“Sizi tanıyaq” layihəsi çərçivəsində növbəti görüş keçirilib

Bakı:

24 °C

60 %

1 m/s

Əlaqə

AZ RU EN

Ana səhifə / Sosial / “Sizi tanıyaq” layihəsi çərçivəsində növbəti görüş keçirilib

“Sizi tanıyaq” layihəsi çərçivəsində növbəti görüş keçirilib

12.06.2021 [09:38]

İyunun 11-də Ailə, Qadın və Uşaq Problemləri üzrə Dövlət Komitəsinin sədri Bahar Muradova Komitənin nəzdində fəaliyyət göstərən Şüvəlan Uşaq və Ailələrə Dəstək Mərkəzində istedadlı uşaqlar və gənclərlə görüşüb.
AZƏRTAC xəbər verir ki, 15 İyun - Milli Qurtuluş Gününə həsr olunmuş görüş “Sizi tanıyaq” layihəsi çərçivəsində baş tutub.
Tədbirdə iştirak edən uşaqlar və gənclər əvvəlcə Şüvəlan Uşaq və Ailələrə Dəstək Mərkəzində Vətən müharibəsi şəhidlərinin xatirəsinə yaradılmış guşəni ziyarət ediblər.
Tədbir iştirakçılarına mərkəzin fəaliyyəti və burada yaradılan şərait barədə də məlumat verilib.
Görüşdə çıxış edən komitə sədri Bahar Muradova belə görüşlərin istedadlı və bacarıqlı gəncləri daha yaxından tanımağa, onların fikir və düşüncələrini öz dillərindən eşitməyə imkan yaratdığını bildirib. Qeyd edib ki, bu gün ölkəmizdə uşaqların hərtərəfli inkişafı, onların qayğılarının həlli və maraqlarının qorunması, milli-mənəvi dəyərlər ruhunda yetişdirilməsi istiqamətində lazımi tədbirlər həyata keçirilir.
“Azərbaycanda ailə, uşaq və qadın məsələləri daim dövlətin diqqəti mərkəzindədir. Ölkəmizdə bu sahədə siyasətin banisi Ulu Öndər Heydər Əliyevdir. Müstəqillik illərində bu sahədə xeyli iş görülüb. Müstəqilliyimizin ilk illərindən etibarən Ümummilli Lider Heydər Əliyev, ilk növbədə, uşaqların sağlam, təhlükəsiz, rahat şəraitdə böyüməsi üçün bütün zəruri addımları atıb. Azərbaycan hər zaman istedadlı övladları ilə fərqlənib. Ölkəmiz müstəqilliyini bərpa etdikdən sonra həyata keçirilən siyasət müasir Azərbaycan gəncliyinin inkişafı, onların yaradıcılıq qabiliyyətinin formalaşdırılması və peşəkar yetişməsi üçün baza rolunu oynayıb. Bu siyasətin, dövlət proqramlarının nəticəsidir ki, hazırda Azərbaycanda bütün istiqamətlərdə istedadlı gənclər fəaliyyət göstərirlər”, - deyə komitə sədri qeyd edib.
Layihə rəhbəri Vüsalə Qələndərli “Sizi tanıyaq” layihəsi barədə ətraflı məlumat verib. Bildirib ki, layihənin məqsədi istedadlı uşaqları, gəncləri cəmiyyətə tanıtmaq, onlara vətənpərvərlik və dövlətçilik ruhu aşılamaq, müstəqil özünüifadəetmə bacarıqlarını formalaşdırmaqdır.
Tədbir uşaqların vətənpərvərlik mövzusunda hazırladıqları proqramla və əl işlərindən ibarət sərginin nümayişi ilə davam edib.
Sonda tədbirdə iştirak edən gənclər və uşaqlar mükafatlandırılıb.
Uşaq və gənclərə mükafatları Ailə, Qadın və Uşaq Problemləri üzrə Dövlət Komitəsinin sədri Bahar Muradova təqdim edib.

Paylaş:

Baxılıb: 753 dəfə