Lerikdə YAP-ın yaranmasının 20-ci ildönümü ilə əlaqədar tədbir keçirilib

Bakı:

11 °C

87 %

1 m/s

Əlaqə

AZ RU EN

Ana səhifə / YAP xəbərləri / Lerikdə YAP-ın yaranmasının 20-ci ildönümü ilə əlaqədar tədbir keçirilib

Lerikdə YAP-ın yaranmasının 20-ci ildönümü ilə əlaqədar tədbir keçirilib

01.11.2012 [00:44]

Yeni Azərbaycan Partiyasının (YAP) yaranmasının 20-ci ildönümü ilə əlaqədar Lerik rayonunda yubiley tədbiri keçirilib. Tədbir iştirakçıları öncə Lerik şəhərinin mərkəzi meydanında partiyanın yaradıcısı və ilk Sədri, xalqımızı və dövlətçiliyimizi məhv olmaq təhlükəsindən xilas etmiş Ümummilli lider Heydər Əliyevin abidəsini ziyarət ediblər.
Daha sonra rayon Mədəniyyət Evində YAP-nın yaranmasının 20 illiyinə həsr edilmiş filmə baxış olub. Partiyanın yaranmasının 20 illiyinə həsr edilmiş məruzə ilə YAP Lerik rayon təşkilatının sədri Elxan Qənbərov çıxış edib.
Qeyd olunub ki, Yeni Azərbaycan Partiyası blokada şəraitində yaşayan Naxçıvanda yaranıb. 1992-ci il noyabrın 21-də Ulu öndər Heydər Əliyevin Sədrliyi ilə, Azərbaycanın bütün regionlarından seçilmiş 550 nümayəndənin təmsil olunduğu təsis konfransı keçirilib və Yeni Azərbaycan Partiyasının yarandığı elan edilib. Heydər Əliyev yekdilliklə partiyanın Sədri seçilib.
Daha sonra natiq partiyanın rayon təşkilatı tərəfindən həyata keçirilən tədbirlər barədə məlumat verib. Bildirib ki, YAP rayon təşkilatı 59 ilk təşkilatında 3431 nəfər partiya üzvünü özündə birləşdirir. 2012-ci ilin 9 ayı ərzində partiya sıralarına 244 nəfər qəbul olunub ki, bunların da 39 faizini gənclər təşkil edir: “Partiya sıralarına qəbul olunanlara vəsiqələrin verilməsi bir qayda olaraq Heydər Əliyev Mərkəzində və ya tarixi günlərin qeyd olunduğu tədbirlərdə həyata keçirilir ki, bu da gənclərin həyatında yadda qalan iz buraxır. Əvvəlki illərə nisbətən qadınların partiya sıralarına qəbuluna xüsusi diqqət yetirilmişdir. 9 ayda qəbul olunanların 27 faizini qadınlar təşkil edir”.
Tədbirdə YAP İdarə Heyətinin üzvü, partiyanın İcra katibinin müşaviri Kərim Kərimov, Milli Məclisin deputatı İqbal Məmmədov, rayon İcra Hakimiyyətinin başçısı Rövşən Bağırov çıxış edərək 1992-ci il 21 noyabrda Naxçıvan şəhərində xalqımızın Ümummilli lideri Heydər Əliyevin rəhbərliyi ilə təsis konfransı keçirilən Yeni Azərbaycan Partiyasının 20 ildə minlərlə siyasi fəalı birləşdirən partiyaya çevrildiyini qeyd ediblər. Natiqlər Yeni Azərbaycan Partiyasının keçdiyi tarixi yola müxtəlif aspektlərdən nəzər salıblar və bu gün xalqımızın firavan yaşamasında mühüm rol oynayan Heydər Əliyev siyasi kursunu dönmədən həyata keçirdiyini xüsusi olaraq vurğulayıblar.
Sonda partiya sıralarına yeni qəbul olunmuş bir qrup şəxsə üzvlük vəsiqələri, partiyanın rayon təşkilatının fəaliyyətində fərqlənənlərə Fəxri fərmanlar verilib.
Yeni Azərbaycan Partiyası rayon təşkilatının yaranmasında xidmətləri olan Sübi Ağayevaya, Abbas Zahidova, Gültəkin Şıxəliyevaya və rayon təşkilatının sədri Elxan Qənbərova rayon İcra Hakimiyyəti başçısı tərəfindən qiymətli hədiyyələr təqdim olunub.
Yubiley tədbiri rayon musiqi kollektivlərinin rəngarəng ifaları ilə davam etdirilib.

Paylaş:

Baxılıb: 1517 dəfə