Azərbaycan Prezidenti Administrasiyasının nümayəndə heyəti Ankarada səfərdədir

Bakı:

8 °C

87 %

2 m/s

Əlaqə

AZ RU EN

Ana səhifə / Siyasət / Azərbaycan Prezidenti Administrasiyasının nümayəndə heyəti Ankarada səfərdədir

Azərbaycan Prezidenti Administrasiyasının nümayəndə heyəti Ankarada səfərdədir

01.04.2010 [08:49]

Ramiz Mehdiyev: Bu gün mən öz Vətənimə gəlmişəm və burada öz qardaşlarımla görüşürəm
Azərbaycan Prezidenti Administrasiyasının rəhbəri Ramiz Mehdiyevin başçılıq etdiyi nümayəndə heyəti Türkiyəyə rəsmi səfərə gəlib.
Ankaranın Esenboğa hava limanında nümayəndə heyətini Türkiyə Prezidenti katibliyinin baş katibi Mustafa İsen, Azərbaycanın Türkiyədəki səfiri Zakir Həşimov qarşılayıblar.
Azərbaycanın nümayəndə heyəti Anıtqəbirə gəlib. Türkiyə Cümhuriyyətinin banisi Mustafa Kamal Atatürkün mavzoleyinə əklil qoyulub. Sonra Ramiz Mehdiyev fəxri qonaqlar kitabına ürək sözlərini yazdı və Anıtqəbirdəki muzeylə tanış olub.
Prezident Administrasiyasının rəhbəri Ramiz Mehdiyevin başçılıq etdiyi nümayəndə heyəti əvvəlcə Türkiyə Milli Təhlükəsizlik Şurasında qurumun baş katibi Sərdar Kılıç ilə görüşüb. Görüşdə qardaş ölkələrimiz arasında münasibətlərin yüksək səviyyədə olduğu vurğulanıb, əməkdaşlığın perspektivləri ətrafında fikir mübadiləsi aparılıb.
Sonra nümayəndə heyəti Türkiyə Böyük Millət Məclisinin xarici əlaqələr komitəsinin sədri Murad Mərcanla görüşüb. Azərbaycandan gəlmiş hörmətli qonaqları salamlayan Murad Mərcan bildirib ki, Türkiyədə iqtidar və müxalifətdə olmağından asılı olmayaraq, bütün deputatlar qardaş Azərbaycanın problemlərini öz problemləri kimi dəyərləndirirlər.
Ramiz Mehdiyev bildirib ki, bu gün mən öz Vətənimə gəlmişəm və burada öz qardaşlarımla görüşürəm. Ulu öndər Heydər Əliyevin “Biz bir millət, iki dövlətik” kəlamının arxasında dərin mahiyyət dayanır. Bu, ilk növbədə türk xalqlarının tarixi keçmişi ilə bağlıdır. Biz həqiqətən bir millətik. Sadəcə, tarixi proseslər iki dövlətin yaranmasına səbəb olmuşdur. Bu gün dövlətlərimiz arasında əlaqələr ən yüksək zirvədədir. Burada qardaşlarımla fikir mübadiləsi aparmaq, söhbət etmək mənə çox xoşdur.
Azərbaycan Prezidenti Administrasiyası rəhbərinin başçılıq etdiyi nümayəndə heyəti daha sonra Ankaradakı Qazi Universitetinə gəlib. Universitetin rektoru Rıza Ayhan qonaqlara bu ali təhsil ocağı barədə ətraflı məlumat verib. Universitetlə tanışlıqdan sonra Ramiz Mehdiyev konfrans zalında “Azərbaycanın müasir vəziyyəti və Azərbaycan-Türkiyə əlaqələri” mövzusunda məruzə edib. Natiq bildirib ki, müstəqil Azərbaycanın dövlət quruculuğu 1993-cü ildə Ulu öndər Heydər Əliyevin hakimiyyətə qayıdışı ilə başlayıb. İqtisadi yüksəlişin təməlini qoyan “Əsrin müaqviləsi” imzalandıqdan sonra ölkəmizdə demokratik, hüquqi dövlət quruculuğu prosesi güclənib. Ulu öndərin siyasi kursunun layiqli davamçısı İlham Əliyev bütün varlığıı ilə öz xalqına xidmət göstərir. Dövlətimizin başçısı bütün ölkə həyatının modernləşməsi, iqtisadi və siyasi sistemin Avropa standartları səviyyəsinə qaldırılması, rəqabətədavamlı innovasiyalı cəmiyyət quruculuğunu prioritet sahələr elan edib. Azərbaycan Cənubi Qafqazın ən dinamik inkişaf edən ölkəsidir və ümumi daxili məhsulun artım həcminə görə dünyada da liderdir. Xarici siyasət isə balanslaşdırılmış təməldə aparılır. Bu siyasətdə qardaş Türkiyənin xüsusi yeri var. Bizim münasibətlərimizin regionda və dünyada analoqu yoxdur. Müstəqilliyinin ilk günlərindən Türkiyənin dəstəyini hiss edən Azərbaycan indi güclənmiş və Türkiyəyə də dəstək olub.
Məruzədən sonra Ramiz Mehdiyev tələbələrin suallarını cavablandırıb. Universitetin rəhbərliyinin adından ona xatirə hədiyyəsi təqdim olunub.
Ramiz Mehdiyevin başçılıq etdiyi nümayəndə heyəti çankaya köşkünə gələrək Türkiyə Prezidenti Katibliyinin iş prinsipi ilə də tanış olub. Qonaqlar Atatürkün evini də gəziblər.
Sonra nümayəndə heyəti Bilkənddə Ali Doğramacı Paşa məscidinə gələrək burada Azərbaycanın böyük dostu, professor İhsan Doğramacının məzarı önünə əklil qoyub. Ramiz Mehdiyev Doğramacı ailəsini də ziyarət edib, onlara başsağlığı verib.
Nümayəndə heyətinin Türkiyəyə səfəri davam edir.

Paylaş:

Baxılıb: 1045 dəfə