Londonda Qubadlının işğalına qarşı etiraz aksiyası erməniləri özlərindən çıxarıb

Bakı:

27 °C

40 %

7 m/s

Əlaqə

AZ RU EN

Ana səhifə / Siyasət / Londonda Qubadlının işğalına qarşı etiraz aksiyası erməniləri özlərindən çıxarıb

Londonda Qubadlının işğalına qarşı etiraz aksiyası erməniləri özlərindən çıxarıb

01.09.2017 [20:27]

Londonun səs-küylü küçələrinin birində musiqiçinin cəld barmaqlarının toxunuşu, virtuoz şəkildə ifa edilən skripkanın səsi insan fəryadına bənzəyirdi. Yağış və tutqun səma bu kədərli hadisəyə xüsusi ton verirdi. Matəm içində olduğunu bildirmək üçün qaraya bürünmüş skripkaçı Qubadlı rayonunun işğalı günündə Azərbaycanın kədərli musiqisini ifa edirdi. Qubadlı rayonu erməni silahlı qüvvələri tərəfindən 24 il əvvəl, avqustun 31-də işğal edilib.
Avropa Azərbaycan Cəmiyyətindən AZƏRTAC-a verilən məlumata görə, London küçələrində şəxsi mövqe ilə bağlı dinc ifanın Böyük Britaniya qanunlarına uyğun olmasına baxmayaraq, Ermənistan səfirliyinin diplomatı musiqiçinin bu hərəkətinə emosional tərzdə reaksiya verib. Erməni diplomat hətta musiqiçinin əlindən skripkanı almağa belə cəhd göstərib. Avropa Azərbaycan Cəmiyyətinin (TEAS) London nümayəndəliyinin başçısı Cek Peqoraro Qubadlının işğalı günü barədə məlumat verdikdən sonra erməni diplomat Azərbaycan torpaqlarının Ermənistan silahlı qüvvələri tərəfindən işğal edilməsi faktına sərt cavab verib. O, əsəblərini cilovlaya bilməyib və sonda polis çağırıb. Hadisə yerinə gələn polis əməkdaşı bildirib ki, bura Böyük Britaniyadır. Burada hər kəsin öz dinc etirazını nümayiş etdirmək hüququ var.
Əsrarəngiz dağlar, möhtəşəm mənzərələr, tarixi abidələr, eləcə də zəngin flora və fauna ilə yaddaşlara həkk olmuş Qubadlının işğalı zamanı 238 dinc sakin qətlə yetirilib. İşğaldan sonrakı beş il ərzində isə 148 nəfər aldığı xəsarətdən vəfat edib.
1993-cü il oktyabrın 14-də BMT Təhlükəsizlik Şurası erməni qoşunlarının Qubadlı ilə bərabər Füzuli və Cəbrayıl bölgələrindən dərhal çıxarılmasını tələb edən 874 saylı qətnamə qəbul edib. Bu, BMT Təhlükəsizlik Şurasının Dağlıq Qarabağ münaqişəsi ilə bağlı qəbul etdiyi dörd qətnamədən biridir. Qəbul edildikləri tarixdən 20 ildən artıq bir müddət keçməsinə baxmayaraq, bu qətnamələrin tələbləri hələ də yerinə yetirilməyib.
Cek Peqoraro deyib: “Bugünkü etiraz aksiyası Azərbaycanın Qubadlı rayonunun işğalının 24 illiyi ilə bağlıdır. Qara paltar geyinmiş üzübağlı bir xanımın “Bayatı-Şiraz” və “Sarı gəlin” musiqili əsərlərini ifa etməsi qətlə yetirilən və ya yurd-yuvalarından didərgin salınan azərbaycanlılara həsr edilir. Ermənistan səfirliyinin qarşısına yığışaraq biz ermənilərin yadına salmaq istəyirik ki, Azərbaycan Dağlıq Qarabağ bölgəsinin və ona bitişik rayonların işğalı ilə heç zaman barışmayacaq”.

Paylaş:

Baxılıb: 526 dəfə