“Sovetski” adlanan ərazidə inventarlaşdırma işləri davam edir

Bakı:

11 °C

82 %

7 m/s

Əlaqə

AZ RU EN

Ana səhifə / Sosial / “Sovetski” adlanan ərazidə inventarlaşdırma işləri davam edir

“Sovetski” adlanan ərazidə inventarlaşdırma işləri davam edir

29.03.2014 [12:08]

Martın 19-na qədər 302 ailə kompensasiya ilə bağlı müraciət edib ki, bu müraciətlərdən də 166-na baxılaraq həll olunub
Son illər Bakı şəhərinin müasirləşdirilməsi, şəhər sakinlərinin həyat şəraitinin yaxşılaşdırılması istiqamətində mühüm işlər görülür. “Ağ şəhər” layihəsi, Dənizkənarı Milli Parkın genişləndirilməsi, şəhər infrastrukturunun tamamilə yenilənməsi, nəqliyyat sisteminin inkişafı və digər mühüm tədbirlərin həyata keçirilməsi bu işlərin tərkib hissəsidir. Onu da qeyd edək ki, Prezident İlham Əliyevin göstərişi əsasında indiyədək görülmüş işlər sayəsində paytaxt Bakının qəsəbələrinin inzibati ərazilərindəki kommunikasiyalar əsaslı şəkildə təmir olunub, bu ərazilərdəki park və mədəniyyət mərkəzlərinin böyük əksəriyyəti ən müasir üslubda inşa edilərək, insanların istifadəsinə verilib. Heç şübhəsiz həyata keçirilən bu siyasət Bakının müasir mənzərəsinin modernləşməsində, paytaxtın sosial-iqtisadi inkişafının sürətləndirilməsində müstəsna əhəmiyyət kəsb edir.
Onu da vurğulamaq yerinə düşər ki, Bakı şəhərində yenidənqurma işləri və şəhərin müasir görkəmdə daha da inkişafına yönəlmiş tədbirlər qarşıdakı dövrdə daha da sürətləndiriləcək, abadlıq işləri geniş vüsət alacaq.
Elə Bakının “Sovetski” adlanan ərazisində nəzərdə tutulan yenidənqurma və abadlıq işləri də şəhərimizin müasir görkəminə əlavə gözəllik qatacaq. Artıq bununla bağlı müəyyən layihələr, fikir və təkliflər mövcuddur. Məsələn, dünyanın müxtəlif yerlərində çoxsaylı landşaft və park layihələrinin müəllifi memar Laura Peretti Bakının mərkəzində parkın yaradılması ilə bağlı maraqlı layihə təqdim edib. Amma burada diqqət çəkən əsas məsələlərdən biri “Sovetski” sakinlərinin köçürülməsi prosesidir. Məlumdur ki, hökumət bu istiqamətdə müvafiq işlər aparır və bu məqsədlə həmin ərazinin sakinləri ilə də görüşlər keçirilib. Xatırladaq ki, mart ayının əvvəlində sakinlərlə görüşən Baş nazirin müavini Abid Şərifov hökumətin yekun qərarını açıqlamışdı. Hələ o zaman A.Şərifov demişdi ki, görüşdə evlərdə inventarlaşdırma işlərinin davam etdirilməsi ilə bağlı razılıq əldə olunub: “Kim 1 kv.m üçün 1500 manat ödənilməsi təklifi ilə razıdırsa, həmin vəsaiti alaraq köçə bilər”.
Baş nazirin müavini əlavə olaraq hər ailə başına iki aylıq 1000 manat kirayə haqqı, ev əşyalarının daşınması üçün isə 400 manat veriləcəyini qeyd etmişdi: “1 kv.m üçün 1500 manat təklifi qüvvədə qalır. Kimi bu qiymət qane etmirsə, onlarla işimiz yoxdur, evlərində yaşasınlar. Bizim son qərarımız budur”.
A.Şərifov inventarizasiyanın aparılmasının səbəblərini də açıqlayıb: “Biz bilmirik ki, orada nə qədər ailə yaşayır, ümumi sahə nə qədərdir? Nəzərə alınsa ki, mövcud qanunlarımıza görə əhali yalnız razılıqla köçürülə bilər, kim razıdırsa, vəsaitini alsın, istəməyən halallıqla yaşasın. Heç kim zorla köçürülməyəcək, köçürülməyəcəklərsə, yol da tikiləsi olmayacaq. İnventarlaşma 1-2 ay çəkəcək, inventarlaşma başa çatandan, Baş Plan hazırlanandan sonra baxacağıq ki, neçə ev sökülməli, neçə ev qalmalıdır?”
Son günlər isə bəzi şəxslər guya bu ərazidə inventarlaşmanın dayandırıldığı haqqında məlumat yayıblar. Amma hökumət rəsmisi səviyyəsində bu məlumat təkzib olunub. Belə ki, KİV-ə açıqlamasında Bakının “Sovetski” məhəlləsində inventarlaşmanın dayanmadığını deyən A.Şərifovun sözlərinə görə, sadəcə, Novruz bayramı ilə bağlı fasilə verilmişdi.
Artıq martın 27-dən inventarlaşma prosesinin davam etdiyini deyən Baş nazirin müavini inventarlaşmanın yalnız köçmək istəyən sakinlərin evləri və obyektləri ilə bağlı aparıldığını da bildirib: “Yalnız kim bizə müraciət edir, həmin sakinlərin evlərinin və obyektlərinin sahəsi ölçülür. Kim köçmək istəmirsə, qalıb evlərində yaşaya bilər”.
A.Şərifova onu da əlavə edib ki, martın 19-na qədər “Sovetski” məhəlləsində yaşayan 302 ailə kompensasiya ilə bağlı müraciət edib. Komissiya tərəfindən bu müraciətlərdən 166-na baxılaraq həll olunub, 73 obyektin isə pulu artıq ödənilib. Onun sözlərinə görə, hər gün köçürmə ilə bağlı yaradılmış komissiyaya 10-15 müraciət daxil olub və hazırda yenə müraciətlərin daxil olmasına başlanıb. A.Şərifov evlərinin sahəsi az olan sakinlərlə bağlı məsələyə inventarlaşma prosesi başa çatandan sonra baxılacağını qeyd edib.
Göründüyü kimi, hökumət bu ərazi ilə bağlı həyata keçirdiyi tədbirlərdə sakinlərin maraqlarını maksimum nəzərə alır. Və heç şübhəsiz ki, “Sovetski” adlanan ərazidə görülən bu işlər həm Bakının daha da müasirləşməsinə, həm də orada yaşayan əhalinin daha yaxşı yaşayışının təmin olunmasına xidmət edəcək.
Nardar BAYRAMLI

Paylaş:

Baxılıb: 1130 dəfə