"Mədəniyyətimizin və mədəni incilərimizin hamisi" kitabının ingilis və ərəb dillərində variantlarının təqdimatı keçirilib

Bakı:

13 °C

94 %

8 m/s

AZ RU EN

Ana səhifə / Siyasət / "Mədəniyyətimizin və mədəni incilərimizin hamisi" kitabının ingilis və ərəb dillərində variantlarının təqdimatı keçirilib

"Mədəniyyətimizin və mədəni incilərimizin hamisi" kitabının ingilis və ərəb dillərində variantlarının təqdimatı keçirilib

23.06.2011 [09:45]

Mədəniyyət və Turizm Nazirliyinin layihəsi olan səkkiz fəsildən ibarət kitabda Mehriban xanım Əliyevanın 1995-2010-cu illərdə mədəniyyət sahəsində çoxşaxəli fəaliyyəti geniş əks olunub
Dünən M.F.Axundzadə adına Milli Kitabxanada Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyevanın mədəniyyət sahəsində çoxşaxəli və yorulmaz fəaliyyətini əks etdirən “Mədəniyyətimizin və mədəni incilərimizin hamisi” kitabının ingilis və ərəb dillərinə tərcümə olunmuş variantlarının təqdimat mərasimi keçirilib.
AzərTAc xəbər verir ki, Mədəniyyət və Turizm Nazirliyinin layihəsi olan səkkiz fəsildən ibarət kitabda Mehriban xanım Əliyevanın 1995-2010-cu illərdə mədəniyyət sahəsində çoxşaxəli fəaliyyəti geniş əks olunub.
Tədbirdə çıxış edən mədəniyyət və turizm nazirinin birinci müavini Vaqif Əliyev Ulu öndər Heydər Əliyevin Azərbaycan mədəniyyətinin inkişafı ilə bağlı gördüyü böyük işlərdən söz açaraq deyib ki, bu siyasi xətt hazırda Prezident İlham Əliyev tərəfindən uğurla davam etdirilir.
Mehriban xanım Əliyevanın Azərbaycan mədəniyyətinin inkişafı, qeyri-maddi mədəni irsin, o cümlədən muğamın qorunması, təbliği, onun bəşəriyyətin inciləri siyahısına daxil edilməsi sahəsində böyük işlər gördüyü xüsusi vurğulanıb.
Qeyd edilib ki, Azərbaycan muğamının, aşıq sənətinin, Novruz bayramının, Azərbaycan xalçasının YUNESKO tərəfindən Bəşəriyyətin Qeyri-Maddi Mədəni İrsi Siyahısına daxil edilməsi məhz Mehriban xanım Əliyevanın həyata keçirdiyi məqsədyönlü işlər sayəsində reallığa çevrilib.
Bildirilib ki, təqdimatı keçirilən kitab Azərbaycan dilində çap edildikdən sonra böyük oxucu marağına səbəb olub. Bundan sonra kitabın rus dilində versiyası işıq üzü görüb. Oxucuların çoxsaylı təklif və arzuları nəzərə alınaraq bu nəşr ərəb və ingilis dillərinə tərcümə edilərək çap olunub. Bu, xarici ölkələrdəki oxucuların Heydər Əliyev Fondunun gördüyü işlərlə bağlı daha geniş məlumat əldə etmələrinə imkan yaradacaq.
Tədbirdə Milli Məclisin deputatı Tahir Rzayev, Bakı Şəhər Mədəniyyət və Turizm İdarəsinin rəisi Əlikram Əliyev, Azərbaycan Milli Elmlər Akademiyası Mərkəzi Elmi Kitabxanasının direktoru, filologiya elmləri doktoru Aybəniz Əliyeva-Kəngərli, Azərbaycan Yazıçılar Birliyinin katibi Rəşad Məcid, Xalq yazıçısı çingiz Abdullayev və başqaları çıxış edərək Mehriban xanım Əliyevanın rəhbərliyi ilə Heydər Əliyev Fondunun gördüyü genişmiqyaslı işlərdən danışıblar.
Bildirilib ki, hər iki kitabın “ön söz”ünün müəllifi mədəniyyət və turizm naziri Əbülfəs Qarayev, elmi rəhbəri Sevda Məmmədəliyeva, layihənin rəhbəri Lalə Kazımova, tərtibçilər isə Lətifə Məmmədova, Əli Eyvazov və Mayıl Əhmədovdur.
Kitablarda çoxlu sayda maraqlı, habelə ilk dəfə oxuculara təqdim olunan məlumatlar və fotoşəkillər verilib.
Hər iki nəşrin hazırlanmasında Prezident Kitabxanasının böyük əməyi olub.
Bu nəşrlərdə Azərbaycan Dövlət Teleqraf Agentliyinin - AzərTAc-ın materiallarından geniş istifadə edilib.

Paylaş:

Baxılıb: 985 dəfə