Ermənistan geri çəkilir

Bakı:

25 °C

52 %

2 m/s

Əlaqə

AZ RU EN

Ana səhifə / Siyasət / Ermənistan geri çəkilir

Ermənistan geri çəkilir

04.12.2009 [09:26]

Mübariz Qurbanlı: Hazırda Ermənistan-Azərbaycan, Dağlıq Qarabağ münaqişəsinin sülh yolu ilə həlli istiqamətində əlverişli şərait yaranıb
“ATƏT-in Xarici İşlər Nazirləri Şurasının Afinada keçirilən toplantısında Ermənistan-Azərbaycan, Dağlıq Qarabağ münaqişəsi ilə əlaqədar qəbul olunmuş bəyanatda danışıqlar prosesinin davam etdirilməsi fikri xüsusi qeyd olunmaqla, eyni zamanda, danışıqların müəyyən baza prinsipləri əsasında nəticə verəcəyi fikri ifadə edilib. Afina bəyanatı Ermənistanın bundan əvvəlki danışıqlardakı iddialarına bir növ cavab olub”. Bu sözləri YAP İcra katibinin müavini, Milli Məclisin deputatı Mübariz Qurbanlı deyib.
M.Qurbanlı xatırladıb ki, Ermənistan tərəfi son dövrlərdə həddindən artıq iddialı çıxış etməkdəydi. Prezident İlham Əliyev Goranboy rayonuna səfəri zamanı Ermənistanın bu iddialarına cavab olaraq Azərbaycanın nəticəsiz danışıqları davam etdirməyəcəyini bəyan etdi. Dövlətimizin başçısı, eyni zamanda, Azərbaycanın BMT-nin bəyan etdiyi prinsiplər əsasında öz ərazi bütövlüyünün digər vasitələrlə, hərbi yolla bərpası istiqamətində addımlar atacağını vurğuladı. Bu isə Ermənistanı iddialarından geri çəkilməyə məcbur etdi.
YAP İcra katibinin müavini qeyd edib ki, qarşı tərəfin iddiaları Prezidentimizin sərt mövqeyi nəticəsində aradan qalxıb və hər iki prezidentin Münhen görüşündə Ermənistan yenidən danışıqlar prosesində müəyyən dərəcədə əməli mövqe nümayiş etdirib. Onun fikrincə, ATƏT-in Xarici İşlər Nazirləri Şurasının toplantısında da verilən bəyanatlar Ermənistanın həmin iddialarından geri çəkildiyini göstərir.
“Yəni, bu, pozitiv hadisədir. Bu amil perspektivdə danışıqların daha sürətlə getməsinə təkan verəcək. Hazırda münaqişənin sülh yolu ilə həlli istiqamətində əlverişli şərait yaranıb. Bu əlverişli vəziyyətdən həm beynəlxalq təşkilatlar, həm də tərəflər istifadə etməlidir. Təbii ki, Azərbaycan danışıqlar yolu ilə problemi həll etməyə üstünlük verir. Amma danışıqlar istənilən nəticəni verməsə BMT-nin Nizamnaməsinin 51-ci maddəsinə görə təcavüzə məruz qalan ölkə öz ərazisini hərbi yolla azad etmək hüququna malikdir və Azərbaycan bu hüquqdan istifadə edə bilər. Eyni zamanda, Azərbaycan Ermənistanın ölkəmizə qarşı təcavüzünü təsbit edən digər sənədlərə istinad edərək hərbi yolla işğal olunmuş torpaqları azad etmək hüququna malikdir. Lakin Azərbaycan tərəfi böyük səbr nümayiş etdirir. Bu böyük səbrin qarşısında həm beynəlxalq təşkilatların, həm də təcavüzkar Ermənistanın nəticə çıxaracağını gözləyirik”, - deyən M.Qurbanlı vurğulayıb ki, əgər nəticə çıxarılmasa Azərbaycan dövləti öz torpaqlarını hərbi yolla azad etmək yolunu seçmək məcburiyyətində qalacaq.
YAP İcra katibinin müavini təəssüflə bildirib ki, beynəlxalq aləmdə mövcud olan ikili standartlar və bəzi dövlətlərin təcavüzkarı şirnikləndirmək siyasəti, Ermənistan kimi işğalçının yerində oturdulmaması belə hallara, yəni münaqişənin uzanmasına gətirib çıxarır: “Bütün bunlar beynəlxalq hüquq və normaların altına qoyulan gec partlayan mina rolunu oynayır. Gərək biz bunun qarşısını alaq. Azərbaycan Prezidenti İlham Əliyev də praqmatik və hücumçu diplomatiya xəttinə istinad edərək Ermənistanın təcavüzkarlığının qarşısını almaq üçün böyük səylər göstərməkdədir”.

Paylaş:

Baxılıb: 1210 dəfə