Şəkidə indiyədək 24 minə yaxın sakin tibbi müayinədən keçib

Bakı:

11 °C

82 %

7 m/s

Əlaqə

AZ RU EN

Ana səhifə / Sosial / Şəkidə indiyədək 24 minə yaxın sakin tibbi müayinədən keçib

Şəkidə indiyədək 24 minə yaxın sakin tibbi müayinədən keçib

01.04.2014 [09:05]

Prezident İlham Əliyevin tapşırıq və tövsiyələrinə uyğun olaraq əhalinin tibbi müayinədən keçirilməsi aksiyası Şəkidə də mütəşəkkil davam etdirilir.
Şəhər icra hakimiyyəti başçısının müavini Zərinə Cavadova AzərTAc-a bildirib ki, əhalinin sağlamlığının etibarlı şəkildə qorunması, xəstəliklərin erkən aşkar edilərək insanların müalicəyə cəlb olunması məqsədilə keçirilən bu tədbir rayon əhalisinin ürəyincədir. Tibbi müayinələrin məqsədi və əhəmiyyəti barədə əhali arasında müntəzəm olaraq maarifləndirmə işi aparılır. Müayinələr əvvəlcədən tərtib edilmiş cədvəl əsasında həyata keçirilir.
Z.Cavadovanın bildirdiyinə görə, fevralın 17-dən davam edən aksiya çərçivəsində indiyədək 24 minə yaxın rayon sakini tibbi müayinədən keçib. Rayonun 28 yaşayış məntəqəsində əhalinin pulsuz tibbi müayinəsi artıq tam başa çatdırılıb. Qalan yaşayış məntəqələrində tibbi müayinələr mayın 1-dək yekunlaşacaq.
Müayinələrin keçirildiyi rayon mərkəzi xəstəxanasının konsultativ poliklinika şöbəsi bu günlər gücləndirilmiş iş rejimində fəaliyyət göstərir. Müayinə olunmaq üçün hər gün buraya yüzlərlə rayon sakini müraciət edir. Poliklinika şöbəsinin müdiri Nazim Əliyevin bildirdiyinə görə, indiyədək müayinə olunanların 3541 nəfərinə müalicə təyin olunub, 37 nəfər stasionar müalicəyə cəlb edilib. Eyni zamanda, daha ciddi müayinəyə ehtiyacı olan bir neçə rayon sakini Bakı şəhərinin tibb müəssisələrinə göndərilib.
Şəki Birləşmiş Uşaq Xəstəxanasının baş həkimi İmran Əliyev əhalinin pulsuz tibbi müayinədən keçirilməsinin əhəmiyyətini yüksək qiymətləndirərək deyib: “Ölkə rəhbərliyinin uğurla həyata keçirdiyi siyasət nəticəsində son illər səhiyyə sistemində də böyük nailiyyətlər əldə edilmişdir. Bu gün səhiyyənin bir sıra prioritet istiqamətlərinin inkişafı, o cümlədən ana və uşaqların sağlamlığının mühafizəsi dövlət siyasəti səviyyəsinə yüksəldilmişdir. Hazırda ölkə əhalisinin tibbi müayinəsi ilə yanaşı, uşaqların icbari dispanserləşdirilməsi də uğurla davam etdirilir”.
Şəkidə 39 minə yaxın uşağın yaşadığını bildirən baş həkim, onların böyük əksəriyyətinin artıq tibbi müayinədən keçdiyini diqqətə çatdırıb. İmran Əliyev bildirib ki, uşaqların sağlamlığının mühafizəsinə dövlət qayğısının bariz nümunələrindən biri də “Azərbaycan 2020: gələcəyə baxış” İnkişaf Konsepsiyasının tərkib hissəsi olaraq “Ana və uşaqların sağlamlığının yaxşılaşdırılmasına dair 2013-2020-ci illər üçün Dövlət Proqramı”nın qəbul edilməsidir. Bu gün səhiyyənin uğurlarından biri də tibbi demoqrafik göstəricilərin ildən-ilə yaxşılaşdırılmasıdır. Aparılan işlərin məntiqi nəticəsi olaraq ölkədə uşaq və ana ölümü azalıb, uşaqların sağlamlıq vəziyyəti xeyli yaxşılaşdırılıb. Bu sahədə işlər ardıcıl davam etdirilir.

Paylaş:

Baxılıb: 1037 dəfə