Rasizm quyusunun dibində

Bakı:

11 °C

93 %

4 m/s

Əlaqə

AZ RU EN

Ana səhifə / Siyasət / Rasizm quyusunun dibində

Rasizm quyusunun dibində

07.03.2024 [10:10]

Makron Fransası qisasını bir qadın şairənin heykəlindən alacaq qədər dəyərsizləşib

MÜBARİZ

Özünü bütün dünyada “mədəniyyət və demokratiya beşiyi” kimi təsdiqləmək üçün dəridən-qabıqdan çıxan Fransada Azərbaycan mədəniyyətinə qarşı əsl mədəniyyətsizlik, vandalizm və rasizm əməli törədilib. Belə ki, ötən ilin sonlarında zamanında Fransanın Evian-le-Bən şəhərində salınmış “Azərbaycan parkı”nda ölkəmizlə bağlı bütün yazılar yığışdırılıb. Həmçinin Azərbaycanın tanınmış şairəsi Xurşidbanu Natəvanın burada ucaldılmış abidəsi təhqir olunub. Sonradan şəhərin meriyası abidəni “qorumağın” orijinal üsulunu tapdı - daş heykəli ağ parça ilə bürüdü. Bu günlərdə heykəldən təzə xəbər gəlib. Belə ki, Xurşidbanu Natəvanın heykəli Parisdəki Azərbaycan Mədəniyyət Mərkəzinə çatdırılıb. Heykəl Evian-le-Bən şəhərindən martın 4-də götürülüb.

Beləliklə, Natəvanın heykəli artıq Azərbaycanın Fransadakı Səfirliyinin nəzdindəki Mədəniyyət Mərkəzindədir və onun Mərkəzin bağında ucaldılması ilə bağlı işlər davam etdirilir. Verilən məlumata görə, heykəl götürülərkən üzərindəki örtük açılıb və müəyyən olunub ki, abidənin üzərinə qırmızı boya atılmaqla yanaşı (heykəlin gözləri, adının və Azərbaycan yazısının yazıldığı hissələrinə qırmızı boya çəkilib), onun özünə də zərər vurulub. Belə ki, heykəlin burnu və barmaqları qırılıb.

Əslində, Evian-le-Bən şəhərində “Azərbaycan parkı”nın salınması və burada Natəvanın heykəlinin ucaldılması zamanında hər iki tərəfdən ifadə olunan xoş niyyətin ifadəsi idi. Xatırladaq ki, 2015-ci ildə isə Fransanın Evian-le-Bən şəhəri ilə Azərbaycanın İsmayıllı şəhəri arasında əməkdaşlıq müqaviləsi imzalanıb. Həmin müqavilə çərçivəsində 2017-ci ildə Evian-le-Bən şəhərində Leman gölü sahilində “Azərbaycan parkı”nın rəsmi açılış mərasimi baş tutub. Bununla yanaşı, parkda “Dostluq” bulağı yaradılıb və Xurşidbanu Natəvanın heykəli ucaldılıb. Açılış mərasimində qeyd edilib ki, şəhər meriyası ikitərəfli dostluğun rəmzi olan bu parkın həmişə belə gözəl olmasını daim diqqətdə saxlayacaq.

Vəd verilsə də, Fransa tərəfi sözünü yenə də tutmayıb. Qarşımızda Azərbaycanın və Fransanın iki fərqli nümunəsini görürük. Azərbaycan Fransadan kiçik dövlətdir. Ancaq bizim aşılamaq istədiyimiz dəyərlər çox böyükdür. Azərbaycan çoxmillətli, çoxmədəniyyətli cəmiyyəti ilə qürur duyur, multikulturalizmi təbliğ edir. Ölkəmiz elə Fransanın özündə, Parisdə və regionlarda çoxlu sayda tarixi dini-mədəni abidələrin bərpasına sanballı töhfələr verib. Fransanın ayrı-ayrı şəhərlərində təşkil olunan Azərbaycan mədəniyyəti günləri milyonlarla insanın yaddaşında dərin iz buraxaraq onları nəcibliyə, humanizmə, birgəyaşayışa, insana sevgiyə səsləyib. Bəs Fransanın etdiklərini hansı baxış bucağından dəyərləndirmək mümkündür? Sualın cavabı olaraq hansısa bir xoş söz ifadə etmək sadəcə mümkün deyil. XXI əsrdə mədəniyyətə, qadın şairənin heykəlinə barbar münasibət bəslənilməsinə hansı arqumentlərlə haqq qazandırasan? Evian-le-Bən şəhərində “Azərbaycan parkı”na və Natəvanın abidəsinə hörmətsiz münasibət Fransada ksenofobiyanın, başqa mədəniyyətlərə dözümsüzlüyün artmasının ifadəsidir. Açıq-aydın görünür ki, bu ölkədə multikulturalizm dəyərləri arxa plana keçib və irqçi siyasət dövlət siyasəti səviyyəsinə yüksəlib. Natəvanın heykəlinin təhqirlərə məruz qalması Fransa üçün heç vaxt silinməyəcək qara bir ləkədir. E.Makronun Fransası qisasını bir qadın şairənin heykəlindən alacaq qədər dəyərsizləşib və aşağı enib ki, bu da çox utanvericidir.

Paylaş:

Baxılıb: 539 dəfə