Daşkəsən rayonunda Azərbaycan Respublikası Milli Məclisinə seçkilərə hazırlıqla bağlı müşavirə keçirilib

Bakı:

25 °C

66 %

4 m/s

AZ RU EN

Ana səhifə / Sosial / Daşkəsən rayonunda Azərbaycan Respublikası Milli Məclisinə seçkilərə hazırlıqla bağlı müşavirə keçirilib

Daşkəsən rayonunda Azərbaycan Respublikası Milli Məclisinə seçkilərə hazırlıqla bağlı müşavirə keçirilib

27.10.2015 [09:42]

Dünən Daşkəsən rayon İcra Hakimiyyətinin inzibati binasında 1 noyabrda keçiriləcək Azərbaycan Respublikası Milli Məclisinə seçkilərə hazırlıq işləri ilə əlaqədar növbəti müşavirə keçirilib. Tədbirdə çıxış edən Daşkəsən rayon İcra Hakimiyyətinin başçısı Əhəd Abıyev deyib ki, indiyədək ölkəmizdə bütün seçkilər tam şəffaf, demokratik şəraitdə keçirilib, seçicilər ürəklərinin hökmü ilə öz dəstəklədikləri namizədə səslərini veriblər. Daşkəsən rayonunda fəaliyyət göstərən bütün seçki məntəqələrinin parlament seçkilərinin keçirilməsi üçün tam hazır olduğunu söyləyən Ə.Abıyev həmçinin bildirib ki, rabitə, elektrik enerjisi, seçkilər günü ictimai asayişin qorunması, nəqliyyat və digər təchizat işləri ilə bağlı heç bir problem yoxdur: “Seçkilərə hazırlıq yüksək səviyyədədir. Məntəqələr seçicilərin rahatlığını təmin etmək məqsədilə ən təmirli, münasib binalarda yerləşdirilmişdir”.
Daşkəsən rayon İcra Hakimiyyətinin başçısı Əhəd Abıyev onu da bildirib ki, Azərbaycanda mövcud olan ictimai-siyasi vəziyyət ölkə başçısı İlham Əliyevin siyasətinin uğurları, iqtisadiyyatın dinamik inkişafı, əhalinin rifahının yüksəlməsi, bölgələrin sosial-iqtisadi inkişafı, sabitlik, əmin-amanlıq seçkilərin yüksək səviyyədə keçiriləcəyini şərtləndirən vacib amillərdir: “Bütün respublikamızda olduğu kimi rayonumuzda da aparılan geniş və irimiqyaslı tikinti, abadlıq və quruculuq işlərinə, uzun illərdən bəri yığılıb qalan problemli məsələlərin həllinə göstərdiyi köməyə görə ölkə rəhbərinə dərin minnətdarlığımızı bildiririk. Nailiyyətlərimiz və uğurlarımız təbii ki, bundan sonra da davam edəcək. Ölkəmizdə mövcud olan siyasi sabitlik, iqtisadi uğurlar Ulu öndər Heydər Əliyev siyasətinin müdrikliklə, düzgün və inamla aparıldığının göstəricisidir. Rayonumuzda son beş ildə gedən quruculuq və abadlıq işlərinin, sosial-iqtisadi inkişafın canlı şahidlərisiniz. Daşkəsəni problemsiz həyat, xoş gələcək gözləyir”.
Müşavirədə Əhəd Abıyev seçkilərin tam şəffaf, demokratik şəraitdə keçirilməsi üçün öz tapşırıq və tövsiyələrini verib.
Daha sonra müşavirədə Daşkəsən şəhər A.Mürsəlov adına 2 saylı tam orta məktəbin müəllimi Duman Mahmudova, S.Vurğun adına 4 saylı tam orta məktəbin müəllimi Adilə Məmmədova, şəhid anası Qızbəs Abbasova və digərləri çıxış edərək qarşıdan gələn seçkilərə hazırlığın yüksək səviyyədə aparıldığını deyib, toplantı iştirakçılarına seçkilərin tam şəffaf, demokratik şəraitdə başa çatacağına əminliklərini bildiriblər.

Paylaş:

Baxılıb: 774 dəfə