Məntəqə seçki komissiyaları üzvlərinin bilik, bacarıq və vərdişləri təkmilləşdirilir

Bakı:

17 °C

72 %

3 m/s

Əlaqə

AZ RU EN

Ana səhifə / Sosial / Məntəqə seçki komissiyaları üzvlərinin bilik, bacarıq və vərdişləri təkmilləşdirilir

Məntəqə seçki komissiyaları üzvlərinin bilik, bacarıq və vərdişləri təkmilləşdirilir

14.03.2018 [10:11]

38 saylı Nizami II (Gəncə) seçki dairəsi dairə seçki komissiyasında (DSK) məntəqə seçki komissiyalarının sədrləri və üzvləri üçün təşkil edilən maarifləndirici treninqlər davam edir.
AZƏRTAC-ın bölgə müxbiri xəbər verir ki, martın 13-də keçirilən treninqdə 24 seçki komissiyasının sədrləri və üzvləri iştirak edib. 38 saylı Nizami II (Gəncə) seçki dairəsi dairə seçki komissiyasının sədri Tahir Ələkbərov Mərkəzi Seçki Komissiyasının təlimatı və tövsiyəsi əsasında təşkil edilən treninqlərin əhəmiyyətindən danışıb. Məlumat verilib ki, dairə və məntəqə seçki komissiyaları üzvlərinin peşəkarlıq səviyyəsinin artırılması, seçkilər sahəsində onların bilik, bacarıq və vərdişlərinin daha da təkmilləşdirilməsi məqsədilə Mərkəzi Seçki Komissiyasının treninq qrupu tərəfindən yerlərdə keçirilən treninqlərin cədvəli, eləcə də seçki günü əsas seçki hərəkətləri ilə bağlı slaydlar hazırlanıb. İştirakçılar səsvermə günü seçki məntəqələrinin açılışına hazırlıqla, səsvermə saatlarında həyata keçiriləcək tədbirlərlə bağlı təqdimatlarla və slaydlarla izahlı şəkildə məlumatlandırılır. Həmçinin seçki günü əsas qanunamüvafiq seçki hərəkətləri, eləcə də qanunsuz hərəkətlərin qarşısının alınması barədə məlumat verilir.
Treninqdə 38 saylı Nizami II (Gəncə) seçki dairəsi DSK-nın treninq qrupunun üzvü Fatma Rəhimova çıxış edərək prezident seçkilərinə hazırlıq, seçkilərin keçirilməsi, səslərin hesablanması prosesi və səsvermənin nəticələrinin rəsmiləşdirilməsi işində məntəqə seçki komissiyalarının üzvlərinin vəzifələri və fəaliyyətlərinin təşkili məsələlərindən, aşağı seçki komissiyaları tərəfindən seçki hüququnun qorunması mexanizmlərindən danışıb.
Tədbirdə seçici siyahıları ilə iş qaydasından və seçici siyahılarının dəqiqləşdirilməsindən də söz açılıb. Diqqətə çatdırılıb ki, 38 saylı Nizami II (Gəncə) seçki dairəsi dairə seçki komissiyasında seçici siyahıları və bildirişlər artıq hazırdır. Seçicilərin hamısının adı seçici siyahısında öz əksini tapıb. Bildirişlərin qanunda nəzərdə tutulmuş vaxtda seçicilərə çatdırılması təmin olunacaq.
Çıxış edənlər prezident seçkilərinin tam demokratik şəraitdə keçirilməsi üçün komissiya üzvlərinin öz işlərinə məsuliyyətlə yanaşmasının önəmini qeyd ediblər. Bildirilib ki, səsvermə günü qanunvericiliyə əsasən səsvermə prosesi ilə bağlı məlumatların ictimaiyyətə çatdırılması üçün yerli və beynəlxalq müşahidəçilərin, KİV-lərin fəaliyyətinə hər cür şərait yaradılacaq. Seçki komissiyalarının üzvləri yerli və xarici müşahidəçilərlə, mətbuat işçiləri ilə təlimata uyğun işləməyin qaydalarını dəqiq öyrənməlidirlər.
Sonra təlimatçılar iştirakçıları maraqlandıran sualları cavablandırıblar. Treninqlər zamanı hər bir məntəqə seçki komissiyası üzvünə “Seçki günü üçün yaddaş” kitabçası, səsvermənin nəticələri haqqında protokol nümunəsi və bir sıra digər sənəd nümunələri təqdim edilir.
DSK sədri Tahir Ələkbərov AZƏRTAC-ın bölgə müxbirinə müsahibəsində qeyd edib ki, aprelin 11-də keçiriləcək prezident seçkilərinə hazırlıq işləri uğurla aparılır. Məntəqələrdə seçkilərin şəffaf və demokratik keçirilməsi, komissiya üzvlərinin normal fəaliyyəti üçün lazımi şərait yaradılıb.
33 min 754 seçicisi olan dairə seçki komissiyasının ərazisində 24 daimi seçki məntəqəsi fəaliyyət göstərir. Ədliyyə Nazirliyinin Gəncə şəhərində yerləşən 2 saylı istintaq təcridxanası üçün nəzərdə tutulan bir seçki məntəqəsi isə seçkilərin keçirilməsinə 5 gün qalmış fəaliyyətə başlayacaq. Seçicilərdən 340 nəfəri ilk dəfə səs verəcək gənclər, 478 nəfəri yaşı 80-dən yuxarı olan insanlardır. Məntəqələr lazımi texniki avadanlıqla və məlumat kitabçaları ilə tam təchiz edilib.

Paylaş:

Baxılıb: 548 dəfə