Azərbaycan Qazaxıstan münasibətlərinin gələcək perspektivləri nikbinlik vəd edir

Bakı:

12 °C

82 %

2 m/s

Əlaqə

AZ RU EN

Ana səhifə / YAP xəbərləri / Azərbaycan Qazaxıstan münasibətlərinin gələcək perspektivləri nikbinlik vəd edir

Azərbaycan Qazaxıstan münasibətlərinin gələcək perspektivləri nikbinlik vəd edir

23.10.2025 [21:26]

Cari ilin oktyabr ayın 21-də Qazaxıstan Respublikasının paytaxtı Astanada Azərbaycan Respublikasının Prezidenti İlham Əliyevin dövlət səfəri çərçivəsində Azərbaycan–Qazaxıstan Ali Dövlətlərarası Şurasının ikinci iclası keçirilib və Prezident mətbuata bəyanat verib. Görüşlərdə iki qardaş ölkə arasında strateji tərəfdaşlığın möhkəmləndirilməsi, iqtisadi, nəqliyyat, enerji və rəqəmsal əməkdaşlığın dərinləşdirilməsi, eləcə də, regional təhlükəsizlik və dayanıqlı inkişaf məsələləri ətrafında geniş fikir mübadiləsi aparılıb.

Prezident İlham Əliyev bəyanatında vurğulayıb ki, Azərbaycan ilə Qazaxıstanı tarixi köklər, ortaq mədəni dəyərlər, dostluq və qardaşlıq münasibətləri birləşdirir. O qeyd edib ki, iki ölkə arasındakı münasibətlər artıq strateji müttəfiqlik səviyyəsinə yüksəlib və bu əməkdaşlıq regionda sabitliyin, qarşılıqlı etimadın və dayanıqlı inkişafın əsas dayaqlarından biridir. Dövlət başçısı bildirib ki, Azərbaycan və Qazaxıstan bir-birini strateji tərəfdaş kimi qəbul edir, əməkdaşlıq bütün sahələrdə yüksələn xətt üzrə inkişaf edir və bu, xalqların rifahına xidmət edir.

Şuranın ikinci iclasında müxtəlif sahələri əhatə edən mühüm sənədlər imzalanıb. Nəqliyyat və loqistika sahəsində əməkdaşlığın genişləndirilməsi, Transxəzər Beynəlxalq Nəqliyyat Dəhlizinin səmərəliliyinin artırılması, eləcə də, rəqəmsal texnologiyalar və enerji təhlükəsizliyi istiqamətində konkret addımların atılması qərara alınıb. Prezident İlham Əliyev çıxışında bildirib ki, Azərbaycan və Qazaxıstanın bu sahələrdə birgə fəaliyyəti təkcə ikitərəfli əməkdaşlıq üçün deyil, həm də bütün Avrasiya regionu üçün mühüm əhəmiyyət daşıyır.

Prezident qeyd edib ki, iki ölkə arasında formalaşan sıx siyasi dialoq və qarşılıqlı etimad yeni iqtisadi imkanların reallaşmasına, investisiya mühitinin yaxşılaşdırılmasına və enerji resurslarının səmərəli istifadəsinə şərait yaradır. Onun sözlərinə görə, qarşılıqlı dəstək və ortaq maraqlara əsaslanan bu münasibətlər xalqların rifahının yüksəldilməsinə, sülhün və sabitliyin qorunmasına xidmət edir.

İclas zamanı qəbul edilən qərarlar iki ölkənin müvafiq qurumları arasında əlaqələndirmə mexanizmlərini gücləndirmək, imzalanan müqavilələrin icrasını təmin etmək və yeni birgə layihələrin həyata keçirilməsi üçün hüquqi bazanı genişləndirmək məqsədi daşıyır. Prezident İlham Əliyev vurğulayıb ki, bu sənədlər real əməkdaşlığın göstəricisidir və tərəflərin birgə səyləri nəticəsində konkret nəticələr əldə ediləcək.

Azərbaycan Prezidentinin mətbuata bəyanatında səsləndirdiyi fikirlərdə regional sabitlik və inteqrasiya mövzusu xüsusi yer tutub. Dövlət başçısı bildirib ki, Azərbaycan ilə Qazaxıstanın əməkdaşlığı təkcə bu iki ölkənin deyil, bütün regionun iqtisadi və siyasi təhlükəsizliyinə töhfə verir. Onun sözlərinə görə, Orta Dəhlizin inkişafı, enerji və kommunikasiya layihələrinin reallaşdırılması Avrasiyada yeni nəqliyyat, ticarət və innovasiya mərkəzlərinin formalaşmasına imkan yaradır.

Prezident İlham Əliyev çıxışının sonunda Azərbaycan–Qazaxıstan münasibətlərinin gələcək perspektivlərinə dair nikbin fikirlərini bölüşüb. O, iki ölkə arasında dostluq və qardaşlıq əlaqələrinin gələcəkdə də möhkəmlənəcəyinə əminliyini ifadə edib, əməkdaşlığın yeni mərhələsinin həm siyasi, həm iqtisadi, həm də humanitar sahələrdə dərinləşəcəyini bildirib.

Astanada keçirilən görüş və bəyanatlar göstərdi ki, Azərbaycan və Qazaxıstan ortaq maraqlara, səmimi münasibətlərə və gələcəyə yönəlmiş strateji baxışa əsaslanaraq, qarşılıqlı fəaliyyətlərini daha yüksək səviyyəyə qaldırmaq əzmindədirlər. Bu səfər və Ali Şuranın iclası iki qardaş ölkənin münasibətlər tarixində yeni bir mərhələnin başlanğıcı kimi dəyərləndirilir.

Rövşən Əhmədov

YAP Ağcabədi rayon təşkilatının sədri

Paylaş:

Baxılıb: 469 dəfə