İnsan kapitalına yönəldilmiş siyasət...

Bakı:

25 °C

66 %

4 m/s

Əlaqə

AZ RU EN

Ana səhifə / Sosial / İnsan kapitalına yönəldilmiş siyasət...

İnsan kapitalına yönəldilmiş siyasət...

06.09.2022 [10:02]

İtaliya-Azərbaycan Universitetinin binası 2024-cü ilin sonunda istifadəyə veriləcək

Nicat PAŞA

Prezident İlham Əliyevin yürütdüyü məqsədyönlü, çoxşaxəli xarici siyasət nəticəsində bu gün Azərbaycan beynəlxalq arenada etibarlı tərəfdaş kimi tanınır. Son illər ölkəmizin dünyanın bir çox nüfuzlu ölkələri ilə uğurlu əməkdaşlıq etməsi, ikitərəfli və çoxtərəfli münasibətlərin daha da inkişaf etməsi - bütün bunlar deyilənləri bir daha təsdiq edir. İqtisadiyyat, ticarət, tibb, təhsil və bir çox digər sahələrdə uğurlu əməkdaşlıq Azərbaycan dövlətinin müəyyən etdiyi prioritetlər sırasındadır.

Bu xüsusda son illər daha da möhkəmlənməkdə olan Azərbaycan-İtaliya münasibətlərini xüsusi vurğulamaq yerinə düşər. İtaliya ilə Azərbaycan arasında çox güclü siyasi-iqtisadi əlaqələr mövcuddur. Son zamanlar Azərbaycan və İtaliya arasında münasibətlərin artan xətt üzrə inkişaf etdiyinin şahidiyik. Qeyd etmək yerinə düşər ki, İtaliya Azərbaycanın birinci ticarət tərəfdaşıdır. Keçən il ticarət dövriyyəmiz 9,6 milyard, bu ilin yeddi ayında isə 11 milyard dollara çatıb.

Avropa İttifaqının vacib dövlətlərindən olan İtaliya ilə əlaqələrin inkişafı bu gün də uğurla davam etdirilməkdədir. Bu əməkdaşlıq təhsil sahəsini də əhatə edir. Elm və təhsil sahəsində qarşılıqlı fəaliyyətin inkişaf etdirilməsi istiqamətində atılan mühüm addımlardan biri də Romada İtaliya-Azərbaycan Universiteti üzrə əməkdaşlıq çərçivəsinin müəyyən edilməsi, fakültə və proqramların yaradılması ilə bağlı ADA Universiteti ilə İtaliyanın beş aparıcı ali təhsil müəssisəsi arasında akademik əməkdaşlığa dair imzalanmış sazişlərin mübadiləsi mərasiminin keçirilməsidir. Belə ki, sentyabrın 1-də Romada İtaliya-Azərbaycan Universiteti üzrə əməkdaşlıq çərçivəsinin müəyyən edilməsi, fakültə və proqramların yaradılması ilə bağlı ADA Universiteti ilə İtaliyanın beş aparıcı ali təhsil müəssisəsi - Luiss Guido Carli Universiteti, Romanın Sapienza Universiteti, Turin Politexnik Universiteti, Alma Mater Bolonya Universiteti və Milan Politexnik Universiteti arasında akademik əməkdaşlığa dair imzalanmış sazişlərin mübadiləsi mərasimi keçirilib. Azərbaycan Respublikasının Prezidenti İlham Əliyev tədbirdə iştirak edib.

“Bugünkü mərasim Azərbaycan səfirliyinin yeni binasında keçirilir. Onu da deməliyəm ki, bu, yeni binada keçirilən ilk tədbirdir. Romanın tarixi məhəlləsində yerləşən bu tarixi bina bu gün öz qapılarını açır və eyni zamanda, bu binada Azərbaycanın Mədəniyyət Mərkəzi də fəaliyyət göstərəcək”, - deyən dövlətimizin başçısı İltaliya-Azərbaycan əlaqələrinin yeni səhifəsinin açıldığını diqqətə çatdırıb: “Mən çox şadam ki, bu binada keçirilən ilk tədbir məhz təhsil sahəsinə aiddir. Bu gün İtaliya-Azərbaycan əlaqələrinin yeni səhifəsi açılır. Təhsil sahəsində biz yeni genişmiqyaslı əməkdaşlığa başlayırıq. İki il bundan əvvəl İtaliyada dövlət səfərində olarkən mən bu təkliflə çıxış etmişdim ki, İtaliya-Azərbaycan Universiteti yaradılsın. İtaliya rəhbərliyi də bunu alqışladı və qısa müddət ərzində artıq biz praktiki fəaliyyətə başlayırıq”.

Romada İtaliya-Azərbaycan Universitetinin yaradılması ilə əlaqədar imzalanmış sənədlərin mübadiləsi mərasimini tarixi hadisə adlandıran ölkə başçısı çıxışına belə davam edib: “Bugünkü mərasim isə onu göstərir ki, biz gələcəkdə təhsil sahəsində də strateji tərəfdaş kimi fəaliyyət göstərəcəyik. Heç kimə sirr deyil ki, hər bir ölkənin inkişafını təbii resurslar yox, bilik, savad, texnoloji tərəqqi müəyyən edir. Biz Azərbaycanda təbii resurslardan əldə edilmiş gəliri insan kapitalına yönəldirik və bugünkü tədbir bunun əyani sübutudur. Eyni zamanda, əminəm ki, İtaliya-Azərbaycan Universiteti İtaliya-Azərbaycan dostluğu mərkəzi olacaq. Bir sözlə, mən hesab edirəm ki, bu gün biz tarixi hadisənin şahidiyik. Bu gün mənim İtaliyaya işgüzar səfərimin birinci günüdür və birinci tədbiridir. Əminəm ki, İtaliya rəhbərləri ilə keçiriləcək görüşlər bizim dostluğumuzu, tərəfdaşlığımızı daha da möhkəmləndirəcək.

Bir daha hamınızı bu gözəl tarixi hadisə münasibətilə təbrik edirəm”.

Dövlətimizin başçısı Çernobbio şəhərində İtaliyanın “İl Sole 24 Ore” qəzetinə müsahibəsində inşa edilən universitet binasının 2024-cü ilin sonunadək hazır olacağını da diqqətə çatdırıb: “Tərəfdaşlığımız uğurla həyata keçirilir. Bizim ikitərəfli gündəliyimiz getdikcə genişlənir. Təbii ki, bunun əsas hissəsini enerji və ticarət təşkil edir. Lakin bunlar yeganə mövzular deyil. Dünən səfirliyimizin yeni binasında biz İtaliya-Azərbaycan Universitetinin yaradılması ilə bağlı sənədlərin mübadiləsinə həsr edilmiş gözəl mərasimin şahidi olduq. Bunlar ADA Universiteti və İtaliyanın beş universiteti - Luiss Universiteti, Turin Politexnik Universiteti, Milan Politexnik Universiteti, Bolonya Universiteti və Romanın Sapienza Universitetidir. Gözəl məkanda yerləşən universitet binası inşa edilməkdədir və 2024-cü ilin sonunadək hazır olacaq”.

Paylaş:

Baxılıb: 707 dəfə