YAP Gənclər Birliyinin Azərbaycan gənclərinə müraciəti

Bakı:

15 °C

67 %

5 m/s

Əlaqə

AZ RU EN

Ana səhifə / Siyasət / YAP Gənclər Birliyinin Azərbaycan gənclərinə müraciəti

YAP Gənclər Birliyinin Azərbaycan gənclərinə müraciəti

26.02.2011 [22:52]

Yeni Azərbaycan Partiıyası Gənclər Birliyi Azərbaycan gənclərinə müraciət ünvanlayıb. Müraciətdə deyilir: “Əziz gənclər! Ermənistan-Azərbaycan, Dağlıq Qarabağ münaqişəsinin ağır nəticələri hər birimizə yaxşı məlumdur. Belə ki, erməni təcavüzü nəticəsində ölkəmiz ərazilərinin 20 faizini itirmiş, misilsiz maddi və mənəvi itkilərə məruz qalmışdır. Erməni işğalı xalqımıza qarşı kütləvi qırğınlarla müşayiət olunmuşdur ki, bunların da ən dəhşətlisi Xocalı soyqırımıdır. Xocalı faciəsindən ötən 19 il ərzində ümummilli lider Heydər Əliyev və Prezident İlham Əliyev tərəfindən soyqırım faktının dünya ictimaiyyətinə çatdırılması istiqamətində mühüm işlər görülmüşdür. Hazırda Heydər Əliyev Fondu tərəfindən başlanılan “Xocalıya ədalət” kampaniyası dünya miqyasında geniş vüsət almış, erməni təbliğatına ciddi zərbə vurmuşdur. Bu istiqamətdə fondun vitse-prezidenti və Rusiyadakı nümayəndəliyinin rəhbəri, Rusiyanın Azərbaycanlı Gənclər Təşkilatının sədri Leyla xanım Əliyevanın göstərdiyi məqsədyönlü fəaliyyət xüsusilə qeyd edilməlidir.
Lakin təəssüflər olsun ki, dünya birliyi hələ də Xocalı faciəsini soyqırım kimi tanımaqda tərəddüd edir. Bu baxımdan hər bir vətəndaşımızın, xüsusilə də gənclərin üzərinə böyük məsuliyyət düşür. Belə ki, cəmiyyətin ən fəal hissəsi olan gənclər müasir informasiya-kommunikasiya texnologiyalarından, xüsusilə internetin imkanlarından istifadə edərək Xocalı soyqırımı haqqında həqiqətləri dünya ictimaiyyətinə çatdırmaq istiqamətində mühüm işlər görə bilər. Hazırda bütün dünyada geniş şəkildə yayılan sosial şəbəkələrin istifadəçilərinə gənclərimiz tərəfindən Xocalı soyqırımı ilə bağlı ən müxtəlif formada videogörüntülər, fotolar, sənədlər və digər materiallar göndərməklə, erməni təcavüzünün ifşa olunmasına töhfələrini verə bilərlər. Eyni zamanda, xarici ölkələrə səfərlər zamanı gənclərimiz getdikləri hər bir ölkədə faciə ilə bağlı özləri ilə apardıqları kitab, buklet, disk və s. materialları geniş şəkildə yaymaq imkanına malikdirlər. Həmçinin, xaricdə yaşayan həmyaşıdları ilə fərdi ünsiyyət zamanı Xocalı soyqırımı haqqında onlara ətraflı məlumat çatdıra bilərlər. Yuxarıda qeyd olunanları nəzərə alaraq, bütün Azərbaycan gəncliyini Xocalı faciəsini dünyaya çatdırmaq istiqamətində səfərbər olmağa, soyqırım faktının xarici ölkə parlamentləri tərəfindən tanınması naminə aktiv fəaliyyətə çağırırıq. Unutmayaq ki, belə bir tanınma bu faciəni törədənlərin gələcəkdə ədalət məhkəməsinə cəlb olunmasını sürətləndirə bilər. Gücümüz birlikdədir və yalnız bu yolla ermənilərin yalan üzərində qurulmuş təbliğat maşınını sındıra və Xocalı haqqında həqiqətləri dünya birliyinə daha geniş şəkildə çatdıra bilərik”.

Paylaş:

Baxılıb: 1013 dəfə