Daha 18 ailə...

Bakı:

26 °C

47 %

1 m/s

Əlaqə

AZ RU EN

Ana səhifə / Sosial / Daha 18 ailə...

Daha 18 ailə...

01.08.2024 [10:42]

Laçına növbəti köç baş tutub

Bu gün 30 ilə yaxın torpaq həsrəti çəkmiş keçmiş məcburi köçkünlərimiz doğma torpaqlarına, dədə-baba yurdlarına qayıtmağın sevincini yaşayır. İkinci Qarabağ müharibəsindəki zəfərdən qısa müddət sonra Qarabağın, Şərqi Zəngəzurun əzəli sakinləri yurdlarına dönürlər. Məlumdur ki, işğaldan azad edilən ərazilərdəki şəhər və qəsəbələrin Baş planları hazırlanaraq təsdiqlənib. Əksər bölgələrimizə möhtəşəm köç reallaşıb, bir çox yerlərdə isə fəal inşaat işləri davam etdirilir.

Zəfərdən sonra bu xoşbəxtliyi ilk yaşayanlar Zəngilanın Ağalı kəndinin sakinləri oldu. Bu xüsusda Ağalı kəndinin ötən dövrdə “Ağıllı kənd” konsepsiyasına uyğun qurulmasını xüsusi qeyd etmək lazımdır. Əgər Ağalı kəndi “Böyük Qayıdış”ın ilk müjdəsi idisə, ondan sonrakı köç-Talış və Laçına qayıdış isə bu proqramın necə ciddi, dəqiqliklə hazırlandığını göstərdi.

İlk sakinlərin sayı 97 idi...

Qeyd edək ki, Laçına ilk köç ötən il mayın 28-də baş tutmuşdu. Həmin gün Prezident İlham Əliyev Laçın şəhərinə qayıdan əhali ilə görüşüb, evlərin açarlarını onlara təqdim edib. Birinci mərhələdə şəhərə 20 ailə, yəni 97 nəfər köçürülmüşdü.

Artıq 2031 Laçın sakini var...

Prezident İlham Əliyevin tapşırığına uyğun olaraq keçmiş məcburi köçkünlərin doğma torpaqlarına qayıdışı davam etməkdədir. Dünən Laçın şəhərinə növbəti köç karvanı yola salınıb. Respublikanın müxtəlif ərazilərində yataqxana, sanatoriya, pioner düşərgəsi, yarımçıq tikililər və inzibati binalarda müvəqqəti məskunlaşmış ailələrdən ibarət növbəti köç karvanı iyulun 31-də Bakı şəhərinin Qaradağ rayonundan yola salınıb.

Bu mərhələdə Laçın şəhərinə daha 18 ailə - 60 nəfər köçürülüb. Xatırladaq ki, indiyədək Laçın şəhərinə 552 ailənin, yəni 2031 nəfərin daimi məskunlaşması təmin edilib.

Prezidentin bütün dedikləri reallaşır...

Xatırladaq ki, ölkə başçısı 2023-cü ilin 6 ayının sosial-iqtisadi yekunlarına həsr olunmuş müşavirədə Laçın şəhərinin gələcək inkişaf planı ilə bağlı əlavə addımların atılacağını vurğulamışdı: “Laçın şəhərinin timsalında bunu deyə bilərəm ki, cəmi səkkiz ay ərzində şəhərin böyük hissəsi tamamilə bərpa edilib və yeddi yüzdən çox ailə üçün burada həm fərdi evlər, həm çoxmənzilli evlər hazırlanır.

Laçın şəhərinin gələcək inkişaf planı ilə bağlı əlavə addımlar da atılacaq. Biz bu sahədə görüləcək işləri daim diqqət mərkəzində saxlamalıyıq. Mənim gündəlik fəaliyyətimdə bu məsələ bu gün birinci yerdə dayanan məsələdir və biz daim bütün işlərə nəzarət edirik.

Dəfələrlə həm Laçından, həm də o vaxt işğal edilmiş digər rayonlardan köçkünlərlə görüşəndə onlara ürək-dirək verirdim, deyirdim ki, qayıdacağıq və Laçında daha gözəl evlər tikiləcək. Bax, belə də oldu. Ona görə sizin üçün və sizin kimi keçmiş köçkünlər üçün şərait ən yaxşı olmalıdır, ən gözəl olmalıdır ki, siz uzun əzablı illərdən sonra burada rahat yaşayasınız. Biz çalışacağıq ki, bunu bundan sonra da təmin edək”.

Göründüyü kimi, “Böyük Qayıdış” inamla reallaşır, bütün işlər plan üzrə gedir. Şübhəsiz ki, bundan sonra da işlər sürətli şəkildə gedəcək, işğaldan azad edilmiş ərazilər ölkənin ən abad guşələrindən birinə çevriləcək.

Yeganə BAYRAMOVA

Paylaş:

Baxılıb: 643 dəfə