Azərbaycan ilə Yaponiya arasında informasiya sahəsində əlaqələrin daha da genişləndirilməsi məsələləri müzakirə olunub

Bakı:

15 °C

82 %

10 m/s

AZ RU EN

Ana səhifə / Xarici siyasət / Azərbaycan ilə Yaponiya arasında informasiya sahəsində əlaqələrin daha da genişləndirilməsi məsələləri müzakirə olunub

Azərbaycan ilə Yaponiya arasında informasiya sahəsində əlaqələrin daha da genişləndirilməsi məsələləri müzakirə olunub

19.07.2014 [11:08]

Son illər Yaponiyada Azərbaycan haqqında dolğun informasiyalara maraq daha da artıb.
Bu fikir Yaponiyanın Azərbaycandakı səfiri Tsuquo Takahaşi ilə iyulun 18-də AzərTAc-da keçirilən görüşdə xüsusi vurğulanıb, informasiya sahəsində əməkdaşlığın daha da inkişaf etdirilməsi ilə bağlı ətraflı fikir mübadiləsi aparılıb.
AzərTAc-ın baş direktoru Aslan Aslanov ölkələrimiz və xalqlarımız arasında dostluq əlaqələrindən danışıb, bu münasibətlərin inkişafında kütləvi informasiya vasitələrinin, o cümlədən milli xəbər agentliklərinin rolunu xüsusi qeyd edib.
Yaponiyalı səfirə AzərTAc-ın keçdiyi inkişaf yolu, müstəqillik illərində qazandığı uğurlar, dövlət siyasətinin informasiya təminatında agentliyin mövqeyi barədə ətraflı məlumat verilib. AzərTAc-la Yaponiyanın “Kyodo News” agentliyi arasında yaxşı əlaqələrinin olduğunu söyləyən baş direktor nüfuzlu beynəlxalq informasiya təşkilatlarında bu agentliklə uğurla əməkdaşlıq etdiyini diqqətə çatdırıb. Səfirə beynəlxalq aləmdə çox nüfuzlu iki media qurumunun - Asiya və Sakit Okean Ölkələri İnformasiya Agentlikləri Təşkilatının (OANA) XVI Baş Assambleyasının və Dünya Xəbər Agentliklərinin V Konqresinin 2016-cı ildə eyni vaxtda Bakıda keçiriləcəyi və 2019-cu ilədək bu qurumlara AzərTAc-ın rəhbərlik edəcəyi barədə məlumat verilib. Həmçinin, milli agentliklərimizin uğurlu əməkdaşlığının Yaponiya ilə Azərbaycan arasında informasiya sahəsində işbirliyinin genişləndirilməsi baxımından əhəmiyyəti qeyd edilib.
Aslan Aslanov Kyodo xəbər agentliyi ilə informasiya mübadiləsi haqqında sazişin imzalandığını və əməkdaşlığın həm ikitərəfli əlaqələr formatında, həm də beynəlxalq təşkilatlarda uğurla davam etdiyini bildirib. Yaponiya mətbuatında Azərbaycanın ictimai-siyasi həyatı ilə bağlı yeniliklərin daha çox yayılması istiqamətdə tədbirlərin davam etdirildiyini diqqətə çatdıran baş direktor bu ölkənin “Jiji Press” agentliyi, “WorldInvesters TV” internet televiziyası və digər media qurumları ilə əməkdaşlıqdan da söhbət açıb.
Görüşdə Ümummilli lider Heydər Əliyevin Azərbaycan ilə Yaponiya arasında diplomatik əlaqələrin qurulmasında müstəsna xidmətlərinin olduğu bildirilib, Prezident İlham Əliyevin uğurlu xarici siyasəti nəticəsində respublikamızın dünyanın sürətlə inkişaf edən ölkələrindən birinə çevrildiyi vurğulanıb. Qeyd edilib ki, Azərbaycan artıq beynəlxalq tədbirlərin keçirildiyi bir məkandır. Bakı Beynəlxalq Humanitar Forumunun bu tədbirlər sırasında böyük əhəmiyyət daşıdığı nəzərə çatdırılıb və Yaponiyanın Kyodo agentliyinin prezidentinə bu Foruma dəvət məktubu göndərildiyi bildirilib.
Azərbaycanın sürətli inkişafından məmnunluq duyduğunu söyləyən səfir Tsuquo Takahaşi dövlətlərimiz arasında münasibətlərin sağlam məcrada davam etməsində milli xəbər agentliklərinin mühüm rol oynadığını qeyd edib.
Son illər Azərbaycan ilə bütün sahələrdə əməkdaşlığa Yaponiyada xüsusi diqqət yetirildiyini deyən səfir gündoğar ölkə hökumətinin “Ot kökləri və insan təhlükəsizliyi qrant yardımı Proqramı” çərçivəsində respublikamızın regionlarında gördüyü işlərdən danışıb.
Yaponiyanın aparıcı informasiya agentlikləri ilə AzərTAc-ın əlaqələrini yüksək qiymətləndirən səfir ölkələrimiz arasında mövcud iqtisadi əlaqələrin daha da inkişaf etdirilməsindən söhbət açıb, gələcəkdə humanitar və mədəni sahələrdə əməkdaşlığın genişləndirilməsinin vacibliyini vurğulayıb.

Paylaş:

Baxılıb: 1501 dəfə