YAP-ın gəncləri Fransa Respublikasının Senatına müraciət ünvanlayıblar

Bakı:

25 °C

66 %

8 m/s

Əlaqə

AZ RU EN

Ana səhifə / Siyasət / YAP-ın gəncləri Fransa Respublikasının Senatına müraciət ünvanlayıblar

YAP-ın gəncləri Fransa Respublikasının Senatına müraciət ünvanlayıblar

20.01.2012 [12:02]

Dünən Yeni Azərbaycan Partiyasının (YAP) gəncləri Fransa Respublikası Milli Assambleyasının “erməni soyqırımı”nın inkar edilməsinə görə cəza müəyyənləşdirən qanun layihəsinin qəbul edilməsinə etirazlarını bildirmək məqsədi ilə Fransa Respublikasının Senatına müraciət ünvanlayıblar. Müraciətdə qeyd olunur: “Sizə müraciət edən Azərbaycan gənclərinin bir qrupudur. Məqsədimiz həm Fransa Respublikası Milli Assambleyasının “erməni soyqırımı”nın inkar edilməsinə görə cəza müəyyənləşdirən qanun layihəsinin qəbul edilməsinə etirazımızı bildirmək, həm də Fransa Senatını sizin ölkənin parlamentinin aşağı palatasının səhvini və ədalətsizliyini təkrar etməməyə səsləməkdir. Əgər sizi bizim müraciətin motivləri maraqlandırırsa, güman edirik ki, o tamamilə anlaşılandır. Fransa Ermənistan-Azərbaycan, Dağlıq Qarabağ münaqişəsinin nizama salınması məqsədilə ATƏT-in yaratdığı Minsk qrupunun həmsədridir və biz gənc insanlar olaraq xalqımız üçün həlledici qərarın qəbul edilməsinə yardım göstərən ölkənin ədalətsiz addım atmasını arzu etmirik”.
Müraciətin sovet qoşunları tərəfindən Bakı şəhərində törədilən qanlı 20 Yanvar faciəsinin növbəti ildönümünə təsadüf etdiyi vurğulanan məktubda daha sonra qeyd olunur ki, təxminən bir aydan sonra erməni silahlı dəstələri tərəfindən Azərbaycanın Xocalı şəhərinin əhalisinin qətlə yetirilməsinin 20 ili tamam olur: “Bu faciə nəticəsində bir gecənin içərisində 613 nəfər xüsusi qəddarlıqla öldürülmüş (onların 63 nəfəri uşaq, 106 nəfəri qadın, 70 nəfəri isə qoca idi), 487 nəfər dinc insanlar isə ağır bədən xəsarəti almışdır. Xatırladığınız kimi, Fransa parlamenti bu hadisələrin heç biri haqqında heç bir etiraz səsi ucaltmamışdı, baxmayaraq ki, hər iki faciə indi yaşayan nəsillərin gözləri qarşısında baş vermişdir, necə deyərlər, şahidlərin hamısı sağdır”.
Müraciətdə daha sonra bildirilir: “Açıq etiraf etmək istəyirik. Gənc insanlar olaraq Qarabağ münaqişəsinin taleyini həll etməli olan dövlətin nümayəndələrinin “ikili standartlar” prinsiplərindən davranması bizi çox narahat edir. Axı biz Dağlıq Qarabağ münaqişəsi ilə əlaqədar sizdən ədalətli mövqe gözləyirik. İnsanı inamına görə cəzalandırmaq cəhdini də başa düşə bilmirik. Gənc insanlar kimi biz haqqa, ədalətə inanırıq, xeyirxahlığa inanırıq, gələcəyə inanırıq və indi məlum olur ki, Fransada insanı nəyəsə inanmadığına görə cəzandırmaq istəyirlər. Keçmişdə insanlara Allaha inanmadığına görə cəza verirdilər. Sonralar bolşeviklər gəldilər və Sovet İttifaqında insanları Allaha inandığına görə cəzalandırmağa başladılar. Nə yaxşı ki indi bunların heç biri yoxdur”.
Müraciət müəllifləri əmin olduqlarını bildiriblər ki, Fransa Senatı insanı inamına görə cəzalandırmağa əsas ola biləcək qanunu qəbul etməyəcək.
Qeyd edək ki, Fransa Respublikası Milli Assambleyası “erməni soyqırımı”nın inkar edilməsinə görə cəza müəyyənləşdirən qanun layihəsini qəbul edib və həmin qanun layihəsinin yanvarın 23-də Fransa Senatında müzakirəsi gözlənilir.
YAP gənclərinin bu müraciəti dünən Fransa Respublikasının Azərbaycandakı səfirliyinə təqdim edilib və Fransa Senatının hər bir senatoruna göndəriləcək.

Paylaş:

Baxılıb: 972 dəfə