Şanxay Əməkdaşlıq Təşkilatının müşahidə missiyası 9 fevral seçkilərini yüksək qiymətləndirib

Bakı:

28 °C

74 %

7 m/s

Əlaqə

AZ RU EN

Ana səhifə / Siyasət / Şanxay Əməkdaşlıq Təşkilatının müşahidə missiyası 9 fevral seçkilərini yüksək qiymətləndirib

Şanxay Əməkdaşlıq Təşkilatının müşahidə missiyası 9 fevral seçkilərini yüksək qiymətləndirib

11.02.2020 [09:55]

Fevralın 10-da Şanxay Əməkdaşlıq Təşkilatının (ŞƏT) müşahidə missiyası Azərbaycan Respublikasının Milli Məclisinə keçirilən seçkilərlə əlaqədar mətbuat konfransı keçirib. Mətbuat konfransını giriş sözü ilə açan ŞƏT müşahidə missiyasının məsul katibi Daniyar Çirkeyev təşkilatın Milli Məclisə keçirilən seçkilərdə apardığı müşahidə prosesi haqqında məlumat verib.
Daha sonra Şanxay Əməkdaşlıq Təşkilatının müşahidə missiyasının rəhbəri, ŞƏT-in baş katibinin müavini Şerali Conon fevralın 9-da keçirilən seçkilərin təşkili, gedişi və əldə edilən nəticələr barədə danışıb.
Ş.Conon əvvəlcə bildirib ki, ŞƏT katibliyi Milli Məclisə seçkilərin Azərbaycanın Seçki Məcəlləsinə müvafiq olaraq keçirilməsini izləyəcək müşahidəçilər qrupunun formalaşdırılmasına hələ 2019-cu ilin dekabrında başlayıb. Ş.Conan qeyd edib ki, ŞƏT missiyası hazırlıq prosesi ilə tanış olub.
Daha sonra o vurğulayıb ki, seçkilərə hazırlıq yüksək səviyyədə olub və parlament seçkiləri beynəlxalq standartlara uyğun keçirilib: “Mərkəzi Seçki Komissiyasının (MSK) saytında namizədlər haqqında məlumat yerləşdirilmişdi. Seçki məntəqələrinin bir çoxunda səsvermənin gedişini real vaxt rejimində müşahidə imkanı əldə etmək üçün şərait yaradılmışdı. MSK-da “qaynar xətt” fəaliyyət göstərirdi, vətəndaşların müraciətlərinə diqqətlə baxılırdı. Ümumiyyətlə, seçkilərin beynəlxalq standartlara və Azərbaycan qanunvericiliyinə uyğun keçirilməsi üçün bütün şərait yaradılmışdı. Seçkilərin bu səviyyədə keçirilməsi Azərbaycan qanunvericiliyinin səmərəliliyinin göstəricisidir”.
Müşahidə missiyasının rəhbəri Ş.Conon xatırladıb ki, ŞƏT-in seçkiləri müşahidə missiyası Abşeron və Qaradağ rayonları, Gəncə, Sumqayıt, Şirvan şəhərlərində yerləşən 204 məntəqədə müşahidə aparıb: “Seçki günü ŞƏT missiyasının apardığı monitorinq nəticəsində məlum olub ki, seçkilərə hər hansı müdaxilə və maneə baş verməyib”.
ŞƏT-in müşahidəçilər missiyasının digər üzvü, Rusiya Federasiyası Mərkəzi Seçki Komissiyasının üzvü Siyabşah Şapiyev seçki məntəqələrində apardıqları müşahidə və təəssüratlarını bölüşüb. Onun sözlərinə görə, əvvəldən axıra qədər seçki prosesini izləyiblər: “Seçkilər çox yüksək səviyyədə keçdi və havaların soyuq olmasına baxmayaraq, seçicilər gəlib öz vətəndaşlıq borclarını yerinə yetirdilər”.
Özbəkistan Mərkəzi Komissiyasının üzvü Baxican Yunusov Milli Məclisə keçirilən seçkilərin Azərbaycan Seçki Məsəlləsinin tələblərinə uyğun olaraq keçirildiyini, onun müşahidə apardığı 46 saylı Şirvan seçki dairəsində yerli müşahidəçilərin də fəallıq göstərdiyini, seçkilərin şəffaf və demokratik şəkildə baş tutduğunu qeyd edib.
Qazaxıstan Mərkəzi Seçki Komissiyasının nümayəndəsi Kanat Nauruzbayev isə Abşeron rayonunda yerləşən dairələrdə apardığı müşahidənin nəticələrini diqqətə çatdırıb: “Səsvermə xalqın öz iradəsini azad şəkildə ifadə etməsi şəraitində beynəlxalq standartlara və normalara uyğun şəkildə keçirilib. Buna görə də dost və qardaş Azərbaycan xalqını təbrik edir, onlara çiçəklənmə və rifah arzulayıram”.
Qaşqay ZİYƏDDİNOĞLU

Paylaş:

Baxılıb: 538 dəfə