YAP rayon və şəhər təşkilatları sədrlərinin ümumrespublika müşavirəsi keçirilib

Bakı:

15 °C

77 %

7 m/s

Əlaqə

AZ RU EN

Ana səhifə / Siyasət / YAP rayon və şəhər təşkilatları sədrlərinin ümumrespublika müşavirəsi keçirilib

YAP rayon və şəhər təşkilatları sədrlərinin ümumrespublika müşavirəsi keçirilib

10.08.2010 [10:06]

Əli Əhmədov: Bizim seçki strategiyamız ona yönəlib ki, qarşıdan gələn parlament seçkilərində YAP əvvəlki seçkilərdə əldə etdiyindən daha əhəmiyyətli və yüksək qələbə qazansın
Avqustun 7-də qarşıdan gələn parlament seçkiləri ilə əlaqədar Yeni Azərbaycan Partiyasının (YAP) rayon və şəhər təşkilatları sədrlərinin ümumrespublika müşavirəsi keçirilib. Müşavirəni giriş sözü ilə açan YAP Sədrinin müavini-İcra katibi, millət vəkili Əli Əhmədov bildirib ki, Azərbaycan Konstitusiyasına əsasən ölkədə növbəti parlament seçkiləri noyabrın 7-də keçiriləcək. Onun sözlərinə görə, YAP-ı təmsil edən millət vəkillərinin təklifləri əsasında Milli Məclis tərəfindən seçki qanunvericiliyində dəyişiklik edilməsindən sonra seçki kampaniyasının müddəti 60 gün müəyyənləşib və beləliklə də, rəsmi şəkildə kampaniya sentyabrın 8-də başlayacaq: “YAP-da qərarlaşmış ənənəyə görə həmişə istənilən seçki kampaniyasına ciddi şəkildə yanaşırıq, kampaniyaya rəsmi şəkildə start verilməzdən əvvəl də seçki proqramımızın ayrı-ayrı elementlərinin həyata keçirilməsi üçün səylər göstərilir. Yerli strukturlara görüləcək işlərlə bağlı proqram təqdim olunub və artıq bu proqram əsasında müəyyən işlər görülüb. Müşavirədə indiyədək görülən işlərə münasibət bildiriləcək və qarşıda duran vəzifələrlə bağlı tövsiyələr veriləcək”.
Əli Əhmədov bildirib ki, YAP-ın qarşıdan gələn parlament seçkilərində daha böyük siyasi uğurlara ümid bəsləməsi üçün kifayət qədər əsasları var: “Bizim seçki taktika və strategiyamız ona yönəlib ki, qarşıdan gələn parlament seçkilərində YAP əvvəlki seçkilərdə əldə etdiyindən daha əhəmiyyətli və yüksək qələbə qazansın. Belə məqsədi qarşıya qoymağımız bir neçə səbəb və resurslarla əlaqədardır. Birincisi, Azərbaycanda son beş il ərzində həyata keçirilən Prezident siyasəti, onun uğurlarının vətəndaşlar tərəfindən yüksək qiymətləndirilməsi və bunun birbaşa nəticəsi olaraq Azərbaycan iqtidarının, Prezident İlham Əliyevin vətəndaşlar tərəfindən birmənalı və qətiyyətlə dəstəklənməsidir. Digər istinad etdiyimiz ciddi resurs Azərbaycanın Prezidentinin təşəbbüsü ilə bütün regionlarda həyata keçirilən quruculuq, abadlıq, yenidənqurma işləridir ki, bunun nəticəsində ölkəmizin hər bir bölgəsinin siması əhəmiyyətli dərəcədə dəyişib, yeniləşib. Bununla yanaşı həmin bölgədə insanların rifahının yaxşılaşması istiqamətində əhəmiyyətli işlər görülüb. Bu da öz növbəsində hər bölgədə, seçki dairələrində seçicilərimizin bu siyasətə və onun nəticəsi olaraq qarşıdan gələn seçkilərdə YAP tərəfindən irəli sürüləcək namizədlərə münasibətini formalaşdırır. Digər resurs YAP-ın özünün malik olduğu böyük nüfuzla, ictimai dəstəklə əlaqədardır. Bir tərəfdən ölkə Prezidentinin həyata keçirdiyi siyasətə vətəndaşların münasibəti, digər tərəfdən Azərbaycandakı son illər əldə olunun nailiyyətlər və insanların əhval-ruhiyyəsindəki dəyişiklər YAP-ın ictimai nüfuzunu və dəstəyini əhəmiyyətli dərəcədə artırıb”.
YAP üzvlərinin sayının yarım milyonu ötdüyünü deyən Əli Əhmədov xatırladıb ki, 2005-ci ildə bu göstərici 400 min nəfərdən aşağı idi. Onun fikrincə, hazırda partiya üzvlərinin sayının 500 min nəfəri ötməsi ciddi amildir. “Bu insanlar seçicilər kimi YAP-ın bir tərəfdən ictimai nüfuzunu və dayaqlarının möhkəmliyini ifadə edir. Digər tərəfdən, partiyamızın üzvləri olaraq seçkilərdə iştirak edən və səs verəcək Azərbaycan vətəndaşlarının sayının əhəmiyyətli dərəcədə artmasından xəbər verir ki, bu da seçkilərdə YAP-ın daha ciddi və böyük vəzifələri qarşısına qoyması üçün çox etibarlı əsas yaradır” deyən YAP Sədrinin müavini qeyd edib ki, partiyamızın parlament seçkiləri ərəfəsində istinad etdiyi digər resurs isə indiyə qədər topladığı böyük seçki təcrübəsidir. Əli Əhmədovun sözlərinə görə, YAP-ın hər bir yerli təşkilatının, partiyada birləşən bütün insanların fədakarlığının nəticəsində toplanmış seçki təcrübəsi qarşıdan gələn parlament seçkilərində də müəyyənləşdirilən vəzifələrin layiqincə, uğurla yerinə yetirilməsinə ciddi əsaslar yaradır. “Güman edirəm ki, bütün bunların hamısı parlament seçkilərinə hazırlıq dövründə bir daha yerli strukturlar tərəfindən diqqətlə dəyərləndiriləcək, malik olduğumuz resursların səfərbər edilməsi istiqamətində çox əhəmiyyətli işlər aparılacaq və bütün görülən işlər nəticə etibarı ilə partiyanın deputat sayının artması ilə müşayiət olunacaq”.
Müşavirədə, həmçinin, YAP İcra katibinin müavini, millət vəkili Siyavuş Novruzov çıxış edərək hazırkı mərhələ qarşıda duran vəzifələri partiyanın rayon və şəhər təşkilatları sədrlərinin diqqətinə çatdırıb.
Nardar BAYRAMLI

Paylaş:

Baxılıb: 1051 dəfə