Azərbaycan tolerantlıq, multikulturalizm, milli mədəni irsə hörmət nümunəsidir

Bakı:

25 °C

40 %

3 m/s

Əlaqə

AZ RU EN

Ana səhifə / Sosial / Azərbaycan tolerantlıq, multikulturalizm, milli mədəni irsə hörmət nümunəsidir

Azərbaycan tolerantlıq, multikulturalizm, milli mədəni irsə hörmət nümunəsidir

26.11.2020 [09:10]

Cənubi Qafqaz regionunun lideri dövləti olan Azərbaycan bu gün dünyada multikulturalizm nümunəsi kimi tanınır. Atılan addımlar müxtəlif dinlərin və xalqların mehriban birgəyaşayışı üçün əlverişli şərait, etibarlı zəmin formalaşdırır. Azərbaycan Prezidentinin göstərişi ilə və dövlət vəsaiti hesabına məscidlər, katolik və pravoslav kilsələri, sinaqoqlar təmir olunur, udinlərin kilsəsi Heydər Əliyev Fondu tərəfindən təmir olunaraq istifadəyə verilib. Eyni zamanda, dünyada mədəniyyətlər arasında körpü rolunu oynayan, sivilizasiyalararası dialoqa mühüm töhfələr verən Azərbaycan bir çox forumlara, beynəlxalq tədbirlərə uğurla ev sahibliyi edir.
Təəssüflər olsun ki, bu gün işğaldan azad olunan torpaqlarımızın mənzərəsi erməni vandalları tərəfindən bütün dini və mədəniyyət abidələrimizin dağıdıldığını aydın görməyə imkan verir. Məscidlərimizi dağıdan, milli-mənəvi hisslərimizi təhqir edən ermənilərin törətdiyi vəhşiliklərin miqyası ölçüyəgəlməzdir. Bununla belə, bu gün bir sıra Qərb liderləri azad edilmiş torpaqlarımızda xristian məbədlərinin taleyi ilə bağlı “narahatlıq” keçirdiklərini deyirlər. Amma bu şəxslər ölkəmizə gəlib ermənilərin Azərbaycanın dini məbədləri ilə necə rəftar etdiklərini, onları dağıtdıqlarını, təhqir etdiklərini görsələr, daha ədalətli olarlar.
Məsələ ilə bağlı fikirlərini bölüşən Milli Məclisin deputatı Ceyhun Məmmədov bildirib ki, Azərbaycanda dövlət səviyyəsində milli-mənəvi dəyərlərimizə, dini abidələrimizə diqqət hər zaman yüksək olub. Onun sözlərinə görə, Prezident İlham Əliyevin və Birinci vitse-prezident Mehriban xanım Əliyevanın Ağdama səfəri zamanı bu diqqət və qayğı, mənəvi dəyərlərimizə sıx bağlılıq bir daha müşahidə edildi: “Dağlıq Qarabağda, eləcə də Ermənistanda Azərbaycan xalqına məxsus bütün dini abidələr dağıdılıb. Ermənistan siyasi hakimiyyəti üçün heç bir dəyər və müqəddəslik anlayışı yoxdur. Məscidlərdə donuz, inək saxlanılması, bir qisminin dağıdılması bu vəhşiliyin əyani sübutudur. Ermənistan törətdiyi bu vəhşiliklərə görə cavab verməlidir. Cənab Prezidentin qeyd etdiyi kimi, bu gün bir sıra dairələr Azərbaycandakı xristian abidələrindən “narahatlıq”larını ifadə edirlər. Bəs onlar ermənilərin məscidlərimizə qarşı etdikləri vəhşiliklərə görə niyə narahatlıqlarını bildirmirlər? Məgər məscidləri dağıtmaq, orada donuz, inək saxlamaq olar?”.
Milli Məclisin deputatı Müşfiq Məmmədli də Azərbaycan dövlətinin bütün dünyada tolerantlıq, multikulturalizm, milli-mədəni irsə hörmət nümunəsi kimi tanındığını deyib. Onun sözlərinə görə, ölkəmizdə bütün dinlərə, onların daşıyıcılarına hörmət nümayiş etdirilir, bütün dini abidələrə qarşı diqqət və qayğı göstərilir: “Azərbaycan milli-mədəni irsin qorunub-saxlanması məsələləri ilə bağlı UNESCO ilə çox sıx əməkdaşlıq edir. Ermənistan isə vaxtilə Azərbaycanın işğal altında olan torpaqlarında olan dini abidələri dağıdıb, məscidləri təhqir edib. Bu baxımdan, işğaldan azad edilən torpaqlarda olan dini abidələrin gələcək taleyindən “narahatlıq” keçirən bəzi Qərb liderləri, əslində, erməni vəhşiliklərinə göz yummamalıdır. Ermənilər bizim tarixi abilərimizi özününküləşdirmək, oradan Azərbaycan izlərini silmək üçün bu abidələri ya dağıdıb, ya da yararsız hala salıblar. Azərbaycan dövləti torpaqlarımızla yanaşı, işğaldan azad olan bu tarixi abidələrimizin də bərpasını həyata keçirəcək və onları qoruyacaq. Çünki Azərbaycan xalqı, Azərbaycan dövləti hər zaman milli irsə xüsusi hörmət göstərib”.
P.SADAYOĞLU

Paylaş:

Baxılıb: 648 dəfə