YAP-ın yaranmasının 20 illiyi Hacıqabul rayonunda təntənəli şəkildə qeyd edilib

Bakı:

23 °C

43 %

7 m/s

Əlaqə

AZ RU EN

Ana səhifə / YAP xəbərləri / YAP-ın yaranmasının 20 illiyi Hacıqabul rayonunda təntənəli şəkildə qeyd edilib

YAP-ın yaranmasının 20 illiyi Hacıqabul rayonunda təntənəli şəkildə qeyd edilib

24.10.2012 [00:59]

Hacıqabul rayonunda Yeni Azərbaycan Partiyasının (YAP) yaranmasının 20 illiyi münasibətilə təntənəli tədbir keçirilib. Tədbir iştirakçıları öncə Ulu öndər Heydər Əliyevin heykəlinin önünə tər çiçəklər düzüb, xatirəsini ehtiramla yad ediblər. Daha sonra yubiley tədbirilə əlaqədar olaraq Ümummilli liderin heykəlinin önündən rayon Mədəniyyət Evinə qədər bayram yürüşü təşkil olunub. Tədbirdə rayon ictimaiyyətinin nümayəndələri, rayon rəhbərliyi, eləcə də, Milli Məclisin üzvü Rüstəm Xəlilov və YAP Mərkəzi Aparatının məsul işçisi Ramil Mirzəyev iştirak ediblər.
Hacıqabul şəhər Mədəniyyət Evində davam etdirilən bayram tədbiri dövlət himninin səsləndirilməsi ilə açıq elan olunub. Çıxış edən YAP Hacıqabul rayon təşkilatının sədri Hafiz Bəşirov bildirib ki, ötən 20 ildə Yeni Azərbaycan Partiyası qələbələrlə zəngin, şərəfli bir tarix yaşayıb. Onun sözlərinə görə, YAP tarixi zərurətdən yaranıb: “Ümummilli liderimiz Heydər Əliyevin Azərbaycan xalqı və dövləti qarşısında tarixi xidmətlərindən biri də bugünkü uğurlarımızda mühüm rol oynayan, xalqın böyük əksəriyyətini təmsil edən YAP-ın yaradılmasıdır. YAP Ulu öndər Heydər Əliyevin rəhbərliyi altında xalqın sağlam qüvvələrini öz ətrafında birləşdirərək, daima dövlətçiliyə, millətə xidmət edib. Bu gün də partiya özünün bu prinsiplərinə sadiqliyini əməli fəaliyyəti ilə ləyaqətlə nümayiş etdirir”.
Daha sonra çıxış edən Hacıqabul rayon İcra Hakimiyyətinin başçısı Əhməd Muxtarov deyib ki, 1993-cü ildə xalqın tələbi ilə yenidən hakimiyyətə gələn Ulu öndər Heydər Əliyev qısa zaman ərzində mövcud problemləri aradan qaldırdı və müasir, qüdrətli Azərbaycanın əsasını qoydu: “Ümummilli lider Heydər Əliyevin siyasi kursunu layiqli şəkildə davam etdirən Prezident İlham Əliyev demokratik Azərbaycanın inkişafına öz töhfələrini verir. Möhtərəm Prezidentimizin diqqət və qayğısı nəticəsində Azərbaycanın bütün regionlarında, o cümlədən, Hacıqabul rayonunda olan bütün problemlər əsaslı şəkildə həll olunur”.
Çıxış edən YAP Hacıqabul rayon təşkilatının sədr müavini Şükür Məmmədov, İdarə Heyətinin üzvü Rəfiqə Həmzəyeva partiyanın Azərbaycan dövlətçiliyinin möhkəmləndirilməsindəki fəaliyyətindən bəhs ediblər. Tədbirdə çıxış edən Milli Məclisin üzvü Rüstəm Xəlilov YAP-ın özünü ölkənin siyasi taleyində həlledici rol oynamaq qüdrətinə malik olan siyasi qüvvə kimi təsdiqlədiyini deyib. Natiq bildirib ki, ölkə tarixinin arxada qalan 20 ilinin hər ayında, hər günündə Ümummilli lider Heydər Əliyevin nəfəsi duyulur, əhəmiyyətli təsiri hiss olunur.
Tədbirdə Gənc Heydərçilər şeirlər səsləndiriblər. Daha sonra tədbir iştirakçıları adından Azərbaycan Prezidenti, YAP-ın Sədri İlham Əliyevə müraciət qəbul edilib. Tədbirin sonunda bir qrup partiya üzvlərinə YAP rayon təşkilatının fəxri fərmanları, hədiyyələr təqdim olunub, partiyaya yeni üzv olmuş şəxslərə üzvlük vəsiqələri verilib. Rəsmi hissədən sonra tədbir konsert proqramı ilə davam etdirilib.
Pərviz SADAYOĞLU

Paylaş:

Baxılıb: 1488 dəfə