Dünya azərbaycanlıları birlikdə güclüdür!

Bakı:

25 °C

50 %

3 m/s

Əlaqə

AZ RU EN

Ana səhifə / YAP xəbərləri / Dünya azərbaycanlıları birlikdə güclüdür!

Dünya azərbaycanlıları birlikdə güclüdür!

27.12.2024 [17:24]

Asəf Salmanov,

YAP Qazax rayon təşkilatının əməkdaşı

Hər kəs yaxşı bilir ki,dünya azərbaycanlılarının müstəqil dövlətimiz və vahid məqsəd ətrafında birləşdirilməsi ideyasının müəllifi məhz, Ümummilli Liderimiz Heydər Əliyev olmuşdur. Ulu Öndərimiz xaricdə yaşayan azərbaycanlıların birliyi və təşkilatlanması məsələsini daim diqqət mərkəzində saxlamış, müxtəlif xarici ölkələrə etdiyi çoxsaylı səfərlərdə Azərbaycan diasporunun nümayəndələri ilə görüşlər keçirmiş, onların problem və qayğıları ilə yaxından maraqlanmışdır. Heydər Əliyevin Sərəncamı ilə 2001-ci il noyabrın 9-10-da Bakıda keçirilmiş Dünya Azərbaycanlılarının I Qurultayı xaricdəki soydaşlarımızın azərbaycançılıq ideyası ətrafında birləşərək təşkilatlanması baxımından çox mühüm tarixi əhəmiyyət kəsb etmiş, diaspor hərəkatının inkişafında yeni mərhələnin başlanğıcını qoymuşdur. Qurultaydan bir neçə ay sonra, Azərbaycan Respublikası Prezidentinin 2002-ci il 5 iyul tarixli Fərmanı ilə Xarici Ölkələrdə Yaşayan Azərbaycanlılarla İş üzrə Dövlət Komitəsi yaradılmış, 2002-ci il dekabr ayının 27-də isə “Xaricdə yaşayan azərbaycanlılarla bağlı dövlət siyasəti haqqında” Azərbaycan Respublikasının Qanunu qəbul edilmişdir. Dünyada fəaliyyət göstərən Azərbaycan icmaları ilə məşğul olan dövlət orqanının yaradılması və müvafiq qanunun qəbulu dünya azərbaycanlılarının milli birliyi və təşkilatlanması prosesini daha da sürətləndirmiş, soydaşlarımızın öz tarixi Vətəni ilə əlaqələrinin genişləndirilməsini təmin etmiş, ölkəmizin tarixi və müasir həqiqətlərinin dünya ictimaiyyətinə çatdırılmasına böyük təkan vermişdir.

Dünyanın hər bir yerində yaşayan soydaşlarımızın mütəşəkkil qüvvə kimi formalaşmaq, öz tarixi Vətənləri ilə əlaqələrini sıxlaşdırmaq istəyinin reallığa çevrilməsi məhz, Ulu Öndər Heydər Əliyevin təşəbbüsü ilə 33 il əvvəl başladılmış həmrəylik hərakatı ilə bağlıdır. Ulu Öndər tərəfindən 31 dekabrın - Dünya Azərbaycanlılarının Həmrəyliyi Günü elan edilməsi ən yeni tariximizin mühüm siyasi hadisələrindən biridir. Əlbəttə ki,bu birliyin, həmrəyliyin istinad nöqtəsini və ana xəttini azərbaycançılıq ideyası təşkil edir. Ümummilli Lider Heydər Əliyev xaricdə yaşayan hər bir azərbaycanlının Azərbaycanı özünün doğma Vətəni hesab etməsinə çalışırdı, bu haqda Ulu Öndər bildirirdi ki: ”Əziz Azərbaycanlılar! Harda olursan ol, hansı ölkədə yaşayırsan yaşa, ancaq Azərbaycan haqqında, Azərbaycanın müstəqilliyi, ərazi bütövlüyü haqqında, Azərbaycan xalqının bu günü və gələcəyi haqqında düşünməlisən!”. Ulu Öndər Heydər Əliyevin milli həmrəylik və azərbaycançılıq ideyası bu gün milli həmrəylik və diaspor fəaliyyətini daim diqqət mərkəzində saxlayan Azərbaycan Respublikasının Prezidenti İlham Əliyev cənabları tərəfindən uğurla davam etdirilir. Dövlətimizin uğurları dünya azərbaycanlılarını qəlbən sevindirir, soydaşlarımızı milli mənafeləri naminə daha sıx birləşməyə, doğma Vətənimizin inkişafında fəal iştirak etməyə ruhlandırır.

Dövlət müstəqilliyini, suverenliyini bərpa edən müdrik xalqımız hazırda öz şərəfli günlərini yaşayır. 44 günlük Vətən müharibəsi müddətində xalqımız bir daha öz rəhbərinin müdrikliyinə və siyasi iradəsinə şahidlik etdi. Həmin günlərdə İlham Əliyev cənablarının yenilməz qətiyyəti bütün cəmiyyətimizi birbaşa qələbəyə kökləndirdi. Məhz Azərbaycan Prezidentinin ortaya qoyduğu nümunə xalqımızı bu müqəddəs savaşda Möhtəşəm Zəfərə apardı. Odur ki, İkinci Qarabağ müharibəsinin hər günü şanlı bir tarix, misli görünməmiş bir qəhrəmanlıq dastanıdır. Bu şanlı tarixi bizlərə yaşatdıqlarına görə Azərbaycan Respublikasının Prezidenti, Müzəffər Ali Baş Komandan İlham Əliyev cənablarına, onun rəhbərliyi altında qəhrəmanlıq göstərən əsgər və zabitlərimizə, müqəddəs şəhidlərimizə, igid qazilərimizə minnətdarıq. Hazırda bütün dünya azərbaycanlıları haqlı olaraq müstəqil, suveren Azərbaycanla fəxr edirlər. Bu gün dünya azərbaycanlıları 31 dekabr- Dünya Azərbaycanlılarının Həmrəyliyi Gününü tam yeni bir ovqatla qeyd edirlər. Artıq dörd ildir ki, dünya azərbaycanlıları da, bütün Azərbaycan xalqı kimi böyük ruh yüksəkliyi ilə, başı uca, alnı açıq, üzü ağ yaşayırlar.

Bu gün Qalib Azərbaycan güclü iqtisadiyyata, müstəqil siyasətə,qüdrətli orduya malik bir ölkədir, ölkəmiz böyük iqtisadi, siyasi və mədəni potensiala malikdir, davamlı ictimai-siyasi sabitlik təmin olunmuşdur. Vətənimizin hərtərəfli inkişafı ilə bağlı qarşıya qoyduğumuz məqsədlərə çatmaq üçün əzmlə çalışırıq. Ölkəmizin beynəlxalq əlaqələrinin genişlənməsində, qədim və zəngin mədəniyyətinin təbliğində, Azərbaycana qarşı təxribatçı əməllərin qarşısının alınmasında diaspor təşkilatlarının da üzərinə mühüm vəzifələr düşür. Buna görə də xaricdə yaşayan həmvətənlərimiz milli maraqlarımızın müdafiəsi naminə azərbaycançılıq ideyası ətrafında günü-gündən daha sıx birləşirlər.

Hazırki dövrdə dünyanın çox qarışıq, mürəkkəb bir vaxtında ölkəmiz bütün sahələrdə demək olar ki, hər gün yeni-yeni uğurlara, qələbələrə imza atır. Hazırda Azərbaycan dünya miqyasında həm də bir idman ölkəsi kimi tanınır. Bu da Azərbaycan Respublikasının Prezidenti, Milli Olimpiya Komitəsinin Prezidenti İlham Əliyev cənablarının idmanın inkişafına və yetişməkdə olan gənc nəslə göstərdiyi xüsusi diqqət və qayğısının nəticəsidir. Ölkəmizin beynəlxalq idman yarışlarına və irimiqyaslı tədbirlərə ev sahibliyi etməsi, eləcə də beynəlxalq yarışlarda idmançılarımızın iştirakı, əldə etdiyi böyük uğurlar Azərbaycanın dünya idmanında öz yerinə və sözünə malik bir ölkə olduğunu bir daha sübut edir.

Dekabrın 24-də Azərbaycan Respublikasının Prezidenti, Milli Olimpiya Komitəsinin Prezidenti İlham Əliyev cənabları 2024-cü ilin idman yekunlarına həsr olunan mərasimdə idmançılarla görüş keçirdi. Qeyd etmək yerinə düşərdi ki, Ölkə Başçısının bu görüşü həm də öz doğum gününə təsadüf edirdi və bu da ölkəmizdə idmana olan diqqət və qayğının bir təzahürüdür. 2024-cü ilin idman yekunlarına həsr olunan görüşdə Dövlət Başçısı ölkə idmançılarının uğurlarından danışaraq əldə edilmiş nailiyyətlərə görə və Dünya Azərbaycanlılarının Həmrəyliyi Günü münasibətilə öz təbrikini etdi. Ölkə Rəhbəri bildirdi ki, hər yerdə ədalət olmalıdır - beynəlxalq münasibətlərdə, ailədə, hər bir ölkədə, hər bir cəmiyyətdə. Biz buna çalışırıq. Biz tarixi ədaləti, ərazi bütövlüyümüzü və suverenliyimizi bərpa etmişik və bununla qürur duyuruq. Əminəm ki, bu şanlı Qələbəmiz hər bir Azərbaycan gənci üçün əlavə ruhlandırma amili olacaq. Biz döyüş meydanındakı Zəfərimizə idman qələbələrini də əlavə etdik və bu, əlbəttə ki, ölkəmizin beynəlxalq nüfuzunu daha da artırır. Çünki idmanın inkişafı hər bir ölkənin ümumi inkişafının nümayişidir, onu əks etdirir. Azərbaycan güclü dövlətdir, öz gücünə əsaslanan, öz yolu ilə gedən, heç kimin qarşısında heç bir öhdəliyi olmayan, heç kimin qabağında baş əyməyən, ləyaqətlə, vicdanla irəliyə gedən bir ölkədir və bu, bizim böyük sərvətimizdir.

Paylaş:

Baxılıb: 366 dəfə