Azərbaycan Qazaxıstan üçün qardaş dövlətdir

Bakı:

27 °C

57 %

2 m/s

Əlaqə

AZ RU EN

Ana səhifə / YAP xəbərləri / Azərbaycan Qazaxıstan üçün qardaş dövlətdir

Azərbaycan Qazaxıstan üçün qardaş dövlətdir

23.10.2025 [15:02]

Prezident İlham Əliyev oktyabrın 20-də Qazaxıstan Respublikasına dövlət səfərini etdi. Hər bir səfər münasibətlərdə yeni səhifənin başlanğıcı kimi dəyərləndirilir. Son illərdə türk dövlətləri arasında əlaqələrin yüksələn xətlə inkişafı qarşılıqlı səfərlərin dinamikliyində özünün aydın ifadəsini tapır. Bu baxımdan dövlətimizin başçısı İlham Əliyevin sözügedən səfəri Azərbaycan-Qazaxıstan əlaqələrinin hazırkı inkişaf səviyyəsinə, ikitərəfli gündəliyin tərkibinə, qarşıdakı dövr üçün müəyyənləşdirilən hədəflərə bir daha işıq saldı. Cənab İlham Əliyevin səfər çərçivəsində qazaxıstanlı həmkarı Kasım-Jomart Tokayev ilə ikitərəfli görüşü oldu. Qazaxıstan Prezidenti bildirdi ki, Sizi Qazaxıstan Respublikasında rəsmi dövlət səfərində qəbul etmək mənim üçün böyük şərəf və məmnunluqdur. Bu, ölkələrimiz arasında strateji tərəfdaşlığın, müttəfiqlik qarşılıqlı fəaliyyətinin bundan sonra da möhkəmlənməsi nöqteyi-nəzərindən çox mühüm hadisədir. Qazaxıstan və Azərbaycan təkcə dost dövlətlər deyil, həm də qardaş xalqlar və millətlərdir.

Prezidentlərin Azərbaycan-Qazaxıstan Ali Dövlətlərarası Şuranın keçirilən ikinci iclasındakı çıxışları, mətbuata birgə bəyanatları Azərbaycan-Qazaxıstan münasibətlərinin möhkəm təmələ əsaslandığını, qarşılıqlı etimad mühitinin yüksək səviyyədə qorunduğunu, hər iki tərəfin əlaqələrin müxtəlif istiqamətlər üzrə inkişafında maraqlı olduğunu bir daha təsdiqlədi. “Azərbaycan Qazaxıstan üçün xüsusi ölkə, qardaş dövlətdir. Bizi ortaq tarixi köklər, zəngin mənəvi-mədəni irs, nəhayət, uyğun mentalitet, hadisələrə, vəziyyətin inkişafına baxış birləşdirir. Bu möhkəm zəmində çoxtərəfli əməkdaşlığımızı uğurla inkişaf etdiririk” söyləyən Qazaxıstan Prezidenti onu da əlavə etdi ki, cənab İlham Əliyevin səfərinin ölkələrimiz arasında strateji tərəfdaşlıq və müttəfiqlik haqqında Müqavilənin 20-ci ildönümünə təsadüf etməsi rəmzi məna daşıyır. Biz bu illər ərzində fəal siyasi dialoq qurmuşuq, iqtisadi-ticari və mədəni-humanitar qarşılıqlı fəaliyyətin davamlı inkişafı üçün möhkəm müqavilə-hüquqi baza yaratmışıq. Belə bir kompleks, ardıcıl iş iki dövlətin vətəndaşları tərəfindən tam dəstəklənir: “Hörmətli İlham Heydər oğlu, Qazaxıstan-Azərbaycan münasibətlərinin hazırkı yüksək səviyyəsi, ilk növbədə, Sizin şəxsi töhfəniz sayəsindədir. Mən Sizin bu məsələyə daimi dəstək və diqqətinizi dərindən, yüksək qiymətləndirirəm. Müasir Azərbaycanın bütün möhtəşəm nailiyyətləri Sizin qurucu, güclü liderliyinizlə ayrılmaz şəkildə bağlıdır”.

Dövlət başçısı İlham Əliyev Azərbaycan-Qazaxıstan Ali Dövlətlərarası Şuranın keçirilən ikinci iclasında iki ölkənin münasibətlərinin ayrı-ayrı sahələrdə uğurlu inkişafından geniş bəhs edərək bildirdi ki, ümumilikdə gündəlik kifayət qədər genişdir, qarşılıqlı fəaliyyətin demək olar ki, bütün əsas sahələrini əhatə edir.

Mətbuata birgə bəyanatlarla çıxış edən Prezidentlər diqqəti perspektivlərə yönəltdilər. Qazaxıstan Prezidenti Kasım-Jomart Tokayevin “Ölkələrimiz ümumi köklərə və tarixə malikdir. Azərbaycan Qazaxıstanın mühüm etibarlı strateji tərəfdaşıdır. Bu gün münasibətlərimiz sabit inkişaf edir. Dövlətlərarası əlaqələrimizin möhkəmlənməsinə xüsusi diqqət yetiririk. Xalqlarımız arasında dostluğun gələcəkdə də hərtərəfli möhkəmlənməsi və müxtəlif sahələrdə əməkdaşlığa yeni təkan verilməsi əsas məqsəddir. Bu, iki ölkənin köklü maraqlarına uyğundur. Əminəm ki, bu səfər Qazaxıstan-Azərbaycan münasibətlərinin keyfiyyətcə yeni səviyyəyə yüksəlməsinə kömək edəcək. Əminəm ki, bu gün əldə olunan razılaşmalar ölkələrimiz arasında dostluq əlaqələrini daha da möhkəmləndirəcək” fikirlərinin davamı olaraq Prezident İlham Əliyev qeyd etdi ki, xalqlarımızı ümumi köklərə, mənəvi və mədəni ortaqlığa əsaslanan çoxəsrlik dostluq, qardaşlıq birləşdirir. Dövlətlərarası münasibətlərimizi bu möhkəm bünövrə üzərində qururuq. Hətta son üç ildə ondan çox qarşılıqlı səfərlərə baxdıqda münasibətlərimizin necə intensiv xarakter daşıdığını əyani şəkildə görmək olar. Hər bir görüş, hər müzakirə son nəticəyə yönəlib. Bu gün sahə nazirliklərinin hesabatlarını, həmçinin gələcək planları dinlədik. Təbii ki, qarşılıqlı fəaliyyətimizi necə intensivləşdirmək lazım olduğuna dair öz əlavə təlimatlarımızı verdik. Bizim eşitdiklərimiz məmnunluq hissi doğurur. Çünki nəzərdə tutulanların hamısı yerinə yetirilir. Diqqət yetirilməsi və dövlət başçılarının iştirakı tələb edilən məsələlər olduqda, təbii ki, bu, bizim daimi nəzarətimiz altındadır.

Onu da qeyd edək ki, dövlət başçısı İlham Əliyev dövlət səfərindən əvvəl, oktyabrın 18-də “Kazinform” agentliyinə müsahibə vermişdir. Həmin müsahibədə bir daha Azərbaycan-Qazaxıstan münasibətlərinə diqqət yönəldilərək səfərin əlaqələrimizin gələcək inkişafına hansı töhfələri verəcəyi açılandı. Prezident İlham Əliyev bildirdi ki, Azərbaycan ilə Qazaxıstan arasında siyasi əlaqələr hazırda yüksək dərəcədə möhkəmlik və qarşılıqlı etimad ilə xarakterizə olunur. Ötən onilliklər ərzində xalqlarımız arasında tarixi qardaşlığa, dostluğa və qarşılıqlı dəstəyə, ortaq türk kimliyinin möhkəm təməlinə, oxşar mədəni ənənələrə və mənəvi dəyərlərə əsaslanaraq, biz həqiqi strateji tərəfdaşlıq və müttəfiqlik münasibətləri qurmuşuq. İkitərəfli əməkdaşlığın möhkəmlənməsinə töhfə verən mühüm amil ən yüksək səviyyədə aparılan və dövlətlərarası əlaqələrin bütün səviyyələrdə hərtərəfli dərinləşməsinə təkan verən fəal və konstruktiv dialoqdur. Müntəzəm təmaslar bizə gündəlikdə duran aktual məsələləri operativ şəkildə həll etməyə və əməkdaşlığın əsas istiqamətləri üzrə razılaşdırılmış mövqeləri müəyyənləşdirməyə imkan verir.

Anar Nəbiyev

YAP Qazax rayon təşkilatının sədri

Paylaş:

Baxılıb: 509 dəfə