılıqlı anlaşma şəraitində fəaliyyət göstərdiklərini və müsəlman dini icmalarla yanaşı, qeyri-İslam dini icmalarına da dövlətimiz tərəfindən mütəmadi maliyyə yardımı göstərildiyini deyib.
İki ölkənin uğurla inkişaf edən münasibətlərinə toxunan Mübariz Qurbanlı vurğulayıb ki, Azərbaycanla Qətər üzvü olduqları İslam Əməkdaşlıq Təşkilatı çərçivəsində və ikitərəfli istiqamətdə yüksək səviyyədə əməkdaşlıq edirlər. Eyni zamanda, Komitə sədri Prezident İlham Əliyev tərəfindən 2017-ci ilin Azərbaycanda “İslam Həmrəyliyi ili” elan edilməsinin dünyada İslam həmrəyliyinin gücləndirilməsinə nail olacağına əminliyini vurğulayıb. Qeyd edib ki, “İslam Həmrəyliyi ili” münasibətilə bir sıra beynəlxalq tədbirlərin keçirilməsi nəzərdə tutulub.
Qətər Dövlətinin səfiri Azərbaycan xalqının milli-mənəvi, dini dəyərlərinə sadiq olduğunu, ölkəmizdə hökm sürən tolerant və multikultural mühitdən məmnunluğunu bildirib. Azərbaycan və Qətər arasında siyasi əlaqələrin səviyyəsindən razılığını ifadə edən diplomat iki ölkənin müvafiq qurumları arasında əməkdaşlığın inkişaf etdirilməsinin əhəmiyyətindən danışıb. Qətər və Azərbaycanın dost ölkələr olduğunu və əlaqələrimizin yüksələn xətt üzrə inkişaf etdiyini qeyd edən səfir münasibətlərin daha da dərinləşdiyini vurğulayıb.
Diplomat Prezident İlham Əliyevin Sərəncamı ilə 2017-ci ilin Azərbaycanda “İslam Həmrəyliyi ili” elan edilməsinin İslam ölkələri arasında münasibətlərin daha da inkişaf etməsinə böyük töhfə olacağına əminliyini vurğulayıb, “İslam Həmrəyliyi ili” və IV İslam Həmrəyliyi Oyunları çərçivəsində həyata keçiriləcək tədbirlərə Qətər Fondunun da daim dəstək verməyə hazır olduğunu diqqətə çatdırıb.
Qarşılıqlı hörmət və səmimiyyət şəraitində keçən görüşün sonunda səfir qəbula görə Dövlət Komitəsinin sədrinə təşəkkürünü bildirib.

Paylaş:

Baxılıb: 525 dəfə