“Kür-Xəzər” Xeyriyyə İctimai Birliyi 20 Yanvar faciəsi ilə bağlı tədbirlər keçirir

Bakı:

19 °C

63 %

5 m/s

Əlaqə

AZ RU EN

Ana səhifə / Sosial / “Kür-Xəzər” Xeyriyyə İctimai Birliyi 20 Yanvar faciəsi ilə bağlı tədbirlər keçirir

“Kür-Xəzər” Xeyriyyə İctimai Birliyi 20 Yanvar faciəsi ilə bağlı tədbirlər keçirir

18.01.2017 [09:39]

Qurumun təşkil etdiyi tədbirlərə “Gürcüstan 9 aprel” fondunun nümayəndələri də qatılacaqlar
Xəbər verildiyi kimi, Azərbaycan Respublikası Prezidenti Administrasiyası rəhbərinin Sərəncamı ilə “20 Yanvar faciəsinin iyirmi yeddinci ildönümünün keçirilməsi ilə bağlı tədbirlər planı” təsdiq edilib. Tədbirlər planında respublikanın şəhər və rayonlarında, o cümlədən idarə və təşkilatlarda 20 Yanvar hadisələri ilə bağlı konfrans, toplantı və mühazirələrin təşkili, mədəniyyət ocaqlarında faciəyə həsr olunmuş tamaşaların göstərilməsi, bədii və sənədli filmlərin nümayiş etdirilməsi, bu tədbirlərin kütləvi informasiya vasitələrində geniş işıqlandırılması, dünya ictimaiyyətinin diqqətini faciəyə yönəltmək məqsədilə Azərbaycanın xarici ölkələrdəki səfirlikləri, diplomatik nümayəndəlikləri, diaspor qurumları və icmaları vasitəsilə müvafiq tədbirlərin keçirilməsi, dünyanın aparıcı kütləvi informasiya vasitələrində, eləcə də televiziya kanallarında və internet şəbəkələrində 20 Yanvar faciəsi barədə materialların verilməsi nəzərdə tutulub.
Öz növbəsində “Kür-Xəzər” Xeyriyyə İctimai Birliyi də 20 Yanvar faciəsinin 27-ci ildönümü ilə bağlı silsilə tədbirlər həyata keçirməkdədir. İctimai Birliyin sədri Akif Kərimov bildirib ki, rəhbərlik etdiyi qurum istər ölkə daxilində, istərsə də sərhədlərimizdən kənarda 20 Yanvar faciəsi ilə bağlı həqiqətlərin, bu faciədə şəhid olmuş qəhrəman Vətən övladlarının azadlıq mübarizəsinin təbliğ olunması istiqamətində iş aparır. 20 Yanvar faciəsinin dünya ictimaiyyətinə daha yaxından tanıdılması üçün xarici ölkələrin qeyri-hökumət təşkilatları ilə yaxından əməkdaşlıq edildiyini diqqətə çatdıran A.Kərimov bu təşkilatlar vasitəsilə Azərbaycan həqiqətlərinin yayılmasına nail olacaqlarına əminliyini ifadə edib: “Gürcüstanda fəaliyyət göstərən “Gürcüstan 9 aprel” fondunun nümayəndələri hər il 20 Yanvar faciəsi ilə bağlı tədbirlərdə iştirak etmək üçün ölkəmizə gəlirlər. Məlum olduğu kimi, imperiya qüvvələri 1989-cu ilin 9 aprelində Gürcüstanın paytaxtı Tbilisi şəhərində də qırğınlar törədiblər. Biz də hər ilin aprel ayında həmin faciə ilə bağlı tədbirlərə qatılırıq. Bu il fondun rəhbəri Vaja Mamulaşvili və qurumun aktiv üzvlərindən Saja Sulkan, Georgi Qiqauri “Kür-Xəzər” Xeyriyyə İctimai Birliyinin dəstəyi ilə tədbirlərə qatılacaqlar. Nümayəndələr Şəhidlər xiyabanını ziyarət edəcək, 20 Yanvar faciəsinə həsr edilmiş tədbirlərdə, mətbuat konfranslarında çıxış edəcəklər”.
PƏRVİZ

Paylaş:

Baxılıb: 607 dəfə