Obyektiv qərar verilməlidir!

Bakı:

11 °C

87 %

2 m/s

Əlaqə

AZ RU EN

Ana səhifə / Siyasət / Obyektiv qərar verilməlidir!

Obyektiv qərar verilməlidir!

14.10.2023 [10:50]

Beynəlxalq Ədalət Məhkəməsi Ermənistanın saxta iddialarını rədd etməlidir

NARDAR

Azərbaycan ərazi bütövlüyünü və suverenliyini təmin etməklə regionda yeni reallıqlar yaradıb. Artıq bir çox ölkələr və beynəlxalq təşkilatlar dövlətimizin yaratdığı yeni reallıqları qəbul edir, Azərbaycanın Cənubi Qafqazda sülh və əməkdaşlıq təşəbbüslərini dəstəkləyirlər. Lakin Azərbaycanın öz ərazi bütövlüyünü, suverenliyini təmin etməsi, artan gücü Ermənistanı və onun havadarlarını ciddi şəkildə narahat edir. Xüsusilə, ötən ay 24 saatlıq antiterror tədbirləri nəticəsində Qarabağda qanunsuz erməni silahlı birləşmələrinin təslim olması və qanunsuz rejimin özünü buraxması Ermənistana və havadarlarına rahatlıq vermir. Məhz bu səbəbdən də vaxtaşırı olaraq ölkəmiz haqqında obyektivlikdən kənar məlumatlar dövriyyəyə buraxılır.

Nə qədər paradoksal olsa da, Ermənistan Azərbaycanın antiterror tədbirləri ilə bağlı Beynəlxalq Ədalət Məhkəməsinə şikayət edib. Oktyabrın 12-də isə Beynəlxalq Ədalət Məhkəməsində İrqi ayrı-seçkiliyin bütün formalarının ləğvi (Ermənistan Azərbaycana qarşı) haqqında ictimai dinləmələrin keçirilib.

Azərbaycanın xarici işlər nazirinin müavini Elnur Məmmədov Beynəlxalq Ədalət Məhkəməsində Ermənistanın Azərbaycana qarşı müraciəti üzrə dinləmələrdə çıxış edərkən bildirib ki, sentyabrın 19-20-də keçirilən lokal antiterror tədbirləri Qarabağda qanunsuz fəaliyyət göstərən erməni hərbi birləşmələri tərəfindən törədilən ciddi təhlükəsizlik təhdidləri səbəbilə baş verib. Nazir müavini qeyd edib ki, 10 noyabr 2020-ci ildəki üçtərəfli bəyanatda Ermənistanın Rusiya sülhməramlılarının yerləşməsinə paralel olaraq Qarabağdan öz qüvvələrini çıxarması tələbi açıq şəkildə göstərilib. Lakin Ermənistan təxminən üç il Azərbaycanın suveren ərazisindəki qanunsuz hərbi birləşmələrə dəstəyini davam etdirib. Bu ilin iyulunda Ermənistanın Təhlükəsizlik Şurasının katibi Ermənistan qoşunlarının hələ də Qarabağda fəaliyyət göstərdiyini etiraf edib və onların bir neçə ay sonra geri çəkiləcəyini bəyan edib ki, bu, faktiki olaraq heç vaxt baş verməyib.

Elnur Məmmədov lokal antiterror tədbirlərinə qədərki bir neçə həftə ərzində Ermənistan qüvvələrinin Qarabağdakı fəaliyyətinin intensivləşdiyini, bu qüvvələrin döyüş hazırlığı vəziyyətinə gətirildiyini, yeni döyüş istehkamları, səngərlər hazırladığını və Azərbaycanın hərbi mövqelərinə yaxın minalar yerləşdirdiyini qeyd edib.

Onu da qeyd edək ki, Ermənistanın müraciəti əsasında dinləmələrin keçirildiyi saatlarda Azərbaycan icması Niderlandın Haaqa şəhərində Beynəlxalq Ədalət Məhkəməsinin önündə “Biz sülh istəyirik!” adlı dinc etiraz aksiyası təşkil edib. Niderland-Belçika Azərbaycanlıları Koordinasiya Şurasının təşkilatçılığı ilə baş tutan aksiya Ermənistanın cəfəng iddialarına və anti-Azərbaycan kampaniyasına etiraz məqsədilə keçirilib. Azərbaycanın Dövlət Himninin səsləndirilməsi ilə başlayan aksiyada çıxış edənlər Ermənistanın 30 ilə yaxın müddət ərzində Azərbaycana və xalqımıza qarşı törətdiyi qəsbkarlıq, təcavüz, etnik təmizləmə, soyqırımları siyasətini, vandallıq aktlarını, mina terrorunu xatırladıblar. Etirazçlar Beynəlxalq Ədalət Məhkəməsindən Ermənistanın saxta iddialarını rədd etməyi, multikultural və sülhsevər Azərbaycanın ərazi bütövlüyünə hörmətlə yanaşmağı tələb ediblər.

Aksiya zamanı “Qarabağ Azərbaycandır!”, “Azərbaycanın ərazi bütövlüyünə hörmət edin!”, “Erməni separatçılığına son qoyulsun!”, “Anti-Azərbaycan kampaniyasına son verin!”, “Azərbaycan sülh istəyir, Ermənistan müharibə istəyir!”, “Xocalını unutma!”, “Cəncə terroru Ermənistan terrorunun nümayişidir!”, “Ruben Vardanyan terrorizmin maliyyəçisidir!”, “Dünya Gəncə terroruna susur!” və sair şüarlar səsləndirilib.

Ümumiyyətlə, rəsmi Bakı tərəfindən dəfələrlə bəyan olunduğu kimi Qarabağda keçirilən antiterror tədbirləri beynəlxalq hüquq normaları çərçivəsindədir. Azərbaycan digər ölkələr kimi öz ərazisində qanunsuz hərbi birləşmələrin, separtizmin qarşısını almaq hüququna sahibdir. Ona görə də, Beynəlxalq Ədalət Məhkəməsi obyektiv qərar qəbul etməlidir.

Paylaş:

Baxılıb: 541 dəfə