ABŞ prezidenti növbəti dəfə çağırış etdi

Bakı:

26 °C

63 %

2 m/s

Əlaqə

AZ RU EN

Ana səhifə / Xarici siyasət / ABŞ prezidenti növbəti dəfə çağırış etdi

ABŞ prezidenti növbəti dəfə çağırış etdi

14.07.2022 [10:08]

Cozef Bayden ölkədə hücum silahlarının satışının qadağan olunmasını istəyir

N.BAYRAMLI

ABŞ prezidenti Cozef Bayden növbəti dəfə ölkədə hücum silahlarının satışının qadağan edilməsi təşəbbüsü ilə çıxış edib. O bildirib ki, ABŞ administrasiyası silaha nəzarətin daha da sərtləşdirilməsi və ölkədə hücum silahlarının satışına qadağa qoyulması üçün səy göstərməyə davam edəcək. “Hücum silahları qadağan edilməlidir. Mən bu silahları, daraq tutumu 30 mərmi olan silahları qadağan etmək niyyətindəyəm. Bu qadağaya nail olana qədər mən dayanmayacağam”, - deyə dövlət başçısı vurğulayıb. Baydenin sözlərinə görə, son iki onillikdə ABŞ-da odlu silahdan istifadə nəticəsində ölən məktəblilərin sayı Amerika polisi və hərbçilərinin ümumi sayından çoxdur: “Silahlar Amerika Birləşmiş Ştatlarında uşaqların bir nömrəli qatilidir. Bunu bir daha təkrar edirəm. Silahlar avtomobil qəzaları və xərçəngdən qabaq ABŞ-da uşaqların ölümünün bir nömrəli səbəbidir. Son iyirmi ildə silahlar Birləşmiş Ştatlarda vəzifəli polislər və xidmətdə olan hərbçilərin cəmindən daha çox orta məktəb şagirdini öldürüblər”.

Ümumiyyətlə, ABŞ prezidentinin narahatlığına əsas səbəb insanlar arasında silahlı insidentlərin artmasıdır. Digər ölkələrlə müqayisədə, vətəndaşlara silah satışına görə ABŞ öndə gedir. Məsələn, CNN-nin yaydığı məlumatda bildirilir ki, ABŞ-da hər yüz nəfərə 120.5 silah düşür. O da qeyd olunur ki, ABŞ bu göstərici ilə dünyada birinci yerdə, Folklend adaları isə 100 nəfərə 62 silahla ikincidir. Üçüncü yerdə isə 7 ildir vətəndaş müharibəsi aparan Yəmən gəlir. Bu ölkədə hər 100 nəfərə 53 silah düşür. Cənubi Koreya və Yaponiyada isə hər yüz nəfərə 0,2 silah düşdüyü məlum olub. ABŞ dünyada mövcud olan 857 milyon mülki silahın təxminən 393 milyonuna sahibdir. Bu da bütün dünyadakı silahların 46 faizi deməkdir. ABŞ-da hər 100 min nəfərdən 4-ü silahlı atışma nəticəsində ölüb. Bu rəqəm inkişaf etmiş başqa ölkələrdə orta hesabla 18-dir. Bu ölkədə intiharların 44 faizi silahla baş verir. ABŞ dünya üzrə kütləvi silahlı hücuma məruz qalan yeganə ölkədir.

Kiçik bir xatırlatma etmək yerinə düşər. Belə ki, mayın 25-də ABŞ-ın Texas ştatının Yuvald şəhərində orta məktəbdə baş verən atışma nəticəsində 18-i məktəbli olmaqla 21 nəfər ölüb. Bu hadisədən sonra ABŞ prezidenti Cozef Bayden silah satışına məhdudiyyətin qoyulması ilə bağlı çıxış etmişdi. Bayden silahların alınma yaşının 18-dən 21-ə qaldırılmasını təklif edib. Eyni zamanda saxlama qaydalarının dəyişdirilməsinin və təhlükəli hesab olunduğu halda vətəndaşdan alınması təklifi irəli sürülüb. Həmin qanlı hadisədən sonra Co Bayden emosional çıxış etmişdi. Onun çıxışından bir neçə cümləni xatırlayaq: “Son iki onillikdə məktəb yaşlı uşaqlar, polis və hərbçilər daha çox odlu silahdan açılan atəş nəticəsində ölüb. Fikirləşin! Allah xatirinə, biz nə qədər belə qırğına dözəcəyik?! Daha nə qədər günahsız amerikalı öləcək?! Bəsdir!”. Bu hadisədən sonra ABŞ prezidenti Konqresi ölkədə baş verən son kütləvi atışmalara cavab olaraq hücum silahlarının və yüksək tutumlu silah sandıqlarının satışını qadağan etməyə çağırıb. Nümayəndələr Palatasının Ədliyyə Komitəsi isə artıq müvafiq tədbirləri müzakirə edir. Amma bu istiqamətdə hələ ki, ciddi bir addım atılmayıb.

Paylaş:

Baxılıb: 1142 dəfə